Bekeng ea la 5 le la 6 October, 2013, batho ba 1 413 676 ba linaheng tse 31, ba ne ba le teng sebokeng sa selemo le selemo sa bo129 sa Watch Tower Bible and Tract Society of Pennsylvania, se neng se tšoaretsoe Holong ea Kopano ea Lipaki Tsa Jehova e Jersey City, New Jersey, U.S.A, ha ba bang ba ne ba hoketsoe ka Inthanete.

Guy Pierce, e leng setho sa Sehlopha se Busang sa Lipaki Tsa Jehova, e ne e le molula-setulo sebokeng seo. O ile a tsosa thahasello ea bamameli ka ho ba kholisa hore seboka seo se ne se tl’o araba lipotso tsa bohlokoa tsa Bibele, se khantše leseli la ’nete le ho fana ka ‘lijo tsa moea ka nako e tšoanetseng.’—Matheu 24:45; Liproverbia 4:18.

“Libibele Tse Tlotlang Jehova.”

Mark Sanderson, e leng setho sa Sehlopha se Busang o ile a fana ka puo e mabapi le sebaka se secha se ntlo-khōlō ea lefatše ea Lipaki e Brooklyn, New York, U.S.A., se nang le sehlooho se reng, “Bibele le Lebitso la Molimo.” Sebaka sena se hatisa hore lebitso la Molimo le tla lula le le teng hohle ka Mangolong a Seheberu le ka Mangolong a Segerike a Bakreste, ’me ho boetse ho na le Libibele tse ling tse ngata tsa khale, tse kopantsoeng ka matsoho le maqephe a Bibele a Mehleng e Bohareng.

Lintho tsa bohlokoa tse teng moo li akarelletsa maqephe a phetolelo ea Bibele ea lekholong la bo16 la lilemo ea William Tyndale, eo e leng mofetoleli oa pele oa ho fetolela lebitso la Molimo ka Senyesemane le leqephe la phetolelo ea Bibele ka Sepanishe ea 1602 e tsebahalang e le Reina-Valera Bible, eo hangata e fetolelang lebitso la Molimo e le “Iehova.” Ho boetse ho bontšitsoe phetolelo ea Senyesemane e bitsoang Great Bible (e hatisitsoeng ka 1549), le kopi ea Bibele ea lipuo tse 12 ea Elias Hutter (Phetolelo ea 1599, e boetseng e bitsoang Nuremberg Polyglot) le Bibele ea Geneva (e hatisitsoeng ka 1603), tseo kaofela ha tsona li nang le lebitso la Molimo.

Mor’abo rōna Sanderson o ile a kōpa bohle hore ba etele Bethele ba il’o bona sebaka seo, o ile a re: “Ruri e se eka . . . e ka thusa batho bohle ba lipelo li tšepahalang ba lilemo tsohle, ba rutehileng le ba sa rutehang, hore ba rate lintho tse peli tseo kaofela ha rōna re li ratang—Lentsoe la Molimo le babatsehang, Bibele le lebitso la hae le halalelang, Jehova.”

Temana ea selemo ea 2014.

Ka mor’a hore Gerrit Lösch, e leng setho sa Sehlopha se Busang a etse Kakaretso ea Molula-Qhooa oa bekeng eo, Mor’abo rōna Pierce o ile a phatlalatsa temana ea selemo ea 2014, e reng: “’Muso oa hao o ke o tle.” (Matheu 6:10) Le hoja temana ena ea selemo e ne e ka lula e loketse bakeng sa Lipaki Tsa Jehova, ke e loketseng le ho feta selemong sena, kaha 2014 ke selemo seo ka sona ’Muso oa Molimo o qetang lilemo tse lekholo o hlonngoe leholimong.

“Mpho e Babatsehang e Tsoang ho Molimo.”

Ka mor’a moo, bamameli ba ile ba thabela ho shebella video e mabapi le histori ea Phetolelo ea Lefatše le Lecha, e leng Bibele e hatisitsoeng ke Lipaki Tsa Jehova, eo batho ba bang ba e nkang e le e ’ngoe ea liphetolelo tse ipabolang ka ho fetisisa tse kileng tsa etsoa. Ha Nathan Knorr a ne a lokolla moqolo oa pele oa phetolelo ena ka 1950, Kopanong ea Machaba ea Keketseho ea Puso ea Molimo, o ile a fa bamameli keletso e ntseng e sebetsa le kajeno, o ile a re: Balang phetolelo ena kaofela. Ithuteng eona. Thusang batho ba bang hore ba ithute eona, kaha seo se tla ba thusa hore le bona ba rapele Jehova.

“Ho Hopola Lintho Tsa Khale Tse Thabisang.”

