Ke hlahetse Paddington e leng motse o nang le baahi ba bangata o London, England. Ke ne ke lula le ’Mè le bo-ausi ba ka ba bararo. Ntate o ne a sa lule le rona ka nako tsohle kaha o ne a noa joala haholo.

Ha ke sa le ngoana, ’Mè o ile a nthuta hore ke rapele pele ke robala. Ke ne ke e-na le Bibele e nang le Lipesaleme feela, ’me ke ne ke rata ho li bina. Ka letsatsi le leng ha ke ntse ke bala e ’ngoe ea libuka tsa ka, ke ile ka bala moo ho thoeng: “Bophelo bo bokhutšoane.” Ka mor’a ho bala buka eo ke ile ka qeta bosiu bohle ke sa robale, ke ntse ke nahana ka taba ena. Ke ile ka qala ho nahana hore e tlameha ebe bophelo bo na le morero ’me ka ipotsa: ‘Haeba ha ho joalo, ke hobane’ng ha ke phela?’ Ke ne ke sa batle ho shoa!

Ke ile ka ba le thahasello litabeng tse amanang le boloi kapa bonohe. Kahoo, ka qala ho leka ho buisana le bafu ’me ka shebella li-movie tse tšosang le metsoalle ea ka. Le hoja li ne li re tšosa, re ne re li rata ho ntse ho le joalo.

Ke ile ka qala ho itaola ha ke le lilemo li leshome feela. Ka qala ho tsuba koae ’me ka utloa ho se ho le thata ho e tlohela. Hamorao, ka tsuba matekoane. Ha ke le lilemo li 11 ke ile ka qala ho noa joala. Le hoja bo ne bo le bobe, ke ne ke utloa ho le monate ha ke tahiloe. Ke ne ke boetse ke rata ’mino, ho jaefa, ho ea liphathing le lithaveneng. Ke ne ke tloaetse ho baleha hae bosiu ebe ke khutla esale hoseng haholo. Ka letsatsi le hlahlamang ke ne ke tsoha ke khathetse ebe ke docha ho ea sekolong. Ha ke ne ke ea sekolong, ke ne ke noa joala nakong eo re chenchang litlelase.

Ha ke etsa meteriki ke ile ka pasetsa tlaase. ’Mè o ile a utloa bohloko haholo kaha o ne a sa tsebe hore ke ntse ke etsa lintho tse mpe. Re ile ra ngangisana ’me ka mor’a moo ka baleha lapeng. Eaba ke il’o lula le mohlankana oa ka oa lerasta, eo lebitso la hae e leng Tony. O ne a utsoa, a rekisa lithethefatsi ebile a le bohale bo tšosang. Ka mor’a nako e seng kae, ke ile ka ima ’me mora oa rona a hlaha ha ke le lilemo li 16.

Ke ile ka kopana le Lipaki Tsa Jehova ka lekhetlo la pele nakong eo ke neng ke lula hosteleng eo ho eona ho neng ho lula bo-’mè ba sa nyaloang le bana ba bona. Ke ne ke fuoe tumello ea ho lula mona ke ’masepala. Bo-’mè ba babeli ba Lipaki ba ne ba tloaetse ho chakela basali ba bang hosteleng. Ka tsatsi le leng ke ile ka lula le bona ’me ka mamela puisano ea bona. Ha e le hantle, ke ne ke batla ho bontša bo-’mè bana hore lithuto tsa bona li fosahetse. Leha ho le joalo, ba ile ba araba lipotso tsa ka ka tsela e bonolo, ba sebelisa Bibele. Ke ile ka khahloa ke tsela eo ba neng ba le mosa kateng. Ka lebaka leo, ke ile ka lumela ho ithuta Bibele le bona.

