Bamameli ba likete ba ne ba mametse litlaleho tse khothatsang le tlhaloso e thahasellisang ea lengolo la Matheu 24:45-47 sebokeng sa selemo le selemo sa bo128 sa Watch Tower Bible and Tract Society of Pennsylvania.

Ka la 6 October 2012, batho ba ka bang 5 000 ba ne ba bokane Holong ea Likopano ea Lipaki Tsa Jehova e Jersey City, New Jersey, U.S.A., hore ba mamele lenaneo lena. Bamameli ba bang ba fetang 10 000 ba ile ba shebella lenaneo lena le neng le hoketsoe makaleng a rōna a Brooklyn, Patterson le Wallkill, New York, ’me ba bang ba le ofising ea lekala e Canada.

Anthony Morris, e leng setho sa Sehlopha se Busang sa Lipaki Tsa Jehova, eo hape e neng e le molula-setulo oa seboka seo, o ile a bua ka lintlha tse khothatsang le liketsahalo tsa bohlokoa historing ea Lipaki tse ileng tsa tšohloa libokeng tse fetileng tsa selemo le selemo. Bamameli ba ne ba tseba hore lenaneo la selemong sena e tla ba le khothatsang. Empa ba ne ba boetse ba ipotsa, ‘Na seboka see le sona e tla ba sa bohlokoa historing ea rōna?’

Ka mor’a moo, ho ile ha bapaloa livideo tse peli tse ileng tsa bontša bamameli mosebetsi oo re o etsang lefatšeng ka bophara.

Kaho ea Liholo Tsa ’Muso:

Video ena e ile ea bontša katleho e bileng teng mosebetsing oa kaho ea Liholo Tsa ’Muso linaheng tse futsanehileng. Lilemong tse 13 tse fetileng, Lihlopha Tsa Kaho ea Liholo Tsa ’Muso linaheng tsena li ’nile tsa haha Liholo Tsa ’Muso tse 25 402—e leng kakaretso ea Liholo Tsa ’Muso tse ka bang ka holimo ho tse hlano ka letsatsi! Liholo tseo tsa ’Muso li ’nile tsa hahoa ho sebelisoa menehelo e fanoeng ke Lipaki ho tsoa lefatšeng lohle. Ho feta moo, nakong ea likoluoa tsa tlhaho, litsebi tsena li potlakela ho thusa batho ba anngoeng ke ketsahalo eo ho lokisa le ho haha matlo a bona le Liholo Tsa ’Muso.

Likopano Tse Khethehileng:

Ka 2012, Lipaki Tsa Jehova li ile tsa tšoara likopano tse ’maloa tse khethehileng le baemeli ba tsoang lefatšeng lohle. Likopano tsee li ne li fapane joang le likopano tsa machaba tse ’nileng tsa tšoaroa lilemong tse fetileng?

Video eo e ile ea hlalosa hore nakong ea kopano liofisi tsa makala tse libakeng tseo e tšoaretsoeng ho tsona li ne li lokisetsa baeti marobalo, lipalangoang le lijo tsa motšehare, ho e-na le hore mosebetsi oo o etsoe ke bahlophisi ba maeto ba ikemetseng. Hoo e ka bang baemeli ba 1 500 ba tsoang linaheng tse ling ba ile ba ba teng kopanong ka ’ngoe.

Baemeli ba tsoang linaheng tse ling ba ile ba ba le menyetla e mengata ea ho tsebana le Lipaki tsa sebakeng seo ba se etetseng, eseng feela ha ba le kopanong empa le ha ba hahlaula, ba e-ja le ha ba bolela litaba tse molemo sebakeng seo. Video e ile ea bolela ho re, “Likopanong tsohle tse khethehileng tse seng li tšoeroe ho tla fihlela joale, tlamo e phethahetseng ea bonngoe e ipakile e le lerato la Bokreste.”

Bamameli ba ile ba nyakalla haholo ha ba utloa hore Lipaki Tsa Jehova li tla tsoela pele ho tšoara likopano tse khethehileng selemo le selemo libakeng tse khethiloeng ho pota lefatše.

