Na ehlile Jehova o oa re tsotella, kapa ha a na taba le mahlomola ao batho ba tobanang le ’ona lefatšeng lee? Bibele e araba potso eo ka tsela e khothatsang. Ehlile Molimo o tsotella batho ebile o batla hore re thabele bophelo. Letsatsi le letsatsi o bontša batho melemo ea hae e mengata—esita le ba se nang teboho. Ak’u nahane ka mantsoe a moapostola Pauluse.—Bala Liketso 14:16, 17.

Ha Pauluse a bua le batho ba motse oa Lystra ba neng ba sa rapele Molimo, o ile a re: “Melokong e fetileng [Molimo] o ile a lumella lichaba tsohle ho tsoela pele litseleng tsa tsona, le hoja, ka sebele, a sa ka a itlohela ntle ho bopaki ka hore o ile a etsa se molemo, a le fa lipula tse tsoang leholimong le linako tse behang, a tlatsa lipelo tsa lōna ka ho phethahetseng ka lijo le ho hlasimoloha ho molemo.” Mantsoe ao a ne a bolela’ng ho batho ba neng ba mametse Pauluse?

Batho ba Lystra ba ne ba ka utloisisa habonolo bonnete ba seo Pauluse a neng a se bua. E ne e le lihoai ebile ba lula sebakeng se mobu o nonneng, se ratoang ke pula. Empa, joalokaha Pauluse a ile a ba hopotsa, Molimo ke eena Mohloli oa pula le linako tse behang. Kahoo, kamehla ha ba ne ba kotula chai e ngata ’me ba ja lijo tse lutlisang mathe, ba ne ba rua molemo linthong tse molemo tseo Molimo a neng a ba fa tsona.

Mantsoe ao Pauluse a ileng a a bolella batho ba Lystra a re ruta lintho tse ’maloa tsa bohlokoa ka Jehova Molimo.

Jehova o re fa bolokolohi ba ho ikhethela. Hlokomela hore Jehova o ile a lumella Balichaba hore ba ‘tsoele pele litseleng tsa bona.’ Buka e ’ngoe ea litšupiso ea bafetoleli ba Bibele, e re polelo eo e ka bolela “ho iketsetsa kamoo ba ratang kateng” kapa “ho etsa kamoo ba bonang ho le molemo kateng.” Jehova ha a qobelle motho leha e le ofe hore a mo rapele. O re file bolokolohi—e leng bokhoni ba ho ikhethela hore na re batla ho phela joang.—Deuteronoma 30:19.

Jehova o batla hore re mo tsebe. Pauluse o ile a hlalosa hore ‘ha aa ka a itlohela ntle ho bopaki.’ Buka e boletsoeng pejana e bolela hore polelo ena e ka fetoleloa e le “o bontšitse batho ka ho hlaka hore na ke Molimo ea joang.” Lintho tseo Molimo a li bōpileng li fana ka bopaki bo hlakileng mabapi le “litšobotsi tsa hae tse sa bonahaleng,” tse akarelletsang molemo, bohlale, matla le lerato. (Baroma 1:20) Bibele e re senoletse lintho tse ngata ka Jehova. (2 Timothea 3:16, 17) Ho hlakile hore o batla hore re mo tsebe.

Jehova o batla hore re thabe. Pauluse o ile a re Molimo o “tlatsa lipelo tsa [rōna] ka ho phethahetseng ka lijo le ho hlasimoloha ho molemo.” Esita le moetsalibe ea sa reng letho ka Jehova a ka ja lijo ho fihlela a khotsofetse ’me a thabe. Leha ho le joalo, Molimo o batla hore re fumane thabo ea ’nete le e sa feleng. Re ka fumana thabo eo hafeela re ithuta ’nete ka eena ’me re sebelisa seo re ithutang sona bophelong ba rōna.—Pesaleme ea 144:15; Matheu 5:3.

Kaofela ha rōna re rua molemo linthong tse molemo tseo Jehova a re fang tsona letsatsi le letsatsi. Ke hobane’ng ha u sa ithute ho eketsehileng mabapi le kamoo u ka bontšang teboho ho Molimo ea ‘tlatsang pelo ea hao ka ho phethahetseng ka lijo le ho hlasimoloha ho molemo’?