Lik’hilomithara tse ka bang 145 ka leboea ho New York City, pel’a motsana oa Wallkill, New York, ho na le mapolasi a ’nileng a phetha karolo ea bohlokoa mosebetsing oa ho ruta o etsoang ke Lipaki Tsa Jehova lefatšeng ka bophara. Polasi ea pele ea Watchtower Farms, e leng kamoo sebaka seo se tsejoang kateng kajeno, e ile ea rekoa lilemong tse 50 tse fetileng, ka la 2 January, 1963.

David Walker, e leng e mong oa Lipaki Tsa Jehova ea sebelelitseng Wallkill ho tloha ha e hahoa, o re bolella hore na ke hobane’ng ha ho ile ha rekoa sebaka seo, o re: “Palo ea basebetsi ba ntlo-khōlō ea Lipaki Tsa Jehova Brooklyn, New York, e ne e ntse e eketseha, ’me re lokela ho ba fepa ka litšenyehelo tse tlaase. Ho ne ho nka lihora tse tšeletseng kapa tse robeli ho tloha Brooklyn ho ea polasing e ’ngoe eo Lipaki Tsa Jehova li neng li e sebelisa ka leboea ho New York. Empa ho nka lihora tse peli feela ho ea Wallkill. Sena se ile sa etsa hore e be sona sebaka se molemo bakeng sa litlhoko tsa rōna.” Hamorao Lipaki Tsa Jehova li ile tsa sebelisetsa polasi ena ho lema litholoana le meroho le ho hlahisa nama ea khōhō, ea kolobe le ea khomo hammoho le lihlahisoa tsa lebese. Ha nako e ntse e e-ea, ho ile ha rekoa mapolasi a mang.

Ka mor’a lilemo tse leshome feela, ho eketseha ha Lipaki Tsa Jehova lefatšeng lohle ho ile ha etsa hore ho be le tsoelo-pele e ikhethang Wallkill. Ho phaella lijalong tse neng li hlahisoa e le hore li ka kotuloa, ho ile ha hlahisoa le lingoliloeng tse neng li tla thusa mosebetsing oa kotulo ea tšoantšetso oo Jesu a ileng a bua ka oona. (Matheu 9:37; Luka 10:2; Johanne 4:35, 36) Hlokomela mosebetsi o seng o entsoe Wallkill.

Khatiso: Ka bo-1950, setsi sa khatiso se neng se le Brooklyn, New York, se ne se hlahisa boholo ba lingoliloeng tsa rōna tse thehiloeng Bibeleng. Empa ha palo ea batho ba hlokang lingoliloeng e eketseha, mochine o hatisang o Brooklyn o ne o se o sa khone ho hlahisa lingoliloeng tse lekaneng. Kahoo, ka 1973, Lipaki Tsa Jehova li ile tsa qeta ho haha setsi se seng sa khatiso Wallkill. Ho tloha ka nako eo, mehaho e kentseng mechine e hatisang e ’nile ea atolosoa ka makhetlo a ’maloa, ’me katoloso e ’ngoe e sa tsoa etsoa ka 2004.

Theknoloji ea K’homphieutha: Ka 1979, thimi ea Lipaki Tsa Jehova e Wallkill e ile ea qapa lenaneo la k’homphieutha leo hona joale le bitsoang Multilanguage Electronic Publishing System (MEPS). Lenaneo lena le thusa hore ho hatisoe lingoliloeng tse thehiloeng Bibeleng ka lipuo tse fetang 600.

Thuto: Ka 1988, Sekolo sa Bibele sa Gileade sa Watchtower se ile sa tlosoa Brooklyn sa isoa Wallkill, ’me ka la 17 October, litlelase tsa qala. Sekolo seo se ile sa tsoela pele se le moo ho fihlela ka April 1995 ha se fallisetsoa Setsing sa Thupelo sa Watchtower se Patterson, New York.

Joaloka lipolasi tse ling, lilemong tse mashome a mahlano tse fetileng, ho ile ha fetoloa tsela eo Watchtower Farms e neng e sebelisoa ka eona. Ho sa tsotellehe seo, ho ntse ho etsoa boiteko bo matla ba hore ho hlahisoe lijo tsa boleng bo holimo bakeng sa Lipaki Tsa Jehova tse sebeletsang Bethele e U.S. New York.

Hona joale Lipaki Tsa Jehova li ntse li haha liofisi tse ncha, matlo a bolulo le mehaho e meng, Wallkill. Li boetse li nchafatsa mehaho e seng e ntse e le teng. Mosebetsi ona oohle o tla thusa hore Watchtower Farms e tsoele pele ho hlokomela litlhoko tsa moea tsa batho ba bangata bao e ntseng e e-ba Lipaki Tsa Jehova sebakeng sena.

David Walker, ea qotsitsoeng pejana, o re: “Lilemong tse 50 tse fetileng, ke ’nile ka thaba haholo ha ke bona kamoo ho atolosoa ha Wallkill ho re thusitseng kateng hore re atlehe ho etsa mosebetsi oa ho ruta batho Bibele lefatšeng ka bophara!”