Tse ling tsa lintlha-khōlō tsa seboka sa selemo le selemo li ne li akarelletsa:

Lipuisano:

Barab’abo rōna ba bararo bao e leng litho tsa Komiti ea Lekala hammoho le basali ba bona, bao lilemo tsa bona tsa tšebeletso ea nako e tletseng li leng 342 ha li kopanngoa, ba ile ba bolela kamoo Jehova Molimo a ba koetlisitseng kateng e le hore ba phethe likabelo tse sa tšoaneng.

Richard Kelsey, eo e leng setho sa Komiti ea Lekala Jeremane, o ile a re Sekolo sa Litho Tsa Komiti ea Lekala le Basali ba Bona se mo rutile ho “latela tataiso ea Jehova ka linako tsohle.” Jehova ke Ntate ea lerato ea re batlelang se molemo. Mor’abo rōna Kelsey o ile a boela a re: “O batla hore re phele ka ho sa feleng, ’me o etsa sohle hore a re hlokomele.” Sekolo sena se ile sa ruta litho tsa Komiti ea Lekala hore li latele mohlala o lerato oa Jehova.

Ha Linda Johansson a ne a memeloa Sekolong sa Bibele sa Gileade sa Watchtower ka 1958, o ne a e-na le lilemo tse peli le halofo a kolobelitsoe, le se le seng a nyetsoe. Morali’abo rōna Johansson o ile a re: “Ke ile ka iphumana ke le tlelaseng le batho ba butsoitseng [le] ba nang le phihlelo. Ke ile ka nahana ka re . . . , ‘kannete ha ke tšoanelehe ho ba mona.’”

Leha ho le joalo, Morali’abo rōna Johansson o ile a mamella, ’me ka mor’a hore eena le monna oa hae ba fumane mangolo, ba ile ba khethoa hore e il’o ba baromuoa Malawi. Ka mor’a hore Lipaki Tsa Jehova li hlorisoe haholo naheng eo, Morali’abo rōna Johansson o ile a ithuta Bibele le mosebeletsi e mong oa ’muso ea neng a hanyetsa mosebetsi oa Lipaki. Hona joale, mosali oa monna eo, mora le morali oa hae, ke Lipaki tse kolobelitsoeng.

Mosebetsi oa ho Ruta Phatlalatsa:

Banyalani ba babeli ba tsoang Sekolong sa Bibele sa Banyalani ba Bakreste le molebeli ea tsamaeang oa Lipaki Tsa Jehova New York, ba ile ba pheta liphihlelo tsa boiteko ba bona ba ho bolela libakeng tse phetheselang.

Litoropong tse phetheselang haholo, baboleli ba nako e tletseng ba Lipaki Tsa Jehova ba teka lingoliloeng tsa Bibele litafoleng le likoloeaneng tse huloang. Batho ba fetang ka tsela ba ka inkela lingoliloeng, ba botsa lipotso tse mabapi le Bibele kapa ba kōpa thuto ea Bibele.

Lipaki tsa likarolong tse ling tsa New York City, Chicago le Los Angeles, li leka mokhoa ona oa ho pakela batho. Ka selemo se le seng feela, batho ba ka bang 2 700 ba ileng ba tla litafoleng le likoloeaneng tsena, ba ile ba kōpa thuto ea Bibele ea mahala.

Pina ea Bana:

Bamameli ba bangata ba ile ba sekisa meokho nakong eo bana ba 17 ba neng ba bina pina e reng “Mamela, U Utloe ’me U Hlohonolofatsoe” e tsoang bukeng ea lipina ea Binelang Jehova (Pina ea 120).

Ho ile ha latela neheletsano ea lipuo tse tšeletseng tse neng li fanoa ke litho tsa Sehlopha se Busang—Barab’abo rōna Jackson, Lösch, Pierce, Herd, Lett le Splane—ba ile ba tšohla se boleloang ke mantsoe a Jesu a tlalehiloeng ho Matheu 24:45-47. Jesu o itse:

“Ha e le hantle ke mang eo e leng lekhoba le tšepahalang le le masene leo mong’a lona a le behileng hore le okamele bahlanka ba hae ba ntlo, ho ba fa lijo tsa bona ka nako e tšoanetseng? Ho thaba lekhoba leo haeba mong’a lona ha a fihla a le fumana le etsa joalo! Kannete ke re ho lōna, O tla le beha hore le okamele lintho tsohle tsa hae.”

