Banna le basali ba ntseng ba le bacha lilemong ba sebetsang lekaleng la United States la Lipaki Tsa Jehova, ba sebelisa nako le matla a bona ho hlatsoa liaparo tsa boima ba lithane tse ka bang 1 800 ka selemo, Brooklyn, Patterson le Wallkill, New York. Libakeng tseo ho hlatsuoa lintho tse ngata haholo. Empa se etsang hore mosebetsi ona e be o ikhethang ke liaparo tse sa tšoaneng tseo basebetsi ba li hlatsoang.

Letsatsi ka leng, batho ba lulang Bethele e United States ba romela liaparo tse fetang 11 000 moo ho hlatsoetsoang teng—lihempe tse 2 300 le marikhoe a 650 hammoho le likausi, liaparo tsa ka hare le likipa. Hape ba romela liaparo tse ling tse 900 dry-clean.

Ba boetse ba romela lishiti, lithaole le likobo tse ngata, esita le unifomo ea ba fanang ka lijo litafoleng le masela a hloekisang. Lintho tseo kaofela li lokela ho hlatsuoa, ho omisoa le ho isoa ho beng ba tsona. Masela a hloekisang a hlatsuoa hammoho, ha litae tsa silika le mabolause a hlatsuoa a le mang.

Basebetsi bao ba hlahloba hore na ha ho na liaparo tse tabohileng kapa tse tsoileng likonopo. Haeba ho e-na le tse hlokang ho kenngoa likonopo, ba li kenya ka mochine oa othomathike, kapa ka letsoho. Ha ho e-na le tse lokelang ho rokoa, ba li isa ho motho ea tsebang ho roka.

E le hore ho tsejoe hore na phahlo e itseng ke ea mang ho tse likete tse hlatsuoang, mochine o beha setempe se nang le nomoro e ikhethang phahlong ka ’ngoe. Nomoro eo e etsa hore ho be bonolo ho hlopha liaparo tse hlatsoitsoeng le tse aennoeng, e le hore li ka khutlisetsoa likamoreng tsa litho tsa lelapa la Bethele e United States.

Basebetsi ba nang le boiphihlelo ba koetlisa batho ba fihlang. Motho ea koetlisoang a ka ithuta ho etsa mesebetsi e ka bang 20 e fapaneng. Mosebetsi o mong oo ho bonahalang eka ho bonolo ho o etsa, empa ho nka nako hore motho a o tsebe, ke oa ho tlosa matheba. Motho ea fihlang o lokela ho ithuta masela le hore na a ba joang ha ho sebelisoa lik’hemik’hale ho ’ona.

Tajh, ea qetileng selemo le halofo a sebetsa moo, o re ka batho bao a sebetsang le bona, “Rea utloana—ho monate ho sebetsa le batho ba tsoang litsong tse sa tšoaneng.” Shelly, e leng e mong oa basebetsi o re, “Ke tlotla ho ’na ho thusa lelapa la Bethele hore le lule le le letle.”