Ngoananyana e mong ea lilemo li ’nè o ile a bona mosi o nyolohela holimo o tsoa femeng e itseng ’me o e-ba joaloka maru. O ile a etsa qeto ea hore feme eo ke eona e etsang maru. Sena se ka utloahala se qabola e le kannete. Leha ho le joalo, ho ka ba kotsi haeba re sa utloisise lintho tse ling bophelong. Ka mohlala, haeba motho a ne a ka noa moriana empa a sa utloisise litaelo tse ngotsoeng botlolong ea ’ona, o ne a ka ’na a kula.

Ho ka ba kotsi le ho feta haeba re sa utloisise seo Molimo a se hlokang ho rona. Ka mohlala, batho ba bang ba ne ba sa utloisise lithuto tsa Jesu. (Johanne 6:48-68) Ho e-na le hore ba batle ho utloisisa seo Jesu a neng a se ruta, ba ile hana ho mo mamela. Ebile tahlehelo e kakaang!

Na u lumella Bibele hore e u tataise? Haeba u etsa joalo, rea u babatsa. Na ho ee ho etsahale hore ha u ntse u e bala, ebe ha u utloisise seo u se balang? Seo se etsahalla batho ba bangata. Hlokomela mehlala e meraro ea lintho tse ling tseo batho ba sa li utloisiseng ha ba bala Bibele.

• Batho ba bang ha ba utloisise mantsoe a Bibele a reng, “tšaba Molimo oa ’nete.” Ba nahana ka Molimo ea tšosang ea lokelang ho tšajoa le ho thothomelloa. (Moeklesia 12:13) Empa Molimo ha a batle hore batho ba ikutloe joalo. O re: “U se ke ua tšoha, kaha ke na le uena. U se ke ua talima koana le koana, etsoe ke ’na Molimo oa hao. Ke tla u matlafatsa. Ka sebele ke tla u thusa.” (Esaia 41:10) Ha e le hantle, ho tšaba Molimo ho bolela hore re lokela ho mo hlompha ka tsela e tebileng.

• Batho ba bang bona ha ba utloisise mantsoe ana: “Ho na le nako e behiloeng bakeng sa ntho e ’ngoe le e ’ngoe, . . . nako ea tsoalo le nako ea ho shoa.” Ba nka hore Molimo o behetse e mong le e mong nako ea ho shoa. (Moeklesia 3:1, 2) Ha e le hantle, mantsoe ana a bolela hore hona joale ha ho na motho ea ka phelang ka ho sa feleng. Lentsoe la Molimo le boetse le ruta hore liqeto tseo re li etsang li ka ama bolelele ba matsatsi a rona a bophelo. Ka mohlala, Bibele e re: “Ho tšaba Jehova ho tla eketsa matsatsi.” (Liproverbia 10:27; Pesaleme ea 90:10; Esaia 55:3) Seo ke ’nete hakae? Ka mohlala, ho hlompha Lentsoe la Molimo ho tla etsa hore re qobe mekhoa e mebe, e joaloka boitsoaro bo bobe ba ho etsa thobalano le botahoa.—1 Bakorinthe 6:9, 10.

• Ba bang bona ba nka hore ha Bibele e re maholimo le lefatše tse teng hona joale li “boloketsoe mollo,” sena se tla etsahala ka tsela ea sebele, kahoo ba lumela hore Molimo o tl’o felisa polanete ea lefatše. (2 Petrose 3:7) Empa Molimo o tšepisa hore le ka mohla a ke ke a felisa polanete ena. Molimo “o thehile lefatše holim’a libaka tsa lona tse tiisitsoeng; le ke ke la sisinngoa ho isa nakong e sa lekanyetsoang, kapa ka ho sa feleng.” (Pesaleme ea 104:5; Esaia 45:18) Empa o tla felisa batho ba khopo ba sa mameleng, joalokaha eka ke ka mollo e seng hore o tla felisa polanete ena. Bibele e sebelisa lentsoe maholimo, ha e bua ka bokahohle kapa sebaka sa Molimo sa bolulo. Ha ho le e le ’ngoe ea lintho tsena e tla felisoa.

Joalokaha u bone mehlaleng e ka holimo, batho ba bangata ha ba utloisise seo ba se balang Bibeleng. Empa ke hobane’ng ha Molimo a ka lumella seo? Batho ba bang ba re: ‘Haeba Molimo o tseba lintho tsohle ebile o bohlale, a ka be a re file buka e bonolo eo bohle ba ka e utloisisang habonolo. Ke hobane’ng ha Bibele e se joalo?’ Hlokomela mabaka a mararo a etsang hore batho ba se ke ba utloisisa Bibele.

