MORAO tjena mofuputsi e mong o ile a botsa bacha ba ka holimo ho 800 ba kenang likereke tse fapaneng hore na ba nahana hore Jesu o araba lithapelo. Ba fetang 60 ho ba bang le ba bang ba 100 ba ile ba re baa lumela hore oa li araba. Leha ho le joalo, mocha e mong o ile a hlakola lebitso la Jesu potsong ea mofuputsi ’me a ngola “Molimo.”

U re’ng ka taba ee? Na re lokela ho rapela Molimo kapa Jesu? * E le hore re fumane karabo, a re tšohleng tsela eo Jesu a ileng a ruta balateli ba hae ho rapela ka eona.

Jesu o ile a re ruta a ba a re bontša hore na re lokela ho rapela mang.

SEO A NENG A SE RUTA: Ha e mong oa barutuoa ba Jesu a mo kōpa a re, “Morena, re rute ho rapela,” o ile a araba a re: “Neng kapa neng ha le rapela, le re, ‘Ntate.’” (Luka 11:1, 2) Ho phaella moo, ha Jesu a ruta Thutong ea Thabeng o ile a phehella bamameli ba hae ho rapela ’me a re: “U rapele Ntat’ao.” O ile a boela a ba tiisetsa a re: “Ntat’a lōna oa tseba hore na ke lintho life tseo le li hlokang le pele le mo kōpa.” (Matheu 6:6, 8) Bosiung ba ho qetela Jesu a le lefatšeng, o ile a re ho barutuoa ba hae: “Haeba le kōpa Ntate ntho leha e le efe o tla le fa eona ka lebitso la ka.” (Johanne 16:23) Kahoo, Jesu o ile a re ruta ho rapela Jehova Molimo e leng Ntate oa hae.—Johanne 20:17.

MOHLALA OA HAE: Jesu o ile a rapela tumellanong le seo a se rutileng ba bang a re: “Ke u rorisa phatlalatsa, Ntate, Morena oa leholimo le lefatše.” (Luka 10:21) Ketsahalong e ’ngoe, ‘Jesu o ile a lelaletsa mahlo nģ’a leholimong ’me a re: “Ntate, kea u leboha ka hore ebe u nkutloile.”’(Johanne 11:41) Ha Jesu a e-shoa o ile a rapela a re: “Ntate, ke beha moea oa ka matsohong a hao.” (Luka 23:46) Ha Jesu a rapela Ntate oa hae ea leholimong e leng “Morena oa leholimo le lefatše,” o behile mohlala oo bohle re ka o latelang. (Matheu 11:25; 26:41, 42; 1 Johanne 2:6) Na eo ke tsela eo barutuoa ba Jesu ba pele ba neng ba utloisisa litaelo tsa hae ka eona?

Libeke tse seng kae ka mor’a hore Jesu a khutlele leholimong, barutuoa ba hae ba ile ba hlekefetsoa le ho tšosoa ke bahanyetsi ba bona. (Liketso 4:18) Ntle ho pelaelo ba ile ba rapela, empa ba rapela mang? ‘Ba ile ba phahamisetsa mantsoe a bona ho Molimo,’ ba rapella hore a ’ne a ba thuse “ka lebitso la mohlanka oa [hae] ea halalelang Jesu.” (Liketso 4:24, 30) Ka hona, barutuoa ba ile ba latela tataiso ea Jesu e mabapi le thapelo. Ba ile ba rapela Molimo, eseng Jesu.

Lilemo hamorao, moapostola Pauluse o ile a hlalosa tsela eo eena le bo-mphato oa hae ba neng ba rapela ka eona. Ha a ngolla Bakreste-’moho le eena o ile a re: “Re leboha Molimo Ntate oa Morena oa rōna Jesu Kreste kamehla ha re le rapella.” (Bakolose 1:3) Pauluse o ile a boela a ngolla balumeli-’moho le eena hore ‘ka lebitso la Morena . . . Jesu Kreste ba fane ka liteboho kamehla bakeng  sa lintho tsohle ho Molimo.’ (Baefese 5:20) Mantsoeng ana re ithuta hore Pauluse o ne a khothalletsa ba bang ho rapela “Molimo le Ntate oa rōna” ba sebelisa lebitso la Jesu.—Bakolose 3:17.

Joaloka Bakreste bao ba pele, re ka bontša hore re rata Jesu ka ho mamela keletso ea hae e mabapi le tsela eo re lokelang ho rapela ka eona. (Johanne 14:15) Ha re rapela Ntate oa rōna ea leholimong, ’me re rapela eena feela, re tla lumellana le mantsoe a ho Pesaleme ea 116:1, 2 a reng: “Kea rata, hobane Jehova o utloa lentsoe la ka . . . ke tla hooa ka matsatsi ’ohle a ka.” *