Neheletsano e ile ea araba lipotso tse latelang:

Jesu o Ile a Khetha “Lekhoba le Tšepahalang le le Masene” Neng Hore le Okamele Bahlanka ba Hae ba Ntlo?

Hlokomela moelelo oa mantsoe a Jesu a ho Matheu khaolo ea 24. Litemana tsohle tse bontšitsoeng mona li ne li lokela ho phethahala nakong ea ho ba teng ha Kreste, ‘qetellong ea tsamaiso ea lintho.’—Temana ea 3.

• “Matšoenyeho a matsatsi ao.”—Temana ea 29.

• “Moloko ona.”—Temana ea 34.

• “Letsatsi leo le hora eo.”—Temana ea 36.

• ‘Letsatsi leo Morena oa lōna a tla tla ka lona.’—Temana ea 42.

• “Mor’a motho o tla tla ka hora eo le sa e nahaneng.”—Temana ea 44.

Kahoo, ka ho utloahalang, e tlameha ebe “lekhoba le tšepahalang le le masene” le bile teng ka mor’a ho ba teng ha Kreste ho qalileng ka 1914.

Ho feta moo, Jesu o bontšitse hore “lekhoba” lena le ne le tla ba teng nakong ea ha batho ba botsa potso ena e loketseng: “Ha e le hantle ke mang eo e leng lekhoba le tšepahalang le le masene?” Baapostola ba Jesu ba ne ba e-na le neo ea mohlolo ea moea o halalelang, kahoo ho ne ho se na lebaka la hore ho botsoe potso eo lekholong la pele la lilemo C.E. (1 Bakorinthe 14:12, 24, 25) Le hoja baapostola le Bakreste ba lekholong la pele la lilemo ba ne ba tlotsitsoe ka moea o halalelang, e ne e se “lekhoba le tšepahalang le le masene” leo Jesu a profetileng ka lona.

Kahoo, ke ho utloahalang ho etsa qeto ea hore Jesu o khethile “lekhoba le tšepahalang le le masene” hore le okamele “bahlanka ba hae ba ntlo” nakong ea ho ba teng ha hae, e leng ‘qetellong ea tsamaiso ea lintho.’

“Ha e le Hantle ke Mang eo e Leng Lekhoba le Tšepahalang le le Masene?”

Jesu o ne a sa bue ka motho a le mong, empa o ne a bua ka litho tsa “lekhoba”—sehlopha se sebetsang hammoho ka tumellano. Jesu o ile a re lekhoba (1) le khethiloe hore ‘le okamele bahlanka ba [mong’a] ntlo’ le (2) “ho ba fa lijo tsa bona [tsa moea] ka nako e tšoanetseng.”

Ho tloha ka 1919 ho ea pele, haesale ho e-na le sehlopha se senyenyane sa Bakreste ba tlotsitsoeng ntlo-khōlōng ea lefatše ea Lipaki Tsa Jehova. Ba ’nile ba okamela mosebetsi oa rōna oa ho bolela litaba tse molemo lefatšeng lohle, ’me ba kenya letsoho mosebetsing oa ho lokisetsa lijo tsa moea le ho li aba. Lilemong tsa morao tjena, sehlopha seo se ’nile sa tsejoa e le Sehlopha se Busang sa Lipaki Tsa Jehova.

Bopaki bo etsa hore ho etsoe qeto e latelang: “Lekhoba le tšepahalang le le masene” le behiloe ka 1919 hore le okamele bahlanka ba Jesu ba ntlo. Lekhoba leo ke sehlopha sa litho tse ’maloa sa barab’abo rōna ba tlotsitsoeng ba sebeletsang ntlo-khōlō ea lefatše nakong ena ea ho ba teng ha Kreste, ’me ba kenya letsoho mosebetsing oa ho lokisetsa lijo tsa moea le ho li aba. Ha barab’abo rōna bana ba sebetsa ’moho e le Sehlopha se Busang, ba phetha mosebetsi oa “lekhoba le tšepahalang le le masene.”

“Bahlanka ba Ntlo” ke Bo-mang?