Ke ile ka ithuta ntho e itseng Bibeleng e ileng ea fetola bophelo ba ka. Ho tloha ha ke sa le ngoana, ke ne ke tšaba ho shoa. Empa ke ile ka ithuta hore Jesu o ile a re bafu ba tla tsoha! (Johanne 5:28, 29) Ka boela ka hlokomela hore Molimo oa nkhathalla. (1 Petrose 5:7) Lengolo la Jeremia 29:11 le ile la nkama maikutlo haholo, kaha moo Molimo o re: “‘Etsoe ke tseba hantle menahano eo ke e nahanang ka lōna,’ ho bolela Jehova, ‘menahano ea khotso, eseng ea tlokotsi, ho le fa bokamoso le tšepo.’” Ke ile ka ba le tšepo ea ho phela ka ho sa feleng lefatšeng le lecha la Paradeise.—Pesaleme ea 37:29.

Lipaki Tsa Jehova li ile tsa mpontša hore lia nthata. Ha ke qala ho ea libokeng tsa tsona, li ne li nthabetse, li le botsoalle ’me ho le monate! (Johanne 13:34, 35) Sena se ne se fapane hole haholo le se neng se etsahala kerekeng ea ka. Lipaki li ile tsa nkamohela ho sa tsotellehe maemo a ka. Li ile tsa buisana le ’na ’me tsa mpha thuso eo ke neng ke e hloka. Ke ile ka utloa ke le karolo ea lelapa le leholo la batho ba ratanang.

Ha ke ntse ke ithuta Bibele, ke ile ka bona hore ke lokela ho fetola boitšoaro ba ka e le hore ke phele ka tsela eo Molimo a e batlang. Ho ne ho le thata ho tlohela ho tsuba. ’Mino oo ke neng ke o mamela o ne o etsa hore ke lakatse ho tsuba matekoane, kahoo ke ile ka tlohela ho o mamela. Kaha ke ne ke se ke batla ho lula ke hlaphohetsoe, ke ile ka tlohela ho ea liphathing le lithaveneng. Eaba ke batla metsoalle e mecha, e neng e tla nthusa ho etsa lintho tse molemo.—Liproverbia 13:20.

Ka nako eo, Tony le eena o ne a se a qalile ho ithuta Bibele le Lipaki Tsa Jehova. Kaha Lipaki li ile tsa araba lipotso tsa hae ka tsela e khotsofatsang, o ile a qala ho lumela hore seo a ithutang sona ke ’nete. Kahoo, a fetola tsela eo a neng a phela ka eona, eaba o tlohela ho rata ntoa, ho utsoa hammoho le ho tsuba matekoane. Kaha re ne re batla ho khahlisa Jehova, re ile ra bona ho hlokahala hore re tlohele boitšoaro bo bobe ’me re holise ngoana oa rona ka tsela e molemo. ’Na le Tony re ile ra nyalana ka 1982.

Ke hopola ke bala mehlala e hlahang limakasineng tsa Molula-Qhooa le Tsoha! * ea batho ba ileng ba khona ho etsa liphetoho tse kholo bophelong ba bona. Ke ne ke khalla ho tšoana le bona! Ke ile ka utloa ke khothetse haholo, ’me ke ne batla ho tsoela pele ke leka. Ke ne ke lula ke kopa Jehova hore a se ke a mphella pelo. ’Na le Tony re ile ra kolobetsoa ka July 1982 ’me ra ba Lipaki Tsa Jehova.

Ho ba motsoalle oa Jehova ho pholositse bophelo ba ka. ’Na le Tony re ile ra hlokomela kamoo Jehova a ’nileng a re tšehetsa kateng linakong tse boima. Re ithutile ho tšepa Jehova haholoanyane maemong a boima ’me re kholisehile hore kamehla o tla lula a re thusa.—Pesaleme ea 55:22.

Ke ile ka thabela ho thusa bana ba rona hore le bona ba tsebe Jehova. Joale ke thaba le ho feta ha ke bona hore le bona ba rutile bana ba bona ka Jehova.

Ha ke sa tsamaea ke ntse ke tsoha har’a bosiu ke tšoenyeha ka bokamoso kapa ka ho shoa. Hona joale, ’na le Tony re se re etsa mosebetsi oa ho etela liphutheho tsa Lipaki Tsa Jehova beke le beke ho ea li khothatsa. Re ruta batho hore haeba ba lumela ho Jesu, ba ka fumana bophelo bo sa feleng!