Ke hōletse Warialda, toropong e nyenyane ea mapolasing a New South Wales. Batho ba Warialda ke lihoai tsa linku, tsa likhomo le tsa temo. Toropo eo e hloekile ebile ha e-na bonokoane bo bongata.

Kaha ke ne ke le letsibolo baneng ba leshome, ha ke le lilemo li 13 ke ile ka qala ho sebetsa e le hore ke hlokomele lelapa leso. Ke ile ka tlohela sekolo ’me ka sebetsa mapolasing. Ha ke le lilemo li 15, ke ne ke le molisa ke bile ke thapisa lipere.

Ho sebetsa mapolasing ho ne ho le monate empa ho boetse ho e-na le mathata. Ka lehlakoreng le leng, ke ne ke rata mosebetsi oa ka hammoho le tikoloho eo ke neng ke le ho eona. Ke ne ke lula mollong bosiu ebe ke sheba khoeli le sepakapaka se nang le linaleli ha monko o monate oa limela tsa naheng o ntse o tla le moea o pholileng oa mantsiboea. Ke ne ke ee ke nahane hore e tlameha ebe ho na le Motho ea bōpileng lintho tseo tsohle tse hlollang. Ka lehlakoreng le leng, ke ile ka ba har’a batho ba nang le tšusumetso e mpe. Ba ne ba rata litlhapa ’me ba rata ho tsuba haholo. Ho e-s’o ee kae le ’na ke ile ka tloaela ho tsuba le ho ba litlhapa.

Ha ke le lilemo li 18, ke ile ka fallela toropong ea Sydney. Ke ile ka leka ho kenela sesole empa ke ile ka haneloa kaha ke ne ke sa ruteha. Ke ile ka fumana mosebetsi eaba ke lula Sydney nako e ka etsang selemo. Ke nakong ena moo ke ileng ka kopana le Lipaki Tsa Jehova ka lekhetlo la pele. Ke ile ka lumela ha li ’memela ho se seng sa liboka tsa tsona ’me kapele ke ile ka hlokomela hore seo li neng li se ruta ke ’nete.

Leha ho le joalo, nakoana ka mor’a moo ke ile ka etsa qeto ea ho khutlela mapolasing. Ke ile ka qetella ke le toropong ea Goondiwindi e Queensland. Ke ile ka fumana mosebetsi, ka nyala ’me ka bomalimabe ka qala ho noa joala.

Re ile ra ba le bana ba babeli. Ka mor’a hore bara ba ka ba hlahe ke ile ka qala ho nahana ka botebo hore na ke phelela’ng.  Ke ile ka hopola seo ke ileng ka se utloa sebokeng sa Lipaki seo ke ileng ka ea ho sona ha ke le Sydney ’me ka etsa qeto ea ho nka bohato ka seo ke ileng ka se utloa.

Ke ile ka fumana makasine ea khale ea Molula-Qhooa e neng e e-na le aterese ea ofisi ea lekala ea Lipaki Tsa Jehova e Australia. Ke ile ka ngolla ofisi ea lekala ’me ka kōpa thuso. E ile ea nkaraba ka hore e nthomelle Paki e mosa le e lerato. Ntle le ho senya nako e ile ea ithuta Bibele le ’na.

Ha ke ntse ke ithuta Bibele, ke ile ka hlokomela hore ke hloka ho etsa liphetoho tse khōlō bophelong. Temana ea Bibele e ileng ka nkama maikutlo haholo ke 2 Bakorinthe 7:1. Temana eo e khothalletsa hore “re itlhatsoeng litšila tsohle tsa nama.”

Ke ile ka etsa qeto ea hore ke tla tlohela koae le ho noa haholo. Ho ne ho se bonolo ho etsa liphetoho tseo kaha e ne e se e le nako e telele ke phela ka tsela eo. Empa ke ne ke ikemiselitse ho phela ka tsela e thabisang Molimo. Se ileng sa nthusa haholo ke ho sebelisa molao-motheo o ho Baroma 12:2, o reng: “Le khaotse ho ba ka sebōpeho sa tsamaiso ena ea lintho, empa le fetohe ka ho fetola likelello tsa lōna.” Ke ile ka hlokomela hore e le hore ke etse liphetoho tsena ke ne ke lokela ho fetola tsela eo ke neng ke nahana ka eona ’me ke talime boitšoaro ba ka kamoo Molimo a neng a bo talima kateng—bo le kotsi. Ka thuso ea hae, ke ile ka khaotsa ho tsuba le ho noa haholo.

Leha ho le joalo, ntho e ileng ea e-ba thata ka ho fetisisa ho e tlohela ke litlhapa. Ke ne ke tseba keletso ea Bibele e tlalehiloeng ho Baefese 4:29, e reng: “Polelo e bolileng e se ke ea tsoa melomong ea lōna.” Ho ntse ho le joalo ha kea ka ka khona ho tlohela litlhapa hang-hang. Se ileng sa nthusa ke ho nahanisisa ka mantsoe a ho Esaia 40:26. Ha e bua ka maholimo a tletseng linaleli, temana eo e re: “Phahamisetsang mahlo holimo ’me le bone. Ke mang ea bōpileng lintho tsee? Ke Ea hlahisang lekhotla la tsona ka palo, e ’ngoe le e ’ngoe o e bitsa le ka lebitso. Ka lebaka la bonatla ba hae bo boholo, kaha o boetse o na le matla a maholo, ha ho le e ’ngoe ea tsona e haellang.” Ke ile ka hlokomela hore haeba Molimo o na le matla a ho bōpa bokahohle bo boholo hakaale—boo ke neng ke rata ho bo sheba—e tlameha ebe o na le matla a ho nthusa ho etsa liphetoho e le hore ke mo thabise. Ka ho rapela le ho ikitlaetsa, butle-butle ke ile ka khona ho laola leleme la ka.

Kaha ke ne ke le molisa, e ne e se kamehla ke buisanang le batho kaha ho ne ho e-na le batho ba ’maloa mapolasing moo ke neng ke sebetsa teng. Leha ho le joalo, koetliso eo ke ileng ka e fumana libokeng tsa Lipaki Tsa Jehova e ile ea nthusa hore re ke khone ho itlhalosa. Har’a lintho tse ling tseo koetliso eo e ileng ea nthusa ka tsona ke ho bua le batho ba bang ka litaba tse molemo tsa ’Muso oa Molimo.—Matheu 6:9, 10; 24:14.

Ke se ke e-na le lilemo tse ’maloa ke sebeletsa ke le moholo ka phuthehong. Ke ho nka e le tlotla ho etsa eng kapa eng eo nka e khonang ho thusa balumeli-’moho le ’na. Leha ho le joalo, ntho e nthabisang le ho feta ke ho sebeletsa Jehova ke e-na le mosali oa ka ea tšepahalang le ea lerato le bana ba rōna ba batle.

Ke leboha Jehova hore o ile a ntumella hore ke rutoe ke eena le hoja ke ne ke sa ruteha. (Esaia 54:13) Ke lumellana ka ho feletseng le mantsoe a ho Liproverbia 10:22, a reng: “Tlhohonolofatso ea Jehova—ea ruisa.” ’Na le ba lelapa la ka re labalabela ho ithuta ho eketsehileng ka Jehova le ho mo sebeletsa ka ho sa feleng.