Ho tloha ka Molula-Qhooa oa July 2011 ho ile ha hlahisoa khatiso e nolofalitsoeng ka Senyesemane ka nako e ka etsang selemo ho leka ho bona hore e tla atleha na. Ho bonahala e ile ea atleha ’me ho entsoe qeto ea hore e tla hatisoa ho ea ho ile.

Ho tloha ka January 2013 Molula-Qhooa o nolofalitsoeng o tla boela o fumanehe ka puo ea Sefora, Sepotoketsi le Sepanishe.

Khatiso e nolofalitsoeng e ne e etselitsoe batho ba eang libokeng tsa liphutheho tsa Senyesemane Holong ea ’Muso empa Senyesemane e se puo ea bona.

Ho tloha ka khatiso ea pele feela re ile ra fumana mangolo a mangata a liteboho. Le leng le ne le tsoa ho nkhono e mong oa Liberia ea lilemo li 64 ea bitsoang Rebecca ea sa kang a kena sekolo. O ile a ngola a re: “Ke ntse ke ithuta ho bala. Ka linako tse ling ke ne ke bala Molula-Qhooa empa ke sa o utloisise. Ke rata khatiso e nolofalitsoeng. Ke khona ho e utloisisa.”

Batsoali ba bangata ba sebelisa khatiso e nolofalitsoeng ho thusa bana ba bona ho lokisetsa Thuto ea Molula-Qhooa, e leng se seng sa liboka tsa Lipaki Tsa Jehova.

Rosemary, ea hōlisang litloholo tsa banana tse tharo o re: “Ho ithuta Molula-Qhooa le litloholo tsa ka ho ne ho lula ho le thata. Re ne re tlameha ho sebelisa dikishinari ho sheba tlhaloso ea mantsoe. Re ne re senya nako e ngata re leka ho utloisisa mantsoe a hlahang lihloohong tse ling hoo bana ba neng ba sa ithute letho. Hona joale re qeta nako re ithuta mangolo le ho utloisisa hore na a amana joang le seo re ithutang sona.”