Che. Lipaki Tsa Jehova li lumela hore Molimo o bōpile lintho tsohle. Empa ha re lumele hore o li bōpile ka matsatsi a tšeletseng a sebele. Hobane’ng? Hobane lintho tse ling tseo batho ba tšehetsang thuto ena ba li lumelang li hanana le Bibele. Hlokomela mehlala e ’meli e latelang:

1. Bolelele ba matsatsi a tšeletseng a pōpo. Batho ba bang ba tšehetsang thuto ena ba lumela hore matsatsi a tšeletseng a pōpo ke a lihora tse 24. Empa ka Bibeleng lentsoe “letsatsi” le ka bolela nako e telele.​—Genese 2:4; Pesaleme ea 90:4.

2. Nako eo lefatše le bileng teng ka eona. Batho ba bang ba lumelang hore lintho li bōpiloe ka matsatsi a tšeletseng, ba ruta hore lefatše le bile teng ka lilemo tse likete tse seng kae feela. Empa Bibele e re lefatše le bokahohle, li ne li se ntse li le teng le pele ho matsatsi a tšeletseng a pōpo. (Genese 1:1) Kahoo, Lipaki Tsa Jehova ha li hanyetse bafuputsi ba saense ba ka tšeptjoang ha ba re e ka ’na eaba ho se ho fetile lilemo tse libilione lefatše le le teng.

Le hoja Lipaki Tsa Jehova li lumela hore lintho li bōpiloe, ha re khahlanong le saense. Re lumela hore saense le Bibele lia lumellana.