Ha ke sa le monyenyane, lelapa leso le ne le lula haufi le Leipzig, Jeremane Bochabela, haufi le moeli oa Czech le oa Poland. Ha ke le lilemo li tšeletseng, lelapa leso le ile la fallela Brazil ka lebaka la mosebetsi oa ntate ’me ka mor’a moo la fallela Ecuador.

Ha ke le lilemo li 14, ke ile ka isoa sekolong Jeremane. Kaha batsoali ba ka ba ne ba le hōle Amerika Boroa, ke ile ka tlameha ho itlhokomela. Ke ile ka tlala moea oa boitaolo. Ke ne ke sa nahane haholo ka hore na liketso tsa ka li ama batho ba bang joang.

Ha ke le lilemo li 17 batsoali ba ka ba ile ba khutlela Jeremane. Ke ne ke lula le bona lapeng. Empa moea oa ka oa boitaolo o ile oa nthatafalletsa ho phela tlas’a taolo ea bona. Ha ke le lilemo li 18, ke ile ka tloha lapeng.

Ke ile ka felloa ke thabo ’me ka batla hore na morero oa ho phela ke ofe. Ka mor’a ho shebella lihlopha tse itseng tsa batho le mekhoa e fapa-fapaneng ea bophelo, ke ile ka kholiseha hore ntho e molemo eo nka e etsang ka bophelo ba ka ke hore ke hahlaule le polanete ena e ntle pele batho ba e felisa.

Ke ile ka reka sethuthuthu eaba ke tloha Jeremane ’me ka leba Afrika. Leha ho le joalo, ke ile ka tlameha ho khutlela Europe ka potlako e le hore ke e’o lokisa sethuthuthu sa ka. Letsatsi feela ka mor’a moo ke ile ka iphumana ke le lebōpong la Portugal. Ke ile ka etsa qeto ea hore ke se ke tla tsamaea ka seketsoana eseng sethuthuthu.

Ke ile ka ikopanya le sehlopha sa bacha ba neng ba itokisetsa ho tšela Leoatle la Atlantic. Sehlopheng sena ke ile ka kopana le Laurie, eo e ileng ea e-ba mosali oa ka. Re ile ra tsamaea ka sekepe ra ea lihlekehlekeng tsa Caribbean. Joale, ka mor’a ho lula Puerto Rico ka nakoana, ra khutlela Europe. ’Na le Laurie re ile ra nahana ho reka seketsoana sa liseile ebe re se fetola sebaka sa bolulo. Empa ka mor’a ho batla hakhutšoanyane ka likhoeli tse tharo, re ile ra thulana le bothata boo re neng re sa bo lebella. Ke ile ka qobelloa ho kena sesoleng sa Jeremane.

Ke ile ka sebetsa likhoeli tse 15 sesoleng sa metsing sa Jeremane. Nakong eo, ’na le Laurie re ile ra nyalana ’me ra etsa qeto ea ho tsoela pele ka bophelo ba ho hahlaula. Nakoana pele ke qobelloa ho ea sesoleng, re ne re rekile seketsoana ’me  ha ke ntse ke sebetsa sesoleng, re ile ra se ntlafatsa. Re ne re rerile ho lula ho sona ha re ntse re ithuta polanete ena e ntle. Ka mor’a hore ke tlohele sesole, pele re qeta ho ntlafatsa seketsoana seo, Lipaki Tsa Jehova li ile tsa re etela ’me ra qala ho ithuta Bibele.

Pele ke ne ke sa bone ho hlokahala hore ke fetole bophelo ba ka. Ke ile ka nyala Laurie eo ke neng ke se ke ntse ke lula le eena ’me ka khaotsa ho tsuba. (Baefese 5:5) Mabapi le litokisetso tsa rōna tsa ho hahlaula le lefatše, ke ne ke nahana hore ho itella ho sheba pōpo e hlollang ea Molimo ke boikemisetso ba bohlokoa haholo.

Leha ho le joalo, ho ne ho hlile ho hlokahala hore ke fetole botho ba ka. Kaha ke ne ke ikhohomosa ho tlōla ke bile ke itaola, ke ne ke nkehile ka ho feletseng ka bokhoni ba ka le ka lintho tseo ke li finyellang. Ke ne ke iphelela.