Samuel Herd, e leng setho sa Sehlopha se Busang o ile a fana ka puo e neng e akarelletsa lipuisano tse rekotiloeng esale pele le litho tse ’nè tsa lelapa la Bethele ea United States, tse neng li le teng ha ho ne ho lokolloa meqolo e tšeletseng ea Phetolelo ea Lefatše le Lecha pakeng tsa selemo sa 1950 le 1960.

Eunice Timm o hopola ha a ne a qala ho sebelisa Phetolelo ea Lefatše le Lecha libokeng tsa Bokreste. O ne a ananela likarolo tsa ho etsa lipatlisiso, tse kang litšupiso tse bohareng ba leqephe. O ile a re kaha ho ne ho se bonolo hore a nke libuka tseo kaofela ha a ea libokeng, o ne a nka tseo a li hlokang feela, hammoho le Bibele ea King James Version e fellang ka pokothong, e le hore a e sebelise ha ho ka etsahala hore ho baloe litemana tseo a sa li lebellang.

Phetolelo ena e ncha e boetse e ama likarolo tse ling tsa borapeli ba rōna. Ka mohlala, Fred Rusk o ile a re pele ho 1950, bara babo rōna ba neng ba rapella lelapa la Bethele ba ne ba sebelisa mantsoe ao ba a nkileng phetolelong ea King James Version. Leha ho le joalo, hang ka mor’a hore ho lokolloe Phetolelo ea Lefatše le Lecha, ba ile ba khaotsa ho sebelisa mantsoe ao ’me ba rapela ka puo e tloaelehileng.

John Wischuk o ne a khahloa ke boleng ba phetolelo le boikokobetso ba litho tsa Komiti ea Phetolelo ea Bibele ea Lefatše le Lecha. O ile a re, “Ba ne ba sa batle ho tlotloa ha ba ne ba sa phela kapa leha ba se ba shoele hobane ba ne ba batla hore thoriso eohle e lebisoe ho Jehova Molimo.” Charles Molohan o ile a hlalosa kamoo sehlopha sohle se ikutloang kateng ha a ne a re, “Phetolelo ea Lefatše le Lecha e re thusitse hore re hatise ’nete lipelong tsa rōna le ho re matlafatsa tumelong, e le hore re ka thusa batho ba bang hore le bona ba be le tumelo.”

“Re Utloa ba Bua ka Maleme a Rōna ka Lintho Tse Hlollang Tsa Molimo.”

(Liketso 2:11) Geoffrey Jackson, e leng setho sa Sehlopha se Busang o ile a fana ka puo eo ho eona a ileng a lokolla Phetolelo ea Lefatše le Lecha e ntlafalitsoeng ea 2013. Qetellong ea puo ea hae, batho bohle ba neng ba le teng moo, ho akarelletsa le ba neng ba hoketsoe, ba ile ba fuoa kopi ea Bibele eo.

Mor’abo rōna Jackson o ile a re ho se ho fetile lilemo tse ka holimo ho 60 ho lokolotsoe moqolo oa pele oa Phetolelo ea Lefatše le Lecha. Ho tloha ka nako eo, puo ea Senyesemane e ’nile ea fetoha, empa morero oa mosebetsi oa rōna oa ho fetolela Bibele ha o e-s’o fetohe. Re batla ho fetolela Lentsoe la Molimo ka tsela e tobileng ka hohle kamoo re ka khonang empa re sa fetole moelelo oa lona.

Ka 2005, Sehlopha se Busang se ile sa hatisa taba ea hore ho hlokahala ho etsoe mosebetsi oa ho fetolela Bibele ka lipuo tse ngata. Ho tloha ka nako eo, palo ea lipuo tseo Phetolelo ea Lefatše le Lecha e fetoletsoeng ka tsona e nyolohile ho tloha ho tse 52 ho ea ho tse 121, ’me hona joale ho ntse ho etsoa mosebetsi oa ho fetolela tse ling tse 45. Ha bafetoleli ba ntse ba fetolela Phetolelo ea Lefatše le Lecha ka lipuo tse ling, ba ’nile ba kōpa hore ba hlalosetsoe mantsoe kapa lipolelo tse itseng. Ho fihlela joale, ho se ho arabiloe lipotso tse fetang 52 000 ’me boholo ba tsona li bontšitse hore ho na le moo phetolelo ea Senyesemane e lokelang ho ntlafatsoa teng, kapa e etsoe hore e tšoanele puo ea hona joale.

Ka mohlala, Mor’abo rōna Jackson o ile a hlalosa hore likhatisong tsa pele tsa Senyesemane tsa Phetolelo ea Lefatše le Lecha, 1 Samuele 14:11 e re Jonathane le bahlankana ba jereng libetsa tsa hae ba ile ba “ipepesetsa lebotho la Bafilista le setsing se ka thōko sa sesole.” E le ho qoba hore e balehe hampe, phetolelo e ntlafalitsoeng e re “ba ile ba itlhahisa.” Hape, pele Mikea 2:6 e ne e sebelisa polelo e tobileng e reng: “Le se ke la tlohela mantsoe hore a tsoe. Ba tlohela mantsoe hore a tsoe.” Temana ena e se e baleha tjena: “ ‘Khaotsang ho bolela!’ baa bolela.”

