Keletso ea Bibele e thusang banyalani hore e be ba thabileng e ea atleha hobane e tsoa ho Moqapi oa lenyalo, e leng Jehova Molimo. Bibele e re ruta hore re be le litšobotsi tse ntle tse etsang hore banyalani ba thabe ’me e re lemosa ka lintho tse ka qhalang lenyalo. E boetse e re ruta mekhoa e metle ea puisano e leng ho etsang hore banyalani ba thabe haholoanyane.—Bala Bakolose 3:8-10, 12-14.

Monna le mosali ba lokela ho hlomphana. Haeba ka bobeli ba phetha karolo eo Molimo a ba fileng eona lenyalong, ba ka thaba.—Bala Bakolose 3:18, 19.

Banyalani ba ka lula hammoho haeba ba ratana. Molimo o re ruta hore na re ka ratana joang. Eena le Mora oa hae, Jesu, ba re behela mohlala o phethahetseng oa lerato le nang le boitelo.—Bala 1 Johanne 4:7, 8, 19.

Ha monna le mosali ba hlompha lenyalo joalokaha e le tokisetso ea Molimo, ba tla lula hammoho. Molimo o thehile lenyalo hore e be kamano e sa feleng pakeng tsa monna le mosali e le hore malapa a ka ikutloa a sireletsehile. Lenyalo le ka tšoarella hobane Molimo o bōpile monna le mosali ka tsela eo ba ka khonang ho tlatsana hantle maikutlong le ’meleng. O boetse o ba bōpile ka setšoantšo sa hae, ba e-na le bokhoni ba ho etsisa lerato la hae.—Bala Genese 1:27; 2:18, 24.