Moeketsi: Ke thabela ho kopana le uena hape Ntate Arabang.

Arabang: Le ’na ke thabela ho u bona.

Moeketsi: Ke ne ke ntse ke nahana ka ntho e ’ngoe eo u ileng ua e bua nakong e fetileng ha ke ne ke le mona.

Arabang: Ntho efe?

Moeketsi: U ile ua mpolella hore u maketse hore ebe Lipaki Tsa Jehova ha li lumele hore lihele li teng.

Arabang: Le joale, seo se ile sa ’makatsa. Ho bua ’nete feela ha ke utloisise hore na ke hobane’ng ha le sa lumele hore ho na le lihele.

Moeketsi: Ke thabela ho utloa maikutlo a hao. Hangata ke ee ke thabele ho utloa maikutlo a batho ba bang. Kaha batho ba na le maikutlo a fapaneng ka thuto ea mollo oa lihele, uena u e utloisisa joang?

Arabang: Ke lumela hore batho ba babe ha ba e-shoa ba ea liheleng ’me ba hlokofatsoa moo ka ho sa feleng.

Moeketsi: Batho ba bangata ba nahana joalo. A nke ke u botse Ntate Arabang, na u kile ua etsahalloa ke lintho tse mpe bophelong ba hao?

Arabang: E, lilemo tse hlano tse fetileng ausi oa ka o ile a bolaoa.

Moeketsi: Ke masoabi ho utloa seo. E tlameha ebe ua mo hloloheloa.

Arabang: Ho joalo, ke nahana ka eena letsatsi le leng le le leng.

Moeketsi: Ke hlokometse hore ntho e etsang hore batho ba bang ba lumele thuto ea lihele ke ka lebaka la liketso tse khopo tseo ba bang ba li etsang. Etsoe batho ba ileng ba angoa ke liketso tse khopo ba batla ho bona batho bao ba khopo ba ahloleloa liketso tsa bona.

Arabang: Le joale! Ke batla hore monna ea bolaileng ausi oa ka a fuoe kotlo ka lebaka la seo a re entseng sona.

Moeketsi: Ke ntho e tloaelehileng ho ikutloa ka tsela e joalo. Bibele e ruta hore Molimo le eena o halefisoa ke ha batho ba se nang molato ba utloisoa bohloko—ebile o tšepisa hore o tla  otla batho ba khopo. Hlokomela se boletsoeng mona ho Esaia 3:11: “Ho malimabe ea khopo!—Tlokotsi; etsoe o tla tšoaroa ka tsela eo a tšoereng ba bang ka eona!” Kahoo re ka kholiseha hore Molimo o tla otla batho ba khopo.

Arabang: Empa seo se tla etsahala joang haeba u re ha ho na lihele?

Moeketsi: Eo ke potso e ntle. Karabo e tobileng feela ke hore Molimo o tla otla batho ba khopo ka ho ba felisa ka ho sa feleng. Hlokomela seo Bibele e se buang mona ho 2 Bathesalonika 1:9. Na u ka re balla eona?

Arabang: Ho lokile, e re: “Bana ba tla feta kotlong ea boahloli ea timetso e sa feleng e tsoang ka pel’a Morena.”

Moeketsi: Joale ua bona Ntate Arabang, ha ho na tšepo ka batho ba khopo, hobane Molimo o ba fa kotlo ea hore ba shoelle ruri. Ha ho na tšepo ea hore ba tla tsoha.

Arabang: Kea utloa, empa ke bona eka hoo ke ho hloka toka. Kaofela rea shoa. Na ba khopo bona ha baa lokela ho fumana kotlo e boima ho feta eo?

Moeketsi: Kea bona hore u motho ea ratang ha lintho li etsoa ka toka.

Arabang: Ho joalo.

Moeketsi: Ke ntho e ntle eo. ’Nete ke hore, Molimo o re bōpeletse le maikutlo a ho tseba ntho e nepahetseng le e fosahetseng. Le eena o rata toka haholo. Empa ha baruti ba ruta hore Molimo o ahlola batho mollong oa lihele, ha e le hantle ba bolela hore Molimo ha a na toka.

Arabang: U bolela’ng?

Moeketsi: E-re ke u etsetse mohlala. Na u tseba tlaleho ea Bibele e buang ka Adama le Eva?

Arabang: E, kea e tseba. Molimo o ile a ba bolella hore ba se ke ba ja tholoana ea sefate se itseng, empa ha baa ka ba mamela.

Moeketsi: U nepile. A re ke re bale tlaleho eo ea Bibele hammoho. E ho Genese 2:16, 17. Litemana tseo li re: “Jehova Molimo a boela a laela motho sena: ‘U ka ja tsa sefate se seng le se seng sa serapa hore u khotsofale. Empa ha e le sefate sa tsebo ea botle le bobe u se ke ua ja tsa sona, etsoe ka letsatsi leo ka lona u jang tsa sona ka sebele u tla shoa.’” Na u hlokometse hore Molimo o ile a re ho tla etsahala’ng ka Adama haeba a ka ja tholoana e hanetsoeng?

Arabang: O ile a re Adama o tla shoa.

Moeketsi: U nepile. Nahana feela: Ka lebaka la sebe seo a se entseng, Adama o ile a etsa hore batho bohle ba tsoaloe e le baetsalibe. *Empa na ua hlokomela hore le tabeng ena, ha ho moo Molimo a buang ka kahlolo ea lihele?

Arabang: E, kea hlokomela.

Moeketsi: Empa haeba Adama le Eva ba ne ba tla ea liheleng, na Molimo o ne a ke ke a ba lemosa e sa le pele? Na ho ba lemosa ho ne ho ke ke ha bontša hore Molimo o na le toka ebile o lerato?

