BAKRESTE ba limilione ba khetha ho se keteke Keresemese. Ba ikutloa joang ka seo? Na ba utloa eka ba fetoa ke ho hong? Na bana ba bona ba utloa eka ba tingoa monate? Hlokomela seo Lipaki Tsa Jehova lefatšeng ka bophara li se buang ka taba ena.

Ho hopola Jesu Kreste: “Pele ke ba e mong oa Lipaki Tsa Jehova, ke ne ke ea kerekeng ka seoelo. Ke ne ke ea feela ka Keresemese kapa ka Easter. Leha ho le joalo, esita le linakong tsena, ke ne ke sa nahane le ho nahana ka Jesu Kreste. Ha ke sa keteka Keresemese, empa ke se ke e-ea libokeng tsa Bokreste habeli ka beke ebile ke ruta batho ba bang seo Bibele e se buang ka Jesu!”—EVE, AUSTRALIA.

Thabo e tlisoang ke ho fana: “Kea thaba ha batho ba mpha limpho ke sa lebella. Ke rata ho ngolla batho ba bang likarete le ho ba fa litšoantšo tseo ke li toroileng hobane seo sea ba thabisa ebile se etsa hore le ’na ke thabe.”—REUBEN, NORTHERN IRELAND.

Ho thusa ba hlokang: “Re rata ho phehela batho ba kulang ’me ka linako tse ling re ba isetsa lipalesa, likuku kapa limpho tse nyenyane feela tse tla ba hlasimolla. Ho etsa sena hoa re thabisa hobane re etela batho bana ka nako leha e le efe ea selemo.”—EMILY, AUSTRALIA.

Ho ba hammoho le le lelapa: “Ha re kopana re le lelapa, bana ba rōna ba khona ho tloaelana le bo-malome, bo-rakhali, bo-nkhono le bo-ntate moholo le bo-motsoala, ba phutholohile. Kaha re lula re etela beng ka rōna, ha re ikutloe re qobellehile ho eta nakong ea matsatsi a phomolo ’me baa tseba hore re ba etela hobane re ba rata.”—WENDY, CAYMAN ISLANDS.

Khotso: “Ka Keresemese ho bonahala eka batho ba bangata ba phathahana ka lintho tse ngata hoo ba sa nahaneng ka khotso. Kaha joale ke ithutile seo Bibele e re tšepisang sona, ke utloa ke imolohile. Joale ke na le tšepo ea hore bana ba ka ba tla ba le bokamoso bo thabisang.”—SANDRA, SPAIN.