Ke hlahetse motseng o khutsitseng oa Moundsville o pel’a Nōka ea Ohio ka leboea ho Virginia Bophirimela, U.S.A. Ke oa bobeli baneng ba bane, ’me re bashemane ba bararo, kahoo e ne e e-ba ka seoelo ho bang bolutu heso. Batsoali ba ka ba ne ba sebetsa ka thata, ba tšepahala ba bile ba rata batho. Heso e ne e se boruing, empa re ne re e-na le lintho tseo re li hlokang. Kaha batsoali ba ka ke Lipaki Tsa Jehova, ba ile ba leka kahohle ho re ruta melao-motheo ea Bibele ho tloha bonyenyaneng.

Leha ho le joalo, ha ke kena lilemong tsa bocha, pelo ea ka e ne e se e qalile ho kheloha tseleng eo ke e rutiloeng. Ke ne ke e-na le khoao tabeng ea hore ho phela ka melao-motheo ea Bibele ho ka ntsoela molemo kapa ha nthabisa. Ke ne ke nahana hore ho iketsetsa borata ke eona feela ntho e ka etsang hore ke thabe e le kannete. Ho e-s’o ee kae ke ile ka khaotsa ho ea libokeng tsa Bokreste. Moholoane oa ka le khaitseli le bona ba ile ba ntšala morao borabeleng boo. Batsoali ba rōna ba ile ba leka kahohle ho re thusa, empa ra satalatsa melala.

Ke ne ke sa hlokomele hore bolokolohi bona boo ke bo batlang bo tla nkenya bokhobeng. Ka letsatsi le leng ha ke tsoa sekolong, motsoalle oa ka o ile a mpha sakerete. Ke ile ka e nka. Ho tloha mohlang oo, ka lumela ho etsa lintho tse ling tse ngata tse kotsi. Ha nako e ntse e ea, ke ile ka lemalla lithethefatsi le joala ’me ka phela bophelo ba boitšoaro bo bobe. Ho theosa le lilemo ke ’nile ka sebelisa lithethefatsi tse matlanyana ’me ka ba lekhoba la tsona. Ha ke ntse ke tetebela bokhobeng bona, ke ile ka qala ho rekisa lithethefatsi.

Le hoja ke ne ke leka ka matla ho hatella letsoalo la ka, kamehla le ne le nkhopotsa hore tsela eo ke phelang ka eona e fosahetse. Empa ke ne ke nka hore ha ho sa na thuso, ke ho llela lebese le qhalaneng. Le hoja ke ne ke ea liphathing le likonsareteng moo ho nang le batho ba bangata, ke ne ke atisa ho jeoa ke bolutu ke bile ke ikutloa ke nyahame. Ka linako tse ling ke ne ke ee ke nahane kamoo batsoali ba ka ba itlhomphang ba bileng ba lokileng kateng ebe ke ipotsa hore na ho tlile joang hore ke khelohe.

Le hoja ke ne ke feletsoe ke tšepo, ba bang ba ne ba ntse ba e-na le eona. Ka 2000, batsoali ba ka ba ile ba ’memela ho ea kopanong ea setereke ea Lipaki Tsa Jehova. Le hoja ke ne ke le leqe, ke ile ka ea. Ka makala hore ebe le banab’eso ba babeli ba neng ba khelohile le bona ba ne ba le teng.

Ha ke le kopanong eo, ke ile ka elelloa hore selemong se fetileng ke ne ke le sebakeng sona seo ke tlile konsareteng ea ’mino oa rock. Phapang eo ke ileng ka e bona e ile ea nkama ka ho teba. Ha ho ne ho tšoaretsoe konsarete sebakeng seo, ho ne ho le litšila ebile ho tletse mosi oa sakerete. Ba bangata ba neng ba le konsareteng eo ba ne ba se na botsoalle, ’me molaetsa o mantsoeng a lipina tseo o tetebetsa. Empa kopanong moo, ke ne ke e-na le batho ba thabileng—ba nkamohelang ka mofuthu, le hoja e le khale re sa kopane. Sebaka seo se ne se hloekile, le litaba tse buuoang ho sona li fana ka tšepo. Ha ke bona kamoo ’nete ea Bibele e nang le tšusumetso e ntle kateng, ke ile ka ipotsa hore na ke e lahletse’ng!—Esaia 48:17, 18.

Hang ka mor’a kopano, ke ile ka etsa qeto ea ho khutlela phuthehong ea Bokreste. Banab’eso le bona ba ile ba angoa ke seo ba se boneng kopanong eaba le bona ba etsa qeto ea ho khutla. Kaofela re ile ra lumela ho rutoa Bibele.

Temana ea Bibele e ileng ea nkhothatsa ka ho khetheha ke Jakobo 4:8, e reng: “Atamelang ho Molimo, ’me o tla atamela ho lōna.” Ke ile ka hlokomela hore haeba ke batla ho atamela haufi le Molimo, ke lokela ho hloekisa bophelo ba ka. Lintho tse ling tseo ke neng ke lokela ho li etsa ke ho tlohela koae le lithethefatsi le ho khaotsa ho sebelisa joala hampe.—2 Bakorinthe 7:12.

Ke ile ka arohana le metsoalle ea ka ea khale ’me ka fumana e mecha har’a barapeli ba Jehova. Moholo oa Mokreste ea ileng a ithuta Bibele le ’na o ile a nthusa haholo. O ne a lula a ntetsetsa a bile a nketela ho bona hore na ke ntse ke ea joang. Le kajeno e ntse e le e mong oa metsoalle ea ka e haufi-ufi.

Nakong ea selemo ka 2001, ke ile ka tšoantšetsa boinehelo ba ka ho Molimo ka ho kolobetsoa metsing, bana beso le bona ba ile ba etsa se tšoanang. U ka inahanela hore na batsoali ba ka le moen’a ka ea tšepahalang ba ile ba thaba hakaakang ha qetellong re sebeletsa Jehova re le lelapa.

Ke ne ke nahana hore melao-motheo ea Bibele e hlokisa motho bolokolohi, empa hona joale kea bona hore e bohlokoa haholo ’me ea sireletsa. Bibele e ile ea mpha matla a hore ke khaotse ho sebelisa lithethefatsi le ho li rekisa ’me ea etsa hore ke be motho ea molemo sechabeng.

Ke tlotla hore ebe ke mokhatlong oa bara ba motho ba sebeletsang Jehova lefatšeng lohle. Batho bana ba ratana e le kannete, ’me ba sebeletsa Molimo ba momahane. (Johanne 13:34, 35) Har’a bona ke ile ka fumana motho oa bohlokoa—e leng mosali oa ka, Adrianne, eo ke mo ratang haholo ke bileng ke mo ananelang. Ho sebeletsa ’Mōpi re le hammoho hoa re thabisa.

Hona joale ha ke sa phehella bophelo ba boithati, empa ke moithaopi ea bolelang evangeli ka nako e tletseng, ke ruta batho kamoo le bona ba ka ruang molemo Lentsoeng la Molimo. Mosebetsi ona o nthabisa haholo. Ka sebele ke kholisehile hore Bibele e fetotse bophelo ba ka. Qetellong ke fumane tokoloho ea ’nete.