Ka la 26 June 2022 batho ba fetang 28 000 ba bile teng ha mor’abo rona Kenneth Cook, Jr oa Sehlopha se Busang sa Lipaki Tsa Jehova a lokolla Bibele e ntlafalitsoeng ea Phetolelo ea Lefatše le Lecha ka Sesotho (Lesotho).

Lipaki Tsa Jehova tse buang Sesotho li ile tsa qala ho fumana Bibele e feletseng ea Phetolelo ea Lefatše le Lecha ka puo ea tsona ka selemo sa 2000. * Ho hatisitsoe likopi tse ka bang 138 000 tsa Bibele ea Phetolelo ea Lefatše le Lecha ka Sesotho ’me e sebelisoa ke batho ba fetang 14 256 ba Lipaki Tsa Jehova ba buang Sesotho lefatšeng lohle. Empa ke hobane’ng ha Bibele ee e ntlafalitsoe? Ke bo-mang ba e fetoletseng? Re ka kholiseha joang hore Bibele e ntlafalitsoeng ea Phetolelo ea Lefatše le Lecha e nepahetse? Ke lintho life tseo Bibele ee e ntlafalitsoeng e seng e e-na le tsona tse tla u thusa hore u ‘tšoanelehe ka ho feletseng le hore u be le lintho tsohle tseo u li hlokang bakeng sa ho etsa mosebetsi o mong le o mong o molemo’?​—2 Timothea 3:​16, 17.

Ka lebaka la puo e lulang e fetoha ha lilemo li ntse li feta, ho hlokahala hore Bibele e ntlafatsoe e le hore ho ka ba bonolo ho e utloisisa. Bibele e ngotsoeng ka puo ea khale e ke ke ea tsoela batho ba bangata molemo.

Ha ho ne ho ngoloa Bibele, Jehova Molimo o ne a entse hore buka ka ’ngoe e ngoloe ka puo eo batho ba e utloisisang. Komiti ea Phetolelo ea Bibele ea Lefatše le Lecha e ile ea latela mokhoa o tšoanang ha e ne e lokolla khatiso e ntlafalitsoeng ea Senyesemane ea Phetolelo ea Lefatše le Lecha ka October 2013. Selelekela sa khatiso ena se re: “Morero oa rona esale e le ho fetolela Bibele ka tsela e fetisang hantle molaetsa o tšoanang le oa ha e ne e ngoloa le ho o fetisa ka tsela e hlakileng le e tla etsa hore motho a e bale habonolo.”

Khatiso ea pele ea Sesotho ea Phetolelo ea Lefatše le Lecha e fetoletsoe ho tsoa khatisong ea Senyesemane ea 1984 ea New World Translation of the Holy Scriptures​—With References. Khatiso ena e ncha ea Sesotho e ntlafalitse mangolo a mangata a ntlafalitsoeng khatisong ea Senyesemane ea morao-rao. Taba ena e entse hore khatiso ea Sesotho e balehe habonolo.

Ho ekelletsa moo, tsela eo re utloisisang lipuo tseo Bibele e ngotsoeng ka tsona ho tloha qalong e leng Seheberu, Searame le Segerike e ile ea tsoela pele e ntse e ntlafala ka mor’a hore ho lokolloe khatiso ea pele ea Senyesemane. Ho fumanoe meqolo ea Bibele e neng e le sieo ha ho ne ho lokolloa Phetolelo ea Lefatše le Lecha ea Senyesemane. Meqolo ena e thusa bafetoleli ba Bibele hore ba utloisise tsela eo Bibele e neng e ngotsoe ka eona ka tsela e nepahetseng.

Taba ena e entse hore ho fetoloe mantsoe a mang e le hore a ka lumellana le tsela eo litsebi li utloisisang hore a ne a le kateng meqolong ea pele. Ka mohlala, meqolong e meng, Matheu 7:​13 e re: “Kenang ka keiti e nyenyane hobane keiti e isang timelong e kholo le tsela e lebisang teng e sephara.” Likhatisong tsa nakong e fetileng tsa Phetolelo ea Lefatše le Lecha lentsoe “keiti” le ne le sa hlahe karolong e qetellang ea temana. Leha ho le joalo, ha ho ntse ho ithutoa meqolo ena ka tsela e eketsehileng, ho ile ha fumanoa hore lentsoe “keiti” le ne le le teng qalong ha ho ne ho ngoloa Bibele. Kahoo, lentsoe lena le ile la kenngoa khatisong e ntlafalitsoeng. Ho na le liphetoho tse tšoanang le tsena tse entsoeng. Leha ho le joalo, liphetoho tsena tse nyenyane ha lia fetola moelelo oa lentsoe la Molimo.

Ha ho ntse ho etsoa lipatlisiso tse eketsehileng, ho ile ha fumanoa litemana tse ling tse tšeletseng moo lebitso la Molimo e leng Jehova le lokelang ho hlaha teng ka Bibeleng. Litemana tsena ke Baahloli 19:​18 le 1 Samuele 2:​25; 6:3; 10:​26; 23:​14, 16. Hona joale, khatisong ea Senyesemane ea Phetolelo ea Lefatše le Lecha, lebitso le halalelang e leng Jehova le hlaha ka makhetlo a 7 216 ho akarelletsa a 237 a hlahang Mangolong a Segerike a Bakreste.