Jesu o ile a re “bahlanka ba hae ba ntlo” ba ne ba tla fumana “lijo tsa bona ka nako e tšoanetseng.” Balateli bohle ba tšepahalang ba Jesu ba feptjoa ke “lekhoba le tšepahalang le le masene.” Kahoo, barutuoa bohle ba Kreste—Bakreste ba tlotsitsoeng e le batho ka bomong le “linku tse ling”—ke “bahlanka ba hae ba ntlo.”—Johanne 10:16.

Ka mor’a hore sebui se hlalose karolo ena ea boprofeta ba Jesu, bamameli ba ile ba opa liatla nako e telele. Hamorao, ba bangata ba ile ba bolela kamoo ba ananelang kateng hore ebe Jesu o ba nka e le karolo ea “bahlanka ba hae ba ntlo.”

Jesu o Beha Lekhoba Neng Hore le “Okamele Lintho Tsohle Tsa Hae”?

Jesu o ile a re “mong’a lona ha a fihla” (e bolelang, “ha a tlile”) o tla beha lekhoba “hore le okamele lintho tsohle tsa hae.” Mong’a lekhoba, Jesu, o fihla neng?

Lentsoe le fetoletsoeng e le “ha a fihla” le nkiloe lentsoeng la Segerike er′kho mai. Temana ea 42 le ea 44 tsa khaolo ea 24 li fetoletse lentsoe er′kho mai e le “ho tla.” Litemaneng tseo, Jesu o bua ka ho tla ha hae e le Moahloli nakong ea mahlomola a maholo.—Matheu 24:30; 25:31, 32.

Kahoo, ho beha “lekhoba” ha Jesu hore le okamele “lintho” tsa hae, e lokela ho ba ntho e tla etsahala nakong e tlang. O tla le beha nakong ea mahlomola a maholo.

“Lintho” Tsa Jesu ke Life?

Jesu o itse: “Ke filoe matla ’ohle leholimong le lefatšeng.” (Matheu 28:18) Kahoo, “lintho” tsa Jesu hase feela mesebetsi e amanang le ’Muso e lefatšeng. Li akarelletsa ’Muso oa Bomesia.—Bafilipi 2:9-11.

Kahoo, Jesu o tla putsa “lekhoba le tšepahalang le le masene” ka hore a tsose litho tsa lona hore li il’o phela leholimong le ho li fa matla a borena holim’a lintho tsohle tsa Kreste tse leholimong le tse lefatšeng. Ona ke moputso o tšepisitsoeng Bakreste bohle ba tšepahalang ba tlotsitsoeng.—Luka 22:28-30; Tšenolo 20:6.

Puo ea ho qetela ea neheletsano e ile ea akarelletsa tsebiso e khethehileng. Ka mor’a ho bala mantsoe a khothatsang a Jesu a ho Matheu 28:20, Mor’abo rōna Splane o ile a re: “Re na le lebaka le leng la ho ba le tšepo. Lebaka leo le fumanoa temaneng ea selemo ea 2013. Ke lefe? Joshua 1:9 e re: ‘E-ba sebete ’me u be matla. . . . Jehova Molimo oa hao o na le uena.’”

Ha Mor’abo rōna Morris a phethela o ile a botsa a re: “Ho tla etsahala’ng selemong se tlang? Seboka sa selemo le selemo se reretsoeng ho tšoaroa selemong se tlang ka la 5 October 2013, se tla hokeloa Liholong Tsa Likopano tse khethiloeng United States le linaheng tse ling tse sebelisang Senyesemane.”

Lenaneo lena le tla hasoa ka Senyesemane feela. Le ke ke la tolokoa ka lipuo tse ling.

Ka mor’a lenaneo lena le hahang le le bohlokoa historing ea Lipaki, ba neng ba le teng ba ile ba tsanyaola pina e reng “Leseli le Khanya ka ho Eketsehileng” (Pina ea 116) ho tsoa bukeng ea Binelang Jehova. Pina eo e na le mantsoe ana a tšoanelehang:

“Morena o khethile khoba la hae,

’Me le re fa lijo ka nako.

Seli la ’nete ntse le eketseha,

Le ama lipelo tsa batho.”