Lilemong tse hlano tse fetileng, Sehlopha se Busang se ile sa khetha komiti e tla ntlafatsa Phetolelo ea Lefatše le Lecha, ’me phetolelo eo ea fumaneha hona joale. Bibele e ntlafalitsoeng e ntle, e baleha habonolo ’me e na le sekoahelo se tšoarellang nako e telele. Mor’abo rōna Jackson o ile a phatlalatsa hore likhatiso tsa Senyesemane tsa mongolo o moholo le tse fellang ka pokothong li tla hatisoa haufinyane.

“Ea Tšoarang Lentsoe la ’Nete ka Nepo.”

Stephen Lett, e leng setho sa Sehlopha se Busang o ile a bua ka likarolo tse kentsoeng Bibeleng e ntlafalitsoeng, ’me sehlooho sa hae se ne se thehiloe ho 2 Timothea 2:15. Mantsoe a reng “ea tšoarang . . . ka nepo” a sebelisitsoeng temaneng ena, ka tsela e tobileng a bolela “ho seha ka kotloloho.” Re batla ho sebelisa “sabole ea moea” ka tsela e otlolohileng, ebile e le ka nepo. (Baefese 6:17) Ka mor’a moo, Mor’abo rōna Lett o ile a bontša hore na likarolo tse ncha tsa Bibele ena li ka re thusa joang ho etsa joalo.

1. Karolo e qalang e na le litemana tsa Bibele tse arabang lipotso tse 20 tse mabapi le lithuto tsa motheo tsa Bibele.

2. Sehlomathiso sa A se hlalosa likarolo tsa phetolelo e ncha, tse kang tsela eo e ngotsoeng ka eona, tsela eo mantsoe a hlalosoang ka eona le ho eketsa makhetlo ao lebitso la Molimo le hlahang ka oona ka Bibeleng.

3. Sehlomathiso sa B, se nang le likarolo tse 15 tse mebala e khahlang, se na le limmapa le litšoantšo tse tla re thusa ha re etsa thuto ea botho le ha re ruta batho ba bang.

4. Karolo e hlahang qalong ea lengolo ka leng la Bibele, e hlalosa lengolo leo ka bokhutšoanyane, ’me e thusa ’mali hore a fumane karolo eo a e batlang kapele. Karolo ena e nkela sebaka mantsoe a neng a hlaha holimo-limo leqepheng le leng le le leng liphetolelong tse fetileng.

5. Ho na le karolo e hlalosang ka bokhutšoanyane mantsoe a mangata a sebelisitsoeng ka Bibeleng.

6. Tlhahlamano ea Mantsoe a Bibele e fokolitsoe haholo. Hona joale e akarelletsa feela mantsoe le litemana tseo re tla li sebelisa haholo ha re le tšebeletsong ea boboleli.

7. Litšupiso tse bohareng ba leqephe ka leng le tsona li fokolitsoe. Li se li akarelletsa feela tse tla re thusa boboleling.

8. Mengolo e botlaaseng ba leqephe e fana ka tsela e ’ngoe eo mantsoe a itseng a sebelisoang ka eona, phetolelo ea lentsoe ka lentsoe le lintlha tse eketsehileng tsa litemana tseo.

JW Library.

John Ekrann, e leng setho sa Komiti ea Lekala la United States, o ile a bontša hore na lenaneo la JW Library le ka sebelisoa joang thepeng ea elektronike e kang, li-smartphone le li-tablet. Motho a ka fumana Phetolelo ea Lefatše le Lecha e ntlafalitsoeng hammoho le liphetolelo tse ling tse hlano tsa Bibele ha a le bula. Lenaneo lena la mahala le ile la qala ho sebelisoa ka la 7 October, 2013.

“Ho Fetolela Lentsoe la Molimo ka Morero oa ho Fana ka Moelelo o Nepahetseng.”

Anthony Morris, e leng setho sa Sehlopha se Busang o ile a hlalosa ka ho eketsehileng melao-motheo e tataisitseng Komiti ea Phetolelo ea Bibele ea Lefatše le Lecha ha e lokisetsa phetolelo e ntlafalitsoeng. E ile ea sebelisa 1 Bakorinthe 14:8, 9, ho tiisa hore Bibele e ntlafalitsoeng e tla utloisisoa habonolo. E ne e qoba ho sebelisa phetolelo ea lentsoe ka lentsoe moo e neng e sotha moelelo oa Bibele.