Phetolelo ea Lefatše le Lecha e hatisoa ke Watch Tower Bible and Tract Society e leng mokhatlo o molaong oa Lipaki Tsa Jehova. Lipaki Tsa Jehova li se li abile Libibele lefatšeng lohle ka lilemo tse fetang 100. Phetolelo ea pele ea Bibele ea Senyesemane e ile ea lokolloa ke Komiti ea Phetolelo ea Bibele ea Lefatše le Lecha pakeng tsa selemo sa 1950 le 1960. Litho tsa komiti eo li ile tsa kopa hore li se ke tsa tsejoa le ka mor’a hore li hlokahale hobane li ne li sa batle ho iphumanela botumo.​—1 Bakorinthe 10:31.

Ka 2008, Sehlopha se Busang sa Lipaki Tsa Jehova se ile sa khetha sehlopha sa bara ba bo rona ho theha Komiti ea Phetolelo ea Bibele ea Lefatše le Lecha. Komiti ena e ile ea qala ho ntlafatsa Bibele ea Senyesemane hang-hang e nahanne ka liphetoho tse bileng teng puong ea Senyesemane ho tloha esale ho lokolloa khatiso ea pele. Komiti ena e ne e le hlokolosi haholo ha e ne e araba lipotso tse fetang 70 000 tsa bafetoleli ba Phetolelo ea Lefatše le Lecha ka lipuo tse fetang 120.

Ho ile ha khethoa sehlopha sa Bakreste ba sebetsang ka thata hore e be bafetoleli. Ho hlokomelehile hore ha bafetoleli ba sebetsa e le sehlopha, phetolelo ea bona e ba ea boleng bo holimo ho feta ha ba sebetsa ka bonngoe. (Liproverbia 11:​14) Bafetoleli bana ba se ba ntse ba e-na le boiphihlelo kaha ba fetolela lingoliloeng tse ling tsa Lipaki Tsa Jehova. Sehlopha sena sa bafetoleli se ile sa koetlisetsoa ho fetolela Bibele le ho sebelisa mananeo a k’homphieutha a etselitsoeng ho fetolela Bibele.

Lipatlisiso tse entsoeng tsa mantsoe a sebelisitsoeng ka Bibeleng li kentsoe k’homphieutheng e le ho nolofaletsa bafetoleli. Ba ile ba thusoa ke Lefapha la Litšebeletso Tsa Phetolelo le New York, Amerika. Sehlopha se Busang sa Lipaki Tsa Jehova se tataisa mosebetsi oa ho fetolela Bibele se sebelisa Komiti ea Bongoli. Empa ha e le hantle mosebetsi oa phetolelo o etsoa joang?

Sehlopha sa bafetoleli se lokela ho fetolela Bibele (1) e nepahetseng empa e utloisisoa ke batho bohle, (2)  e fetoletseng mantsoe a mang a bohlokoa ka tsela e tšoanang le (3)  e fetisang molaetsa o tšoanang le oa ha e ne e ngoloa ka hohle-hohle. See se khoneha joang? Nahana ka Bibele e qetang ho lokolloa. Bafetoleli ba qala pele ka ho sheba mantsoe a Sesotho a tšoanang le a sebelisitsoeng Bibeleng ea nako e fetileng ea Sesotho sa Lesotho ea Phetolelo ea Lefatše le Lecha. Lenaneo la k’homphieutha le bitsoang Watchtower Translation System le hlahisa mantsoe a Bibele a amanang, le a nang le moelelo o tšoanang. Le boetse le hlahisa mantsoe a Segerike le a Seheberu e le hore bafetoleli ba ka bona hore na mantsoe ao a ne a fetoletsoe joang libakeng tse ling ka Bibeleng. Lenaneo lena la Watchtower Translation System le thusa bafetoleli haholo hore ba shebe mantsoe a Sesotho a nang le moelelo o tšoanang. Ho phaella moo, ha bafetoleli ba fetolela temana e ’ngoe le e ’ngoe, ba leka kahohle ho sebelisa mantsoe a Sesotho ao batho ba a utloisisang habonolo.

Ho hlakile hore phetolelo ha se ho fetolela lentsoe ka lentsoe. Ho etsa bonnete ba hore mantsoe ao re a sebelisang a Sesotho a fetisa moelelo o nepahetseng oa Lentsoe la Molimo ke mosebetsi o mongata. Ho hlakile hore ho fetolela Bibele ena e ne e le mosebetsi o boima. Khatiso ea Sesotho ea Phetolelo ea Lefatše le Lecha e fetisa Lentsoe la Molimo ka tsela e tšoanang le ha le ne le ngoloa qalong empa e le ka tsela e hlakileng le e tla etsa hore motho a le bale habonolo.

Re u khothaletsa hore u ipalle Phetolelo ea Lefatše le Lecha. U ka e bala Inthaneteng kapa ho JW Library app kapa oa e kopa ho Lipaki Tsa Jehova. U ka e bala ka letsoalo le khutsitseng u kholisehile hore molaetsa oa Molimo o fetisitsoe ka tsela e nepahetseng ka puo ea hao.

Lintlha Tsa B: Li hlahisa likarolo tse 15 tsa limmapa le litšoantšo tse mebala