Ke hōletse Santiago, motse-moholo oa Chile ’me moo ke neng ke lula teng, lihlopha tsa litlokotsebe, bonokoane le ho sebelisa lithethefatsi, e ne e le lintho tse tloaelehileng. Ha ke le lilemo li hlano, Ntate o ile a bolaoa. Ka mor’a moo, ’Mè o ile a lula le monna ea sehlōhō. O ne a atisa ho re otla, ’na le ’Mè. Ke sa ntse ke utloa bohloko ka lebaka la lintho tseo tse etsahetseng lilemong tseo tse fetileng.

Ha ke ntse ke hōla, ke ile ka ba mabifi haholo ka lebaka la maemo ao a mabe. Ke ne ke mamela ’mino oa rock o morethetho o boima, ke noa ho tlōla ’me ka linako tse ling ke sebelisa lithethefatsi. Ke ne ke atisa ho loana le bahoebi ba lithethefatsi ’me ba ile ba leka ho mpolaea ka makhetlo a mangata. Ka lekhetlo le leng, sehlopha se seng sa litlokotsebe se ile sa hira motho hore a mpolaee empa ka pholoha ke e-na le leqeba la thipa feela. Ka letsatsi le leng, banna ba bang ba hoebang ka lithethefatsi ba ile ba ntšupa ka sethunya hloohong ’me ba leka ho mphanyeha.

Ka 1996, ke ile ka ratana le mosali ea bitsoang Carolina ’me ra nyalana ka 1998. Ka mor’a hore mora oa rōna oa letsibolo a hlahe, ke ne ke nahana hore ke tla tšoana le monna ea neng a lula le ’Mè ka hore ke hlekefetse lelapa Ia ka, kaha ke ne ke le mabifi. Kahoo ke ile ka kōpa thuso setsing se thusang batho ho tlohela lintho tseo ba li lemaletseng. Lingaka li ile tsa leka ho nthusa empa ha kea ka tlohela mekhoa ea ka. Ke ne ke ntse ke halefisoa ke lintho tse sa reng letho; ke ne ke tsoile taolong. Ke ile ka leka ho ipolaea ke nahana hore ka ho etsa joalo nke ke ka hlola ke utloisa ba lelapa la ka bohloko. Ka lehlohonolo ke ile ka hlōleha ho ipolaea.

Ke ne ke qetile lilemo tse ngata ke sa lumele hore Molimo o teng, empa ke ne ke se ke batla ho lumela ho Molimo. Kahoo ke ile ka qala ho ea kerekeng. Ka nako eo, mosali oa ka o ne a ithuta Bibele le Lipaki Tsa Jehova. Ke ne ke hloile Lipaki ’me hangata ke ne ke li rohaka. Empa ha ho mohla li neng li iphetetsa, e leng seo ke neng ke sa se lebella.

Ka letsatsi le leng, Carolina o ile a kōpa hore ke bale Pesaleme ea 83:18 Bibeleng ea ka. Temana eo e bontša ka ho hlaka hore lebitso la Molimo ke Jehova. Ke ile ka makatsoa ke hore  bolumeling ba ka ke ne ke ithutile ka molimo, empa eseng ka Jehova. Mathoasong a 2000, le ’na ke ile ka qala ho ithuta Bibele le Lipaki.

Ha ke ntse ke tsoela pele ho ithuta, ke ile ka tšeliseha ha ke utloa hore Jehova ke Molimo ea nang le kutloelo-bohloko le ea tšoarelang. Ka mohlala, ho Exoda 34:6, 7, Bibele e re Jehova ke “Molimo ea mohau le ea mosa, ea liehang ho halefa le ea tletseng mosa o lerato le ’nete, ea bolokelang ba likete mosa o lerato, ea tšoarelang phoso le tlōlo le sebe.”

Leha ho le joalo, ho ne ho se bonolo ho sebelisa seo ke ithutang sona. Ke ne ke kholisehile hore nke ke ka hlola ke khona ho laola bohale ba ka. Lekhetlo le leng le le leng ha ke hlōleha, ka lerato Carolina o ne a nkhothatsa. O ile a nkhopotsa hore Jehova o hlokomela boiteko boo ke bo etsang. Tšehetso ea hae e ile ea mpha matla a ho tsoela pele ke leka ho khahlisa Jehova, le hoja hangata ke ne ke ikutloa eka ke ba-e-hlōtse.

Ka letsatsi le leng, Alejandro e leng motho ea neng a ithuta le ’na o ile a nkōpa hore ke bale Bagalata 5:22, 23. Litemana tseo li re litšobotsi tsa tholoana ea moea oa Molimo ke “lerato, thabo, khotso, tiisetso, mosa, molemo, tumelo, bonolo, boitšoaro.” Alejandro o ile a hlalosa hore e le hore ke be le litšobotsi tseo ke lokela ho itšetleha ka moea o halalelang oa Molimo, eseng ka matla a ka. Seo se ile sa fetola tsela eo ke neng ke ikutloa ka eona ka ho feletseng!

Hamorao ke ile ka ea kopanong e khōlō ea Lipaki Tsa Jehova. Ha ke bona tsela e laolehileng eo lintho li neng li etsoa ka eona, bohloeki le kamoo batho ba neng ba e-na le botsoalle kateng, ke ile ka kholiseha hore ke fumane bolumeli ba ’nete. (Johanne 13:34, 35) Ke ile ka kolobetsoa ka February 2001.

Jehova o fetotse bophelo ba ka, ha ke sa le motho ea mabifi empa ke se ke le motho oa khotso. Ke ikutloa eka o nqaollotse seretseng. Batho ba bangata ba ne ba ntlhoile ’me ha ke ba tšoae phoso. Leha ho le joalo, hona joale ke thabela ho sebeletsa Jehova ka khotso hammoho le mosali oa ka le bara ba ka ba babeli.

Beng ka ’na le metsoalle ea ka ea nakong e fetileng ha ba kholoe kamoo ke entseng liphetoho kateng ’me seo se entse hore boholo ba bona ba batle ho ithuta linnete tsa Bibele. Ke boetse ke bile le tokelo ea ho thusa ba bang ho tseba Jehova. Ho thabisa hakaakang ho ba bona ba fetoha ka lebaka la ’nete ea Bibele!