Arabang: E, ho joalo.

Moeketsi: Nahana hape ka seo Molimo a ileng a se bolella Adama le Eva ka mor’a hore ba etse sebe. Ke kōpa hore u bale Genese 3:19.

Arabang: Ho lokile, e re: “U tla ja bohobe ka mofufutso oa phatla ea hao ho fihlela u khutlela mobung, kaha u ntšitsoe ho oona. Etsoe u lerōle ’me u tla khutlela lerōleng.”

Moeketsi: Kea leboha. Ho ea ka mantsoe a Molimo, Adama o ne a tla ea hokae ha a e-shoa?

Arabang: Molimo o itse o ne a tla khutlela lerōleng la lefatše.

Moeketsi: Ho joalo. Joale, na u ke ke ua lumela hore haeba motho a khutlela sebakeng se itseng e tlameha ebe o kile a ba ho sona pele?

Arabang: Kea lumela.

Moeketsi: Joale, Adama o ne a le hokae pele Molimo a mo bōpa?

Arabang: O ne a le sieo.

Moeketsi: U nepile. Ebile u tla hlokomela hore ha ho na moo Molimo a buang ka lihele ha a mo ahlola. Na ke ntho e utloahalang hore Molimo a bolelle Adama hore o tla khutlela mobung oo a ntšitsoeng ho oona empa a tseba hantle hore Adama o tla ea liheleng?

Arabang: Che, ha ho utloahale.

Moeketsi: Ho na le ntho e ’ngoe hape eo re lokelang ho nahana ka eona ka thuto ea lihele.

Arabang: Ke ntho efe?

Moeketsi: Batho ba bangata ba re ke mang ea “laolang” liheleng? Ba re ke mang ea hlokofatsang batho liheleng?

Arabang: Ke Diabolose.

Moeketsi: Empa Diabolose ke sera se seholo sa Molimo. Haeba Molimo a isa batho liheleng hore ba e’o hlokofatsoa ke Diabolose, na seo hase bolele hore Molimo o sebelisana le Diabolose?

Arabang: Hmm! Ha ke e-s’o ka ke e nahana ka tsela eo.

Moeketsi: A nke ke u etsetse mohlala—u motsoali, na ha ho joalo?

Arabang: E, ke na le mora. O sa tsoa ba lilemo li 15.

Moeketsi: Nka hore mora oa hao e ba lerabele ’me o etsa lintho tse ngata tse mpe tse u utloisang bohloko. U ne u tla etsa’ng?

Arabang: Ke ne ke tla leka ho mo khalemela.

Moeketsi: Ke lumela hore u ne u tla leka ho mo thusa ka makhetlo a mangata hore a fetohe.

Arabang: Ho joalo.

Moeketsi: A re re o hana ho u mamela ho sa tsotellehe boiteko boo u bo etsang. Qetellong u ne u tla qobelleha hore u mo fe kotlo e itseng, na ha ho joalo?

Arabang: E, le joale.

Moeketsi: Empa u ne u tla etsa’ng ha u hlokomela hore ho na le motho e mobe ea neng a susumelletsa mora oa hao le ho mo ruta ho etsa lintho tse mpe?

Arabang: Ke ne ke tla halefela motho eo.

Moeketsi: Joale, nka rata ho utloa hore na u tla arabela potso ena joang. Ha u se u tseba hore motho ea khopo le ea nang le boitšoaro bo bobe o ’nile a susumelletsa mora oa hao hore a se ke a u mamela, na u ne u tla ea ho motho eo ’me u mo kōpe hore a fe mor’a hao kotlo?

Arabang: Le hanyenyane. Ho etsa joalo e ne e tla ba ho hloka kelello.

Moeketsi: Kahoo, na ruri ke ntho e utloahalang hore Molimo a kōpe Satane Diabolose—eena ea susumetsang batho ba khopo—hore a boele a ba hlokofatse?

Arabang: Che, ha ho utloahale.

Moeketsi: Le haeba Molimo a ne a batla ho otla batho ba khopo, na Diabolose—e leng sera se seholo sa Molimo—o ne a tla lumela ho etsa seo Molimo a reng a se etse ebe oa ba hlokofatsa?

Arabang: Moo teng oa bua!

Moeketsi: Leha ho le joalo, seo u lokelang ho se tseba ke ho re, Molimo o tla nka khato khahlanong le batho ba khopo ba sa bakeng. Mohlomong nka bala lengolo la ho qetela le uena le tla hlakisa ntlha ena. Ke Pesaleme ea 37:9. Na u ka e bala?

Arabang: Ho lokile, e re: “Baetsi ba bobe ba tla felisoa, empa ba tšepang Jehova ke bona ba tla rua lefatše.”

Moeketsi: Kea leboha. Na u hlokometse seo Jehova Molimo a tla se etsa ka batho ba etsang bobe?

Arabang: Temana eo e re Molimo o tla ba felisa.

Moeketsi: U nepile. Seo se bolela hore ba ke ke ba hlola ba e-ba teng. Empa batho ba lokileng—e leng “ba tšepang Jehova”—ba tla thabela bophelo mona lefatšeng ka ho sa feleng. Ke lumela hore sena se etsa hore u ipotse lipotso tse ngata. Mohlomong ua ipotsa hore na ke hobane’ng ha Molimo a sa ka a thibela batho ho etsa lintho tse mpe li sa tloha feela? Le hore haeba a hlile a batla ho otla batho ba khopo, ke hobane’ng ha a e-s’o etse joalo?

Arabang: Tseo ke lipotso tse thahasellisang.

Moeketsi: Nka thabela ho u bontša likarabo tsa tsona tse tsoang ka Bibeleng nakong e tlang. *

Arabang: Nka thabela seo.