Thabo e Tlisoang ke ho Fana
“Ho fana ho tlisa thabo e khōlō ho feta ho amohela.”—LIKETSO 20:35.
Lebaka leo ba bang ba ketekang Keresemese.
Joalokaha Jesu a boletse, ho fana ho tlisetsa ea fanang le ea amohelang thabo. E le ha ba lelekisa thabo eo, batho ba bangata ba nka hore ho fana ka limpho ke e ’ngoe ea litšobotsi tsa bohlokoa ka ho fetisisa tsa Keresemese. Ka mohlala, le hoja ho ne ho e-na le mathata a moruo selemong se fetileng, phuputso e ’ngoe e ile ea bontša hore lelapa le leng le le leng Ireland, le ne le lebeletse hore le tla sebelisa chelete e ka holimo ho R5 500 hore le reke limpho tsa Keresemese.
Ke hobane’ng ha seo e le bothata?
Batho ba bangata ba lumela hore ho fana ka limpho ka Keresemese ho tlisetsa batho khatello haholo ho e-na le ho ba tlisetsa thabo. Ka tsela efe? Ba bangata ba utloa ba le tlas’a khatello ea ho batla limpho tseo ba sa khoneng ho li reka. Kaha bohle ba reka limpho ka nako e tšoanang, tšubuhlellano le mela e melelele e etsa hore nako ena e be e bosula ho ba bangata.
Ke melao-motheo efe ea Bibele e ka re thusang?
Jesu o ile a re: “Itloaetseng ho fana.” * (Luka 6:38) Ha aa ka a re ho fanoe ka limpho feela nakong e itseng ea selemo ha ho lebeletsoe hore batho ba fane. Jesu o ile a khothalletsa balateli ba hae hore ba itloaetse ho fana ka boithaopo, e be mokhoa oo ba phelang ka oona.
“E mong le e mong a ke a etse feela joalokaha a entse qeto e tiileng pelong ea hae, eseng ka lekhonono kapa ka ho qobelloa, kaha Molimo o rata ea fanang a nyakaletse.” (2 Bakorinthe 9:7) Tlhaloso e ’ngoe ea Bibele e re moelelo oa keletso ea Pauluse ke hore “ha ho letho le lokelang ho fanoa ‘ka ho qobelloa,’ kapa boikutlo ba hore motho o tlamehile ho fana.” Ho ba “mofani ea nyakaletseng” ha ho bolele hore motho a ikutloe a tlameha ho fana ka ntho e itseng ho motho ea itseng ka nako e itseng—e leng sona se atisang ho etsahala ha ho fanoa ka limpho tsa Keresemese.
“Haeba ho itokisa ho le teng pele, ho amoheleha ka ho khethehileng ho ea ka seo motho a nang le sona, eseng ho ea ka seo motho a se nang sona.” (2 Bakorinthe 8:12) Molimo ha a hloke hore Bakreste ba kene likolotong e le hore ba lefelle limpho tse theko e boima. Empa ha motho a fana ho latela ‘seo a nang le sona’ limpho tsa hae hase tse fanoang feela ho phetha molao empa ke “tse amohelehang ka ho khetheha.” See se imolla hakaakang ha se bapisoa le molaetsa oo baphatlalatsi ba o etsang matsatsing a phomolo, o reng “reka hona joale, ’me u patale hamorao”!
^ ser. 8 Liphetolelo tse ling tsa Bibele li re feela: “Fanang.” Leha ho le joalo, Segerikeng sa pele leetsi lena le bolela ketso e tsoelang pele. E le ho fetisa moelelo o feletseng oa lentsoe leo Jesu a le sebelisitseng, Phetolelo ea Lefatše le Lecha e le beha tjena, “Itloaetseng ho fana.”
