Lilemo tse ka holimo ho tse 40 tse fetileng, haesale baahi ba New York City ba bona mongolo o mofubelu bosiu le motšehare, o bolelele ba limithara tse 4,6 o ka holim’a ntlo-khōlō ea Lipaki Tsa Jehova, oo baahi ba bangata ba shebang nako le thempereichara ho ’ona.

Eboni o bona letšoao lena a le foleteng ea hae e Brooklyn, o re: “Ho monate ho hlaha ka fensetere ebe ke bona nako le thempereichara pele ke e-ea mosebetsing. Le nthusa hore ke tšoare nako le ho apara ka tsela e lumellanang le boemo ba leholimo.”

Na tla ’ne le bontše nako le thempereichara ka lilemo tse ling tse 40? Ha ho bonahale joalo. Kaha ntlo-khōlō ea Lipaki Tsa Jehova e tla fallela karolong e ka leboea ea New York, qeto eo e tla sallana le beng ba mohaho ba bacha.

Letšoao lena le ile la kenngoa lilemong tse ka holimo ho 70 tse fetileng, ke motho eo pele mohaho ona e neng e le oa hae. Ka mor’a ho reka mohaho ona ka 1969 Lipaki Tsa Jehova li ile tsa fetola letšoao lena hore le be ka tsela eo le leng ka eona kajeno.

Letšoao lena le hloka ho lokisoa khafetsa. Ho theosa le lilemo, bahlankana ba fapa-fapaneng ba ’nile ba hlokomela letšoao lena, ba le lokisa ka nako leha e le efe.

Mor’abo rōna e mong ea neng a sebetsa bosiu o re: “Mantsiboeeng a mang re ile ra founeloa ke motsamaisi oa litaba tsa thelevishene. O ne a re bolella hore oache ea rōna e lahlile nako ka metsotsoana e 15. Kaha o ne a batla ho e hlahisa lenaneong la hae bosiung boo, o ile a re kōpa hore re e lokise. Ho e-s’o ee kae, theknishiene e neng e otsela e ile ea ea lokisa bothata boo.”

Letšoao lena le ’nile la ntlafatsoa ka makhetlo a mangata hore le sebetse hantle le hore oache e lule e tšoere nako. Bohareng ba lilemo tsa bo-1980, thempereichara e ne e se e sa bontšoe ka likhato tsa Fahrenheit feela, empa le ka likhato tsa Celsius ’me thempereichara le nako li hlaha ka ho fapanyetsana.

Ka 2009 mabone a neng a khantša letšoao lena a neng a senya motlakase a ile a ntšoa ’me ha kenngoa a LED a khantšang ka bofubelu a bileng a tšoarellang nako e telele, ’me ka selemo a boloka chelete e ka holimo ho $4,000 (U.S.). Kajeno letšoao lena le sebelisa motlakase o monyenyane haholo ha ho bapisoa le oo le kileng la o sebelisa.