Re U Lome Tsebe?

‘Setulo sa kahlolo’ seo moapostola Pauluse a ileng a isoa ho sona e ne e le eng?

▪ Tlaleho e ho Liketso 18:12, 13 e bolela hore Bajuda ba Korinthe ba ile ba qosa Pauluse ka hore o ne a sokolla batho ka tsela e seng molaong ’me ba mo isa “setulong sa kahlolo” kapa beʹma (lentsoe la Segerike le bolelang “setepisi”). Korinthe ea boholo-holo ho ne ho e-na le sethala se phahameng se neng se le pel’a bohare ba ’maraka, seo e ka ’nang eaba se ne se se hōle hakaalo le synagoge. Sethala sena se ne se eme ka tsela eo ho neng ho ka ba bonolo ho bua le letšoele. Se ne se hahiloe ka ’mabole o moputsoa le o mosoeu ’me se khabisitsoe ka majoe a betliloeng ka makhethe, ho ne ho e-na le likamore tse peli moo batho ba letang teng tse neng li e-na le libenche tsa ’mabole ’me fatše ho aliloe majoe a manyenyane a mebala-bala.

Ho bonahala sethala sena e ne e le sona setulo sa kahlolo seo moapostola Pauluse a ileng a isoa ho sona ha a ne a le ka pel’a motsamaisi oa profinse Galio, eo e neng e le ’musisi oa Moroma oa Akaia. Ba boholong ’musong ba ne ba lula moo ho mamela linyeoe le ho phatlalatsa qeto ea bona ho letšoele le phuthehileng.

Metseng e meholo ea Bagerike, ho ne ho tloaelehile hore batho ba kopane ka pel’a beʹma e le ho buisana ka litaba tse amang sechaba. Litemana tse ngotsoeng ka Segerike tsa Matheu 27:19 le Johanne 19:13, ha li bua ka nyeoe ea Jesu, li bolela hore Ponse Pilato o ne a bua le letšoele a lutse beʹma.—Bapisa le Liketso 12:21.

Ke hobane’ng ha Bajuda ba bang ba ne ba khopisoa ke tsela eo Jesu a ileng a shoa ka eona?

▪ Ha moapostola Pauluse a bua ka Bakreste ba pele, o ile a re: “Re bolela Kreste ea ileng a khokhotheloa thupeng, ho Bajuda ke sesosa sa ho khoptjoa empa ho lichaba ke booatla.” (1 Bakorinthe 1:23) Ke hobane’ng ha tsela eo Jesu a shoeleng ka eona e ile ea khopisa ba bang?

Ha a bua ka tsela eo Jesu a shoeleng ka eona le se neng se lumeloa ke batho ba Bochabela bo Hare lekholong la pele la lilemo, mohlalosi oa Bibele Ben Witherington III o re “sebakeng seo, eo e ne e le tsela e tlotlollang ka ho fetisisa ea ho shoa. E ne e sa talingoe e le tsela e hlomphehang ea ho shoela tumelo.” Witherington o phaella ka ho re: “Batho ba neng ba phela moo ba ne ba lumela hore mokhoa oo motho a shoang ka oona o bontša seo a neng a le sona. Kahoo, ho ne ho ka thoe Jesu ke senokoane, motho ea neng a batla ho phethola ’muso, ea neng a lokeloa ke kotlo e neng e fuoa makhoba a bafetoheli.” Ka lebaka la hore batho ba ne ba lumela sena, ho bonahala ho sa utloahale ho nahana hore Bakreste ba pele ba ile ba iqapela litlaleho mabapi le lefu la Jesu le tsoho ea hae.