NTATE oa Ian o ne a noa joala haholo. Le hoja Ian a ne a sa hloke letho ha a ntse a hōla, o ne a hloka lerato la botsoali la ntate oa hae. Ian o re: “Ka lebaka la hore Ntate o ne a noa joala haholo a bile a sa tšoare ’Mè hantle, ke ne ke sa mo rate hakaalo.” Ha Ian a ntse a hōla o ile a belaela hore na Molimo o teng na. O re: “Ke ne ke ipotsa, ‘Haeba Molimo o teng, ke hobane’ng ha a lumella batho hore ba utloe bohloko?’”

Le hoja ho ka bonahala eka ha u na mathata, ho rata toka ho ka ’na ha etsa hore u halefe ha u bona batho ba se nang molato ba utloa bohloko. Leha ho le joalo, potso e mabapi le hore na ke hobane’ng ha Molimo a lumella lintho tse bohloko, e ba ea bohlokoa haeba u tobane le maemo a thata joaloka Ian kapa haeba motho eo u mo ratang a kula kapa a e-shoa.

Batho ba bang ba nahana hore Molimo o lumella hore re utloe bohloko hobane a batla re ikokobetse le hore re be le kutloelo-bohloko. Ba bang ba nahana hore batho ba sotleha ka lebaka la libe tseo ba li entseng nakong e fetileng.

Molimo ha a tsotelle hore na batho ba utloa bohloko kapa che ’me seo se etsa hore batho ba se ke ba mo rata. Molimo o sehlōhō.

Bibele e bolela ka ho hlaka hore Molimo hase eena ea bakelang batho mahlomola. “Ha a le tlas’a teko, ho se ke ha e-ba le ea reng: ‘Ke ntse ke lekoa ke Molimo.’ Etsoe Molimo a ke ke a lekoa ka lintho tse mpe kapa hona hore o leka leha e le mang ka tsona.” (Jakobo 1:13) Ha e le hantle, maikutlo a hore Molimo ke eena ea bakelang batho mahlomola ha a lumellane le tsela eo Bibele e hlalosang Molimo ka eona. Joang?

E ’ngoe ea litšobotsi tsa Molimo tse hlaheletseng ke lerato. (1 Johanne 4:8) Ho totobatsa taba eo, Bibele e hlalosa Molimo a e-na boikutlo bo tšoanang le ba ’mè ea anyesang. Molimo o ile a re: “Na mosali a ka lebala ngoana oa hae ea anyang hoo a ke keng a hauhela mora oa mpa ea hae? Esita le basali bana ba ka lebala, leha ho le joalo ’na nke ke ka u lebala.” (Esaia 49:15) Na u nahana hore ’mè ea lerato a ka ntša lesea la hae kotsi ka boomo?  Ho e-na le hore a etse seo, motsoali ea lerato a ka etsa sohle se matleng a hae ho imolla ngoan’a hae mahlomoleng. Ka tsela e tšoanang, Molimo ha a bakele batho ba se nang molato mahlomola.—Genese 18:25.

Ho ntse ho le joalo, batho ba se nang molato ba utloa bohloko. U ka ’na ua ipotsa, ‘Haeba Molimo a re tsotella a bile a e-na le matla ’ohle, ke hobane’ng ha a sa felise lintho tse re utloisang bohloko?’

Molimo o na le mabaka a utloahalang a hore na ke hobane’ng ha a lumeletse hore lintho tse bohloko li tsoele pele ho etsahala. Nahana ka lebaka lena feela: Hangata batho ke bona ba bakelang ba bang mahlomola. Batho ba bangata ba utloisang ba bang bohloko ka ho ba tšoara hampe le ho ba hatella ha ba batle ho fetoha. Kahoo, e le hore Molimo a tlose ntho e ka sehloohong e bakang mahlomola, o tla tlameha hore a felise batho ba joalo.

Ha moapostola Petrose a hlalosa hore na ke hobane’ng ha Molimo a e-s’o felise batho ba babe, o ile a ngola a re: “Jehova ha a liehe mabapi le tšepiso ea hae, joalokaha batho ba bang ba ho nka e le tieho, empa ha a le felle pelo hobane ha a lakatse hore leha e le mang a timetsoe empa o lakatsa hore bohle ba fihle pakong.” (2 Petrose 3:9) Mamello ea Jehova Molimo e bontša kamoo a leng mohau a bileng a leng lerato kateng.

Leha ho le joalo, haufinyane Jehova Molimo o tla nka khato. O tla ‘busetsa matšoenyeho ho ba tšoenyang’ ba se nang molato. Batho ba bakelang ba bang mahlomola “ba tla feta kotlong ea boahloli ea timetso e sa feleng.”—2 Bathesalonika 1:6-9.

Ian eo ho builoeng ka eena qalong ea sehlooho sena o ile a fumana likarabo tse khotsofatsang tsa lipotso tseo a neng a e-na le tsona ka mahlomola. Seo a ileng a ithuta sona se ile sa fetola tsela eo a talimang bophelo ka eona. Bala pale ea hae leqepheng la 13 la makasine ena.