Lefatšeng lohle batho ba ka bang libilione tse peli ba keteka Keresemese ka la 25 December selemo le selemo, ha ba ka bang limilione tse 200 ba keteka tsoalo ea Jesu Kreste ka la 7 January. Leha ho le joalo, ho na le ba bang ba limilione ba khethang ho se keteke Keresemese ho hang. Hobane’ng?

Lebaka le leng ke hore e ka ’na eaba batho bao hase litho tsa bolumeli ba Bokreste. Ka mohlala, ba bang e ka ’na eaba ke ba bolumeli ba Sejuda, Bohindu kapa Boshinto. Athe ba bang bona, ba kang batho ba latolang le ba belaellang boteng ba Molimo, ba latelang monahano oa bona feela kapa ba ipolelang hore ha ba na bolumeli, ba nka hore pale ea Keresemese ke tšōmo.

Leha ho le joalo, se makatsang ke hore batho ba bangata ba lumelang ho Jesu ha ba lumellane le meetlo e amanang le matsatsi a Keresemese. Hobane’ng? Ba fana ka mabaka a mane.

La pele, ha ba lumele hore Jesu o hlahile ka December kapa ka January. Bibele ha e fane ka letsatsi le tobileng la tsoalo ea Jesu. Empa e re: “Naheng eona eo ho ne ho boetse ho e-na le balisa ba phelang naheng ’me ba lebela mehlape ea bona bosiu. Ka tšohanyetso lengeloi la Jehova la ema haufi le bona, ’me . . . lengeloi la re ho bona: ‘. . . Kajeno le tsoaletsoe Mopholosi, e leng Kreste Morena.’”—Luka 2:8-11.

Linnete li bontša hore Jesu o hlahile hoo e ka bang mathoasong a October, nakong eo balisa ba robalang le mehlape ea bona bosiu naheng. Libaka tse ka thōko tsa Bethlehema li bata haholo khoeling ea December le ea January. Kahoo, balisa ba ne ba koalla mehlape moo ho sireletsehileng e le hore e lule e futhumetse bosiu.

Lebaka la bobeli: Ketsahalo eo Jesu a ileng a laela balateli ba hae ka ho toba hore ba ikhopotse eona ke lefu la hae eseng tsoalo ea hae, seo ba ne ba tla se etsa ka ho kopanela hammoho lijong tse itekanetseng. (Luka 22:19, 20) Hape, hlokomela hore Kosepele ea Mareka le ea Johanne ha li re letho ka tsoalo ea Jesu.

Lebaka la boraro: Ha ho na bopaki ba histori bo bontšang hore Bakreste ba pele ba ile ba keteka tsoalo ea Kreste. Empa ba ile ba ikhopotsa lefu la hae. (1 Bakorinthe 11:23-26) Ke feela ha ho se ho fetile lilemo tse 300 ka mor’a lefu la Jesu moo likereke tse ipitsang hore ke tsa Bokreste li ileng tsa qala ho keteka Keresemese ka la 25 December. Se thahasellisang ke hore bohareng ba lekholo la bo17 la lilemo, paramente e ile ea etsa molao o thibelang ho keteka Keresemese Engelane. Lekhotla la Massachusetts, United States, le lona le ile la etsa thibelo e tšoanang. Hobane’ng? Buka ea The Battle for Christmas, e re: “Ha ho na bopaki ba histori kapa ba Bibele bo bolelang hore Jesu o hlahile ka la 25 December.” Buka eo e phaella ka ho re, ho batho ba bolumeli ba Puritan, “Keresemese e ne e le feela mokete oa bohetene oo ba bang ba ileng ba leka ho o etsa mokete oa Bokreste.”

Seo se re tlisa lebakeng la bone: Tšimoloho e mpe ea mokete ona. Ho ka boleloa hore Keresemese e simolohile Roma ea bohetene e neng e e-na le mekete e fapaneng ea ho tlotlisa molimo oa temo Saturn le molimo oa letsatsi Sol Invictus, kapa Mithra. Litsebi tsa thuto mabapi le batho, e leng Christian Rätsch le Claudia Müller-Ebeling bao e leng bangoli ba buka ea Pagan Christmas, ba re: “Joaloka mekete le meetlo e mengata ea pele ho Bokreste, mokete oa khale oa ho ikhopotsa ho khutla ha letsatsi selemo le selemo, o ile oa qala ho ketekoa e le letsatsi la tsoalo ea Kreste.”

Ho latela mabaka a tšohliloeng ka holimo, na ua hlokomela hore na ke hobane’ng ha Bakreste ba ’nete ba sa keteke Keresemese?