1. Bibele e ka utloisisoa feela ke batho ba ikokobelitseng le ba batlang ho ithuta. Jesu o ile a  re ho Ntate oa hae : “Ke u rorisa phatlalatsa, Ntate, Morena oa leholimo le lefatše, hobane ka hloko u patetse ba bohlale le ba nang le kelello lintho tsena, ’me u li senoletse bana.” (Luka 10:21) Bibele e ngotsoe ka morero oa hore e tsoele batho ba ikemiselitseng ho ithuta eona molemo. Batho ba ikhohomosang le ba inkang eka “ba bohlale”, ba ke ke ba utloisisa Bibele. Empa ke ba nang le boikutlo bo joaloka ba “bana”, ba ikokobelitseng ’me ba ikemiselitse ho ithuta, ba ka khonang ho utloisisa molaetsa oa Lentsoe la Molimo. Kannete Molimo o ngotse Bibele ka tsela hlollang!

2. Bibele e ngoletsoe batho ba batlang thuso ea Molimo e le kannete. Jesu o ile a bontša hore e le hore batho ba utloisise seo a neng a se ruta, ba ne ba tla hloka ho thusoa. Empa ba ne ba tla thusoa ka tsela efe? Jesu o ile a re: “Mothusi, moea o halalelang, oo Ntate a tla o romela ka lebitso la ka, o tla le ruta lintho tsohle.” (Johanne 14:26) Kahoo, Molimo o fana ka moea o halaleng, e leng matla a hae a sebetsang, ho thusa batho hore ba utloisise Bibele. Empa Molimo o tima ba ikhohomosang moea oa hae, ’me seo se etsa hore ba se ke ba utloisisa Bibele. Moea o halalelang o boetse o etsa hore Bakreste ba tsebe ho thusa ba batlang ho ithuta Bibele e le kannete.—Liketso 8:26-35.

3. Mangolo a mang a Bibele a tla hlaka ka nako e nepahetseng. Ka mohlala, moprofeta Daniele o ile a bululeloa hore a ngole molaetsa o buang ka bokamoso. Lengeloi le ile la re ho eena: “Daniele, etsa hore mantsoe ana e be sephiri ’me u tiise buka, ho fihlela nakong ea bofelo.” Batho ba bangata ba ’nile ba qeta lilemo tse makholo ba ntse ba bala lengolo lena la Daniele empa ba sa le utloisise. Esita le Daniele ka boeena o ne a sa utloisise tse ling tsa lintho tseo a neng a li ngola. Ka boikokobetso o ile a re: “Ke ile ka utloa, empa ha kea ka ka utloisisa.” Ka tsatsi le leng, re tla utloisisa ka ho feletseng boprofeta boo Molimo a ileng a susumetsa Daniele hore a bo ngole, empa seo se tla etsahala ka nako eo Molimo a e behileng. Lengeloi le ile la re: “Tsamaea, Daniele, hobane mantsoe ao a entsoe sephiri ’me a tiisitsoe ho fihlela nakong ea bofelo.” Ke mang ea neng a tla utloisisa molaetsa oo oa Molimo? Daniele o ile a re: “Ho hang ha ho ba khopo ba tla utloisisa; empa ba nang le temohisiso ba tla utloisisa.” (Daniele 12:4, 8-10) Kahoo Molimo ha a senole se boleloang ke Mangolo a mang ho fihlela ka nako ea hae e nepahetseng.

Nakong e fetileng Lipaki Tsa Jehova le tsona li ne li sa utloisise hantle lintho tse itseng tse ka Bibeleng. Empa ha nako e ntse e ea, Molimo o ile a etsa hore li utloisise ka tsela e hlakileng se boleloang ka Bibeleng ’me ha seo se etsahala, li ile tsa fetola tsela eo li neng li utloisisa Bibele ka eona ntle le ho qeaqea. Li ile tsa lumela hore ka ho etsa joalo li etsisa barutuoa ba Kreste, ba ileng ba ikokobetsa ’me ba fetola tsela ea bona ea ho nahana ha Jesu a ba hlalosetsa lintho hantle.—Liketso 1:6, 7.

Ho se utloisise ha ngoananyana eane eo re buileng ka eena qalong hore na maru a tsoa hokae, ha se ntho e mpe. Leha ho le joalo, ke habohlokoa hore u utloisise seo Bibele e se rutang. Ha se kamehla ho ka bang bonolo hore motho a utloisise Bibele ka ho ipalla eona feela a le mong. Kahoo, kopa thuso e le hore u utloisise seo u se balang. Ikopanye le batho ba nang le boikutlo bo nepahetseng ka Bibele, ba tšepang moea o halalelang oa Molimo hore o ba thuse ho e utloisisa. U se ke oa qeaqea ho buisana le Lipaki Tsa Jehova kapa ho bala lingoloa tsa bona tse ngotsoeng ka tsela e nepahetseng, tse fumanehang websaeteng ho jw.org/st. Bibele e u tšepisa hore: “Haeba u hoeletsa kutloisiso . . .  u tla fumana tsebo ea Molimo.”—Liproverbia 2:3-5.