Sehlooho sena se na le lipotso tseo e ka ’nang eaba u ’nile ua ipotsa tsona ’me se bontša hore na u ka fumana likarabo hokae Bibeleng. Lipaki Tsa Jehova li ka thabela ho tšohla likarabo tsena le uena.

1. Ke hobane’ng ha Molimo a iphile lebitso?

Ha ho pelaelo hore u rata ha batho ba u bitsa ka lebitso la hao, ho e-na le hore ba u bitse ka litlotla tse kang, “monna,” “mosali,” “monghali,” kapa “mofumahali.” Lebitso lea u khetholla. Molimo o bitsoa ka litlotla tse kang, “Musi Morena,” “Molimo ea Matla ’Ohle,” le ‘’Mōpi e Moholo.’ (Genese 15:2; 17:1; Moeklesia 12:1) Empa o boetse o iphile lebitso e le hore re be le kamano le eena. Ka Sesotho, lebitso la Molimo ke Jehova.—Bala Esaia 42:8.

Le hoja bafetoleli ba bangata ba Bibele ba kentse mantsoe a kang “Molimo” le “Morena” moo lebitso la Molimo le hlahang, lebitso leo le fumanoa ka makhetlo a ka bang 7 000 Libibeleng tsa Seheberu tsa boholo-holo tse ngotsoeng ka letsoho. Ho hlakile hore Molimo o batla re tsebe lebitso la hae.—Bala Esaia 12:4.

2. Ke hobane’ng ha e le habohlokoa hore re tsebe lebitso la Molimo?

Ho tseba lebitso la Molimo ha ho bolele feela ho tseba ho le bitsa. Ho bolela ho ba le kamano e haufi le eena. Lebitso Jehova le bolela hore “O Etsa Hore ho be.” Le re tiisetsa hore Molimo e tla ba ntho e ’ngoe le e ’ngoe e hlokahalang e le hore a phethahatse morero oa hae. Kahoo ho tseba lebitso la Molimo ho bolela hore rea lumela hore Molimo o tla phethahatsa litšepiso tsa hae. (Pesaleme ea 9:10) Batho ba tsebang lebitso la Molimo le ba le sebelisang, ba na le tumelo e etsang hore ba mo tšepe ’me ba mo behe pele bophelong ba bona. Jehova Molimo o tla sireletsa batho ba joalo.—Bala Pesaleme ea 91:14.

  3. Ke hobane’ng ha Molimo a batla hore batho ba tsebe lebitso la hae?

Molimo o batla hore batho ba mo tsebe ka lebitso hobane ho etsa joalo ho tla ba tsoela molemo. Ho tla etsa hore e be metsoalle ea Molimo e nang le tšepo ea ho phela ka ho sa feleng. Ke kahoo Jehova a batlang hore re tsebise batho lebitso la hae!—Bala Johanne 17:3; Baroma 10:13, 14.

Jesu o ile a tsebisa batho lebitso la Molimo ka ho ba ruta ka Molimo, melao ea Hae le litšepiso tsa Hae. Kajeno, balateli ba Jesu ba tsoela pele ka mosebetsi oa ho tsebisa lichaba tsohle lebitso la Molimo. Ba etsa seo ba kopane e le “batho bakeng sa lebitso la [Molimo].”—Bala Liketso 15:14; Johanne 17:26.

4. Molimo o tla tlotlisa lebitso la hae joang?

Jehova Molimo o batla ho tlotlisa lebitso la hae hobane o sentsoe lebitso. Ka mohlala, batho ba bang ba re hase eena ea bōpileng lintho tsohle tse phelang hape ba re ha re hloke ho mo mamela. Ba bang ba re ha a re tsotelle ebile ke eena ea re bakelang mahlomola. Batho ba joalo ba senya Molimo lebitso. Empa ba ke ke ba etsa joalo ka ho sa feleng. Molimo o tla felisa batho ba sa hlompheng lebitso la hae.—Bala Pesaleme ea 83:17, 18.

Jehova o tla tlotlisa lebitso la hae ha ’Muso oa hae o felisa mebuso ea batho ’me o etsa hore batho ba boele ba phele ka khotso ba sireletsehile. (Daniele 2:44) Haufinyane, batho bohle ba tla tseba hore Jehova ke Molimo oa ’nete.—Bala Ezekiele 36:23; Matheu 6:9.

U lokela ho etsa’ng? Atamela ho Molimo ka ho ithuta Lentsoe la hae le ka ho tloaelana le batho ba mo ratang. Ha Jehova a tlotlisa lebitso la hae, o tla hopola bahlanka ba hae ba tšepahalang.—Malakia 3:16.

E le hore u fumane boitsebiso bo eketsehileng, sheba khaolo ea 1 bukeng ena ea Ha e le Hantle ke Eng Seo Bibele e se Rutang? e hatisoang ke Lipaki Tsa Jehova.

[Setšoantšo se leqepheng la 16]

Lebitso la Molimo bukeng ea khale ea Seheberu e ngotsoeng ka letsoho