MOCHA e mong oa Japane o ile a ameha maikutlo ke mosa oa ntate-moholo e mong ea bonolo. Ntate-moholo enoa e ne e le moromuoa ’me e ne e se e le lilemo tse ngata a sa lule naheng ena ea Asia ’me o ne a ntse a sa tsebe ho bua Sejapane hantle. Leha ho le joalo, beke le beke o ne a etela mocha enoa lapeng ho ea qoqa le eena ka Bibele. Ha a araba lipotso tsa mocha enoa ea nyoretsoeng tsebo, o ne a bontša mamello le mosa a bile a bososela.

Mocha enoa o ile a lula a hopola mosa oo moromuoa enoa ea hōlileng a neng a mo bontša oona. O ile a re ka pelong, ‘Haeba Bibele e etsa hore motho a be mosa hape a be lerato hakana, ka sebele ke lokela ho ithuta eona.’ Sena se ile sa mo kenya morolo oa hore o lokela ho ithuta ntho eo ho hang a neng a sa e tsebe. Ka sebele, hangata mosa o ama pelo ea motho le ho e susumetsa ho feta seo motho a se buang.

Ka tlhaho re bontša mosa ho beng ka rōna, kaha mosa o joalo o bontša hore mali a llelana. Leha ho le joalo, mosa ke tšobotsi ea bohlokoa e tsoang ho Molimo. Jesu o ile a re Ntate oa hae ea leholimong ha a bontše mosa ho ba Mo ratang feela empa le ho “ba se nang teboho.” Jesu o ile a khothalletsa balateli ba hae hore ba etsise Molimo ntlheng ena ha a ne a re: “Le phethahale, joalokaha Ntat’a lōna oa leholimo a phethahetse.”—Luka 6:35; Matheu 5:48; Exoda 34:6.

Kaha batho ba bōpiloe ka setšoantšo sa Molimo, ba khona ho bonahatsa tšobotsi ena. (Genese 1:27) Ha ho pelaelo hore re ka etsisa Molimo ’me ra bontša mosa le ho bao re sa amaneng le bona. Bibele e re mosa ke karolo ea tholoana e ntle ea moea o halalelang oa Molimo, e leng matla a hae a sebetsang. (Bagalata 5:22) Kahoo, ha motho a ithuta haholoanyane ka Molimo e leng Mōpi, ebile a e-ba le kamano e haufi le eena, a ka ba le mosa.

Kaha motho o bōpeletsoe le mosa, ebile mosa ke tšobotsi ea bohlokoa ho Molimo, ke ho utloahalang hore Molimo o re bolella hore re “bontšane mosa.” (Baefese 4:32) Re boetse re hopotsoa sena: “Le se ke la lebala ho amohela baeti,” kapa ho ba mosa ho bao le sa ba tsebetseng.—Baheberu 13:2.

Lefatšeng la kajeno le tletseng ho hloka mosa le teboho, na hoa khoneha ho ba mosa ho batho ba bang, esita le bao re sa ba tsebeng? Ke eng e ka re thusang ho etsa seo? Ha e le hantle, ke hobane’ng ha re lokela ho tšoenyeha ka taba ee?

Hoa thahasellisa hore ebe ka mor’a hore moapostola Pauluse a bue ka hore re bontše mosa ho batho bao re sa ba tsebeng, o ile a re: “Ka ho etsa joalo ba bang, ba sa tsebe, ba ile ba amohela mangeloi.” U nahana hore u ne u ka ikutloa joang ha u ne u ka fuoa monyetla oa ho amohela mangeloi? Mantsoe a Pauluse a qalang polelo eo a re “ba sa tsebe.” Ka mantsoe a mang, ntlha ea hae e ne e le hore haeba re tloaetse ho ba mosa ho batho ba bang, ho akarelletsa bao re sa ba tsebeng, re ka ’na ra putsoa ka litsela tseo re sa li lebellang.

Liphetolelo tse ngata tsa Bibele tse bontšang litemana tse ling tse amanang le eo ho buuoang ka eona, li amahanya mantsoe a Pauluse le a leng ho Genese khaolong ea 18 le ea 19 a buang ka Abrahama le Lota. Likhaolong tsena ka bobeli, re bala ka mangeloi a ileng a hlaha ho bona e le batho bao ba sa ba tsebeng ba tšoereng melaetsa ea bohlokoa. Tabeng ea Abrahama, molaetsa  o ne o le mabapi le ho phethahatsoa ha tšepiso ea Molimo ea hore Abrahama o tla ba le mora ’me tabeng ea Lota, o ne o le mabapi le hore o tla lopolloa ha metse ea Sodoma le Gomora e timetsoa.—Genese 18:1-10; 19:1-3, 15-17.

Ha u bala mangolo a boletsoeng ka holimo, u tla hlokomela hore Abrahama le Lota ba ile ba ba mosa ho ba-feta-ka-tsela bao ba neng ba sa ba tsebe. Ha e le hantle, mehleng ea Bibele, batho ba ne tloaetse ba bile ba ikutloa ba tlamehile ho bontša kamohelo ea baeti ho batsamai kapa ba-feta-ka-tsela, ebang e ne e le metsoalle, beng ka motho, kapa batho ba sa tsejoeng. Ha e le hantle, Molao oa Moshe o ne o laela Baiseraele hore ba hlokomele bajaki ba neng ba le ka har’a naha. (Deuteronoma 10:17-19) Leha ho le joalo, ho totobetse hore Abrahama le Lota ba ile ba etsa se fetang seo hamorao molao o ileng oa laela batho hore ba se etse. Ba ile ba ikitlaelletsa ho ba mosa ho batho bao ba sa ba tsebeng ’me ba ile ba hlohonolofatsoa ka lebaka la seo.

