Pele u odara Bibele ea Braille ho Lipaki Tsa Jehova, etsa bonnete ba hore ho na le moo u tla e beha teng. Bibele ea Braille ea Phetolelo ea Lefatše le Lecha e feletseng—e fumanehang ka Senyesemane, Sepanishe le Setaliana—e ka ba boholo ba libuka tse 20 ho ea ho tse 28 ’me e hloka sebaka se ka etsang limithara tse peli, moo e tla bolokoa teng!

Mefuta e meng ea Braille ha e hloke sebaka se seholo joaloka Bibele e ngotsoeng ea Braille e pampiring. Mechine ea Braille e ngolang lintlha e nolofalletsa motho ea sa boneng ho ngola lintlha le ho bala boitsebiso ba elektronike a sebelisa mochine o nkehang habonolo o hlahisang litlhaku tsa Braille. Batho ba sa boneng ba ka fumana lingoliloeng le ho li mamela ba thusoa ke mananeo a k’homphieutha a balang boitsebiso ka lentsoe le phahameng.

Ho feta moo, Lipaki li entse lenaneo la k’homphieutha le ka fetolelang boitsebiso ka lipuo tse ngata tsa Braille. Ha ho se ho hlophisitsoe boitsebiso bo hatisitsoeng le litlhaku tsa Braille, lenaneo leo le bo ngola ka mongolo oa Braille. Le boetse le hlophisa boitsebiso ka tsela e nolofalletsang motho ea sa boneng ho bo bala. Lenaneo lena le tla thusa ho hatisa lingoliloeng tsa Braille, ho akarelletsa Bibele ka puo leha e le efe e nang le litlhaku tsa Braille, esita le tse sa sebeliseng lialfabete tse tloaelehileng.

E se e le lilemo tse fetang 100 Lipaki li hlahisa lingoliloeng tse thehiloeng Bibeleng tse sebelisoang ke batho ba sa boneng, ’me hona joale li fumaneha ka lipuo tse 19. Le hoja batho ba sa boneng ba thahasellang lingoliloeng tsena ba ka li fumana ntle ho tefo, ba bangata ba etsa monehelo oa boithatelo.

Nakong e fetileng ha ho ne ho lokolloa sengoliloeng se secha kopanong, bamameli ba ne ba bolelloa hore lingoliloeng tsa Braille li tla fumaneha hamorao. Selemong se fetileng, ofisi ea lekala ea United States e ile ea batlisisa liphuthehong hore na batho ba sa boneng ba rera ho ea likopanong life le hore na ba rata ho balla pampiring, mochineng o ngolang lintlha kapa ho mamela boitsebiso mochineng.

Likopanong tseo batho ba sa boneng ba eang ho tsona, ho ile ha romeloa likopi tsa Braille tse pampiring, e leng se ileng sa etsa hore ba fumane lingoliloeng tse ncha hong le batho bohle. Beke ka mor’a kopano, motho ka mong ea lakatsang ho ba le likhatiso tsa elektronike o ile a li romelloa ka e-mail.

Paki e ’ngoe e sa boneng e re: “E bile tlotla e khōlō ho fumana lingoliloeng hong le batho kaofela. Pesaleme ea 37:4 e re, Jehova o tla re fa seo lipelo tsa rōna li se kōpang. Ke seo a se entseng mafelo bekeng ana!” Paki e ’ngoe e sa boneng eona e itse: “Rea u leboha Jehova ka ho re tsotella hakana!”