SEHLOOHO SE KA NTLE: RE ITHUTA’NG HO MOSHE?
Moshe e ne e le Mang?
U nahana’ng ha u utloa lebitso Moshe? Na u nahana ka . . .
- lesea leo ’mè oa lona a ileng a le pata ka basketeng Nōkeng ea Nile?
- moshanyana ea ileng a hōlisetsoa mabothobothong a Egepeta ke morali oa Faro—ea sa kang a lebala hore ke Moiseraele?
- monna eo e ileng ea e-ba molisa Mediane ka lilemo tse 40?
- monna ea ileng a buisana le Jehova * ka pel’a sehlahla se tukang?
- monna eo ka sebete a ileng a bolella morena oa Egepeta hore a lokolle Baiseraele bokhobeng?
- monna eo ka taelo ea Molimo a ileng a phatlalatsa Likotlo Tse Leshome tse neng li tla oela Egepeta le hoja morena oa eona a ne a hanyetsa Molimo oa ’nete?
- monna ea ileng a etella Baiseraele pele leetong la bona le leholo ha ba ne ba e-tsoa Egepeta?
- monna eo Molimo a ileng a mo sebelisa hore a arole Leoatle le Lefubelu?
- monna ea ileng a fa Baiseraele Melao e Leshome e tsoang ho Molimo?
MOSHE o ile a feta linthong tseo tsohle le tse ling tse ngata. Ha ho makatse hore na ke hobane’ng ha Bakreste, Bajuda le Mamosleme ba hlompha monna enoa!
Ha ho pelaelo hore Moshe e ne e le moprofeta ea ileng a susumetsa “tšabo [e khōlō].” (Deuteronoma 34:10-12) O ile a lumela hore Molimo a mo sebelise ho etsa mesebetsi e matla. Leha ho le joalo, Moshe e ne e le motho ea tloaelehileng. Joaloka moprofeta Elia ea ileng a hlaha a e-na le Moshe ponong, ha Jesu a ne a le lefatšeng, Moshe e ne e le motho “ea nang le maikutlo a joaloka a rōna.” (Jakobo 5:17; Matheu 17:1-9) Moshe o ile a tobana le mathata a mangata a tšoanang le a rōna ’me o ile a a hlōla.
Na u ka rata ho tseba hore na o ile a a hlōla joang? Nahana ka litšobotsi tse ntle tse tharo tseo Moshe a ileng a li bontša le hore na re ka ithuta’ng mohlaleng oa hae.
^ ser. 7 Jehova ke lebitso la Molimo le hlahang ka Bibeleng.