Ka letsatsi le leng ke ile ka bala Thuto ea Jesu e tsebahalang ea Thabeng. (Matheu, khaolo 5-7) Qalong ke ne ke sa utloisise seo Jesu a neng a se bua mabapi le ho thaba. Ka mohlala, o itse ho thaba batho ba lapileng le ba nyoriloeng. (Matheu 5:6) Ke ne ke ipotsa hore na motho a ka thaba joang empa a futsanehile. Ha ke ntse ke tsoela pele ho ithuta, ke ile ka hlokomela hore bohle re hloka ho ba le kamano le Molimo le hore ka boikokobetso re tlameha ho lumela hore rea e hloka pele re ka ba le eona. Ho joalokaha Jesu a itse: “Ho thaba ba elang hloko tlhoko ea bona ea moea.”—Matheu 5:3.

Ka mor’a hore re qale ho ithuta Bibele Jeremane, ’na le Laurie re ile ra fallela Fora, ’me hamorao ra ea Italy. Hohle moo re neng re e-ea teng re ne re fumana Lipaki Tsa Jehova. Ke ile ka khahloa haholo ke ho ratana ha tsona le bonngoe ba tsona. Ke ile ka bona hore Lipaki ke mokhatlo oa lefatše lohle oa bara ba motho. (Johanne 13:34, 35) Ka mor’a nako, ’na le Laurie re ile ra kolobetsoa ’me ra ba Lipaki Tsa Jehova.

Ha re se re kolobelitsoe, ke ile ka tsoela pele ho ntlafatsa botho ba ka. ’Na le Laurie re ile ra etsa qeto ea ho tsamaea ka seketsoana re ikhohlile ka lebōpo la Afrika, ebe re haola le Leoatle la Atlantic ho ea fihla United States. Ha re le hare-hare leoatleng—re le babeli feela ka seketsoaneng se pota-potiloeng ke metsi—ke hona moo ke ileng ka hlokomela hore ha ke letho ha ke bapisoa le ’Mōpi oa rōna ea hlollang. Kaha ke ne ke e-na le nako e ngata hobane ho se letho leo ke le etsang leoatleng moo, ke ile ka qeta boholo ba nako eo ke bala Bibele. Ke ne ke khahloa haholo ke litlaleho tsa bophelo ba Jesu ha a ne a le lefatšeng. E ne e le motho ea phethahetseng ea nang le bokhoni bo fetang ba mang kapa mang, empa ho ne ho se mohla a batlang hore batho ba mo nkele holimo. O ne a sa iphahamise empa o ne a phahamisa Ntate oa hae ea leholimong.

Ha ke ntse ke thuisa ka mohlala oa Jesu, ke ile ka bona hore hoa hlokahala hore ke etelletse ’Muso oa Molimo pele bophelong ba ka ho e-na le hore ke nahane ka oona ka mor’a lintho tseo ke batlang ho li etsa. (Matheu 6:33) Ha re fihla United States, re ile ra etsa qeto ea hore re tlohele ho hahlaula le lefatše, re lule moo ’me re nke borapeli ba rōna ka botebo.

Nakong e fetileng ha ke ne ke iphelela, ke ne ke sa itsebe hantle. Leha ho le joalo, hona joale ke fumane mohloli oa bohlale bo sa foseng bo ntataisang. (Esaia 48:17, 18) Ke boetse ke na le morero oo ke neng ke se na oona bophelong—e leng ho rapela Molimo le ho thusa batho ba bang ho ithuta ka eena.

’Na le Laurie re matlafalitse lenyalo la rōna haholo ka ho sebelisa melao-motheo ea Bibele. Re boetse re hlohonolofalitsoe ka morali e motle, ea tsebang Jehova le ea mo ratang.

Sena ha se bolele hore ha re sa na mathata bophelong. Empa ka thuso ea Jehova, re ikemiselitse ho tsoela pele re mo sebeletsa le ho mo tšepa.—Liproverbia 3:5, 6.