Liketso tse mosa tsa Abrahama ha lia ka tsa tlisetsa eena a le mong mahlohonolo ka hore o ile a ba le mora empa le rōna li re tliselitse mahlohonolo. Ka tsela efe? Abrahama le mora oa hae Isaka ba phethile karolo ea bohlokoa hore morero oa Molimo o phethahale. E ile ea e-ba bona ba ka sehloohong lesikeng leo Mesia, Jesu, a hlahileng ho lona. Ho feta moo, botšepehi ba bona bo ile ba bontša kamoo Molimo a neng a tla pholosa batho ka lerato le ka mosa o sa tšoanelang kateng.—Genese 22:1-18; Matheu 1:1, 2; Johanne 3:16.

Litlaleho tseo li re bontša ka ho hlaka hore na Molimo o lebeletse’ng ho batho bao a ba ratang le hore na o nka mosa e le oa bohlokoa hakae. Ho Molimo motho ha a ikhethele ho ba mosa, o tlamehile.

Bibele e bontša hore mehleng ea rōna batho ba bangata e tla ba “ba se nang teboho, ba sa tšepahaleng [le] ba se nang lerato la tlhaho.” (2 Timothea 3:1-3) Ha ho pelaelo hore u kopana le batho ba joalo letsatsi le letsatsi. Leha ho le joalo, seo hase lebaka la hore re se ke ra bontša batho ba bang mosa ka ho feletseng. Bakreste ba hopotsoa sena: “Ho se ke ha e-ba le eo le busetsang bobe ka bobe ho eena. Lokisetsang hore ho be le lintho tse ntle mahlong a batho bohle.”—Baroma 12:17.

Re ka ikitlaelletsa ho ba ba seatla se bulehileng ha re bontša mosa. Bibele e re: “E mong le e mong ea ratang . . . o tseba Molimo,” ’me tsela e ’ngoe eo re bontšang lerato la rōna ka eona ke ka ho ba mosa ho batho ba bang. (1 Johanne 4:7; 1 Bakorinthe 13:4) Ka sebele, ka ho bontša batho ba bang mosa, re tseba Molimo hamolemo ’me seo se a re thabisa. Thutong ea hae ea Thabeng Jesu o ile a re: “Ho thaba ba mosa, kaha ba tla fumana mosa. Ho thaba ba lipelo li  hloekileng, kaha ba tla bona Molimo.”—Matheu 5:7, 8, Young’s Literal Translation.

Nahana ka mohlala oa Aki, mosali ea mocha lilemong oa Mojapane ea nang le bara ba babeli. Ka mor’a ho shoeloa ke ’mè oa hae ka tšohanyetso, o ile a tepella maikutlong. Ka linako tse ling o ne a fokola hoo a tlamehang ho ea ngakeng. Nakong eona eo, lelapa le leng le ile la fallela sebakeng seo a lulang ho sona. Ntate oa lelapa leo o ne a sa tsoa shoa kotsing e itseng ’me ’Mè o ne a setse le bana ba bahlano ba tlaase lilemong. Aki o ile a qenehela lelapa leo haholo eaba o etsa boiteko ba ho etsa setsoalle le ’mè eo le bana ba hae. Ha Aki a ntse a etsa sohle seo a neng a ka se khona ho thusa lelapa leo—ka ho le fa lijo, liaparo tseo lelapa la hae le seng le sa li sebelise le lintho tse ling, seo se ile sa etsa hore a be matla. O ile a bona bonnete ba seo Bibele e se buang, ha e re: “Ho fana ho tlisa thabo e khōlō ho feta ho amohela.” (Liketso 20:35) Ruri, ho bontša mosa ho batho ba bang ke ntho e molemo ka ho fetisisa eo u ka iketsetsang eona ha u tepeletse maikutlong.

Ho bontša mosa ha ho hloke chelete e ngata. Ebile ha hoa itšetleha ka bokhoni ba hao kapa matla a hao. Batho ba bangata ba ananela liketso tse kang ho bososela, ho bua mantsoe a bontšang qenehelo, ho fana ka thuso, ho suthela batho ba bang moleng kapa, ho fana ka mpho e nyenyane e bontšang ho nahanela. Haeba u sa kholiseha ka seo u lokelang ho se bua kapa ho se etsa boemong bo itseng, bontša mosa. Mohlankana eo ho builoeng ka eena qalong ea sehlooho sena, o ile a ameha maikutlo haholo ka lebaka la mosa oo ntate-moholo oa moromuoa a ileng a o bontša le hoja ba ne ba sa utloane ka puo. Ha ho makatse hore ebe e ’ngoe ea lintho tseo Molimo a li lebeletseng ho barapeli ba hae ke hore ba “rate mosa.”—Mikea 6:8.

Polelo e ’ngoe ea Linaheng Tsa Bochabela e re “lentsoe le le leng le mosa le ka etsa hore likhoeli tse tharo tsa mariha e be tse futhumetseng.” Se hlalosoang ke polelo ena ke hore lentsoe le le leng feela le mosa le ka lula le hopoloa ka nako e telele. Ha mosa o bontšoa ka sepheo se setle, haholo-holo haeba motho ea o bontšang a rata Molimo, bohle baa khatholoha. Esita leha ho se motho ea ananelang mosa oo o u bontšang, seo ha se bolele hore u bapetse ka oona. Ke oa bohlokoa ho Molimo. Bibele e re tiisetsa hore ha re bontša batho ba bang mosa, ha e le hantle re “alima Jehova.” (Liproverbia 19:17) Ruri re lokela ho batla menyetla ea ho bontša batho ba bang mosa!