Ka January 2013, makasine ea Molula-Qhooa oa Segreenland e ne e qeta lilemo tse 40 e ntse e hatisoa. Segreenland ke puo e buuoang ke batho ba 57 000 feela Canada le Greenland.

Ho na le Lipaki Tsa Jehova tse 150 Greenland, empa ho tsamaisoa limakasine tsa Molula-Qhooa tsa Segreenland tse 2 300. Sena se bolela hore babali ba bangata ba Napasuliaq Alapernaarsuiffik, e leng lebitso la makasine ena ka Segreenland, hase Lipaki.

Puisanong e ileng ea etsoa thelevisheneng, molebeli oa ofisi ea phetolelo e toropong ea Nuuk o ile a re: “Batho ba bangata ba Greenland ba thahasella Bibele haholo, ke kahoo ba balang Napasuliaq Alapernaarsuiffik.”

Ha mofetoleli e mong eo e leng letsoalloa la Greenland a botsoa hore na ke’ng eo a e ratang ka makasine eo, o ile a re: “Ke ruile molemo o moholo ka ho e bala. Ka mohlala, e mpontšitse hore na ke lokela ho etsa’ng e le hore ke phele hantle. Ke ne ke tsuba haholo le hoja ke ne ke tseba hore ho kotsi. Empa Bibele e re bolella hore haeba re batla ho phela hantle, re lokela ho boloka ’mele ea rōna e hloekile.”

Lenaneong leo, ho ile ha boleloa hore Lipaki Tsa Jehova esale li le teng Greenland ho tloha ka bo-1955 ’me li ’nile tsa hatisa libuka le libukana ka Segreenland. Baithaopi ba buang Sedanishe le puo ea Greenland ke bona ba etsang mosebetsi oa ho fetolela, ’me sepheo sa bona ke ho etsa hore ba fetolele puo ea Greenland ka tsela e utloahalang le eo e neng e ngoloa ka eona pele.

Paki e ’ngoe ea khale ea Greenland, e ile ea re: “Ka lilemo tse 25 tseo ke ’nileng ka pakela batho ba Greenland ka tsona, ke bone hore ke habohlokoa ho fetolela lingoliloeng tsa rōna ka puo ea habo bona. Libakeng tse ling tse hōle tseo re khonang ho ea ho tsona ka sekepe feela ka mor’a likhoeli tse ’maloa selemong, ho na le batho ba ratang ho bala limakasine tsa rōna, joale nakong eo re sa eeng re atisa ho ba ngolla le ho ba romella lingoliloeng.”

Ho tloha ka January 2013, ho ile ha hatisoa khatiso e ithutoang le ea batho ka kakaretso ea Molula-Qhooa oa Segreenland. U ka bala kapa ua kopitsa likhatiso tsena ho jw.org/st tlas’a “Lingoliloeng” ka hore u khethe puo ea Segreenland ebe u penya “Batla.”