Ka mohlala, phetolelo e tobileng ea Genese 31:20 e ne e tla baleha tjena: “Jakobo o ile a utsoa pelo ea Labane.” Leha ho le joalo, maele a Seheberu a sebelisitsoeng mona a fapane le moelelo oa maele a Senyesemane, ke ka hona Phetolelo ea Lefatše le Lecha e reng: “Jakobo o ile a tsoa Labane tlaase.” Ka ho tšoanang, phetolelo ea lentsoe ka lentsoe ea 1 Bakorinthe 7:39, e ne e tla bolela hore mosali a ka nyaloa ke monna e mong haeba monna oa hae “a ka robala.” Kaha ka linako tse ling Mangolo a sebelisa lentsoe “robala” ha a bua ka ho robala lefung, Phetolelo ea Lefatše le Lecha e thusa ’mali hore a se ke a ferekana ’me e sebelisa polelo e reng, “a ka robala lefung.”

Mor’abo rōna Morris o ile a re “Bibele e ile ea ngoloa ho sebelisoa puo e buuoang ke batho ba tloaelehileng—lihoai, balisa le batšoasi ba litlhapi. Ha Bibele e fetoletsoe hantle, seo se etsa hore e utloisisoe ke batho bohle ho sa tsotellehe hore na maemo a bona a bophelo ke afe.”

“Ho Sebelisa ‘Mantsoe a Thabisang’ le ‘Mantsoe a Nepahetseng a ’Nete’ ”

David Splane, e leng setho sa Sehlopha se Busang o ile a fana ka puo eo sehlooho sa eona se thehiloeng ho Moeklesia 12:10. Bangoli ba Bibele ba ne ba le hlokolosi ha ba ngola mehopolo ea Molimo, ’me Komiti ea pele ea Phetolelo ea Lefatše le Lecha le eona e ile ea ba hlokolosi haholo mosebetsing oa eona. Phetolelo ea Lefatše le Lecha e ntlafalitsoeng, e tsoela pele ho latela molao-motheo o reng: “Tlaleha mantsoe a nepahetseng a ’nete” ’me u etse hore molaetsa oa Molimo o hlake ka hohle kamoo ho ka khonehang.

Mor’abo rōna Splane o ile a re: “Mantsoe a mangata a Senyesemane a na le moelelo o sa tšoaneng.” Ka mohlala, likhatiso tsa pele tsa Phetolelo ea Lefatše le Lecha li ne li sebelisa polelo e reng “mohlala oa mantsoe a phelisang hantle” ho 2 Timothea 1:13. Lentsoe “mohlala” ka Senyesemane le na le litlhaloso tse sa tšoaneng, tseo e ’ngoe ea tsona e bolelang “polane . . . e entsoeng ka bokhabane.” Ho ea ka tlhaloso ena, ba bang ba boletse hore polelo ena e bua ka polane e ntle, kapa paterone eo motho a tla e fumana lithutong tsa Bibele. Leha ho le joalo, tlhaloso e lumellanang le puo eo lentsoe lena le neng le ngotsoe ka eona qalong ke e reng “mohlala . . . o ka lateloang.” Kahoo, phetolelo e ncha e sebelisa polelo e reng “mantsoe a amohelehang.”

Mor’abo rōna Splane o ile a boela a bua ka lintlafatso tse ileng tsa etsoa e le ho bontša liphetoho puong ea Senyesemane. Ka mohlala lentsoe “ho khokhothela,” le neng le sebelisitsoe likhatisong tsa pele tsa Phetolelo ea Lefatše le Lecha ha ho ne ho hlalosoa tsela eo Jesu a ileng a bolaoa ka eona, hangata le bolela ho kenya thupa e motsu ’meleng oa motho ebe o lula a leketlile moo. Kaha Jesu o ne a sa khokhotheloa ka thupa ea tlhokofatso, phetolelo e ntlafalitsoeng e sebelisa mantsoe a kang “ho kokoteloa thupeng” ha e hlalosa tsela eo Jesu a bolailoeng ka eona.—Matheu 27:22, 23, 31.

Mor’abo rōna  Splane o ile a lihela likhala ka ho re: “Re rapella hore e se e ka ha le bala le ho ithuta Phetolelo ea Lefatše le Lecha e ntlafalitsoeng seo se tla le thusa hore le atamele haufi-ufi ho Jehova. ’Me e be Ntate oa lōna, Molimo oa lōna le Motsoalle oa lōna oa kamehla.”

Qetellong.

Mor’abo rōna  Pierce o ile a tšoantša phetolelo e ntlafalitsoeng ea Bibele le ‘mokete oa Jehova oa lijo tse hlabosang.’ (Esaia 25:6) O ile a koala lenaneo ka ho kōpa bamameli hore ba bine pina ea 114 libukeng tsa bona tsa Binelang Jehova, e nang le sehlooho se reng “Buka ea Molimo ke Letlotlo.”