Ke metsotso e leshome le metso e mehlano pele ho hora ea bosupa hoseng Tuxedo, New York. Leholimo le leputsoa, ’me leqhoa le koahetse letša le lenyenyane le pel’a mohaho o mekato e mene oo banna le basali ba apereng liofarolo le likhohlopo, ba kenang ka ho oona. Ba fihlile mona hoseng ba tsoa lihoteleng tsa sebakeng sena le libakeng tse ling tsa bolulo esita le likarolong tse ling tsa profinse ena—e leng Patterson, Wallkill le Brooklyn, tse bohōle ba lik’hilomithara tse ka bang 80.

Leha ho le joalo, boholo ba baithaopi bao bo fihlile maobane ho tsoa libakeng tse hōle haholo tse likarolong tsohle tsa United States le ka ntle ho eona. Ba ithaopetse ho tla sebetsa mona—ba bang ka beke, ba bang libeke tse tšeletseng ’me ba bang ka nako e telele ho feta moo. Ba ipataletse ho tla mona ’me ha ba fumane moputso ka litšebeletso tseo ba fanang ka tsona. Empa ba thabela ho ba mona.

Kajeno ho na le baithaopi ba ka bang 120, le hoja palo ena e tla nyoloha likhoeling tse tlang. Ba kena ka holong ea ho jela ’me ba lula ba le leshome tafoleng. Ba bangata ba itšella kofi. Ho utloahala monko oa bacon ka kichineng. Ka 7:00 hoseng, ho tšohloa temana ea letsatsi e thehiloeng Bibeleng ’me ba bang ba e shebella lithelevisheneng tse kentsoeng leboteng. Metsotso e leshome le metso e mehlano ka mor’a moo, batho ba fanang ka lijo ba tlisa lijo tsa hoseng. Ba tlisa bacon, bohobe, mahe le oats. Ke matletsetletse a lijo.

Ka mor’a thapelo e koalang ha batho ba se ba qetile ho ja, bohle ba ea mosebetsing. Ba etsang mosebetsi oa kaho ba qoqa ba thabile ha ba ntse ba roala makarapa, likhalase tse sireletsang mahlo, ba apara liveste tse ’mala o khanyang le ho itlama ka mabanta a kenyang lithulusi.

Mosebetsi o lokelang ho etsoa hona joale, ke ho fetola K’hamphani ea Machaba ea Pampiri e Tuxedo hore e be sebaka sa ho sebeletsa sa ntlo-khōlō ea Lipaki Tsa Jehova, e tla hahoa haufi le toropo ea Warwick. Ho hahoa mehaho ea bolulo le liofisi mehahong e se ntse e le teng, hammoho le libaka tsa ho sebeletsa le tsa ho boloka thepa. Ka Labobeli la la 12 March, 2013, boto ea meralo ea sebakeng seo, e ile ea amohela polane ea rōna ea ho haha Tuxedo.

Baithaopi baa ba nakoana ba amoheloa ka tsela efe ha ba fihla libakeng tsa bona tsa bolulo? William ea tsoang New Jersey o re: “Ha u fihla, barab’abo rōna ba sebetsang moo baeti ba fihlelang teng ba u bolella lintho tse seng kae—tse kang hore na kamore ea lōna e hokae, le ka fihla libakeng tse ling joang le hore na linotlolo li sebelisoa joang. Bohle ba ikemiselitse ho u thusa. Ha u fihla Tuxedo, u kopana le mor’abo rōna ea etellang pele sehlopha seo u sebetsang le sona, ’me o u hlalosetsa seo u lokelang ho se etsa.”

Ho joang ho sebeletsa moo? Yajaira le monna oa hae ba tsoa Puerto Rico ’me ba thusa ka ho kenya liforeimi le mabota a liboto. Yajaira o re: “Re tsoha ka bo-4:30 hoseng. Re hloekisa kamore ea rōna, re noa kofi ebe re ea beseng eo re tsamaeang ka eona. Re khutla mosebetsing re khathetse, empa ha re khaotse ho tšeha. Batho bohle ba thabile.”

Setša sa Warwick se pota-potiloe ke moru. Zach le mosali oa hae Beth ba tsoang Minnesota, ba thusa ho lokisa setša sa Warwick. Ha ba botsoa hore na ke hobane’ng ha ba tlile mona, Beth o ile a re: “Re lumela hore ha ho na ntho e molemo ho feta ho sebeletsa Jehova bophelong. Re ne re batla ho sebelisa bokhoni ba rōna tšebeletsong ea hae.”