Lipaki Tsa Jehova tsa Spain, li ea literonkong tse 68 tsa moo, ’me li ithuta Bibele le batšoaruoa ba ka bang 600.

E mong oa batho ba etelang moo ke Miguel ea qetileng lilemo tse 12 a le teronkong, pele e e-ba Paki. Hona joale o ea teronkong beke le beke. Hobane’ng? O batla ho thusa batho ba bang hore ba fetohe, joalokaha le eena a ile a thusoa.

Lilemong tse robeli tse fetileng, Miguel o ithutile Bibele le batšoaruoa ba bangata. O re: “Ke rata ho thusa batšoaruoa ba teronkong eo ke neng ke koaletsoe ho eona. Kea thaba ha ke bona hore ba batla ho tlohela bonokoane.”

Ha Miguel a le lilemo li ’nè, motho e mong ea tahiloeng o ile a chaisa ntate oa hae ka koloi ’me a hlokahala. ’Mè oa hae o ile a tlameha ho qeta lihora tse ngata a le mosebetsing e le hore a hlokomele lelapa.

Miguel le abuti oa hae ba ile ba qala ho lofa sekolo le ho utsoa malapeng esita le ho qheketsa likoloi. Ha Miguel a le lilemo li 12, o ne a se a qalile ho etsa liketso tsa bonokoane. Ha a le lilemo li 15, o ne a fumana chelete e ngata ka ho rekisa lithethefatsi. Empa kaha o ne a se a lemaletse heroine le k’hok’heine ’me li le theko e boima, seo se ile sa etsa hore a utsoe le ho feta. Ha a le lilemo li 16, o ne a lula a tšoaroa, ’me ka mor’a nakoana a fetoha senokoane se maloro a mabe. Miguel o re: “Ke ne ke bona hantle hore ke tl’o shoella teronkong kapa ke bolaoe ke lithethefatsi. Ke ne ke tšoasehile joaloka ntsintsi tepong ea sekho.”

Empa ka 1994 ha Miguel a ntse a le teronkong, motsoalle e mong oa hae o ile a kōpa Paki e ’ngoe hore e ngolle Miguel lengolo. Lengolong leo, Miguel o ile a ithuta hore Molimo o rerile ho boela a etsa lefatše Paradeise. Paki eo e ile ea mo khothalletsa hore a fetole bophelo ba hae e le hore a tle a bone ha tšepiso eo e phethahala. Miguel o re: “Mantsoe ao a ile a nkama maikutlo. Letsatsing leo, ke ile ka etsa qeto ea ho ithuta Bibele, le hoja ke ne ke tseba hore ho tla ba thata.”

Miguel o ne a tseba hore ho tla ba thata, kaha o ne a lemaletse koae le lithethefatsi. O ne a li fumana habonolo. Motho eo a neng a koaletsoe le eena ka seleng o ne a lula a mo nonosa lithethefatsi. Miguel o ne a lula a rapela Molimo hore a mo fe matla a ho hlōla temallo ea hae, ’me qetellong o ile a atleha.

Likhoeli tse tharo hamorao, Miguel o ile a qala ho bolella batšoaruoa ba bang seo a se lumelang. Selemong se latelang, o ile a lokolloa teronkong ’me a kolobetsoa e le e mong oa Lipaki Tsa Jehova. O ne a boetse a lokisetsa ho nyala, empa joale ha hlaha bothata. Khoeli pele a nyala, lekhotla le ile la mo ahlolela lilemo tse ling tse leshome teronkong, ha le liha kahlolo linyeoeng tse ling tse ’maloa tseo a neng a qosoa ka tsona. Leha ho le joalo, o ile a lokolloa ka mor’a lilemo tse tharo le halofo ka lebaka la boitšoaro bo botle. Qetellong o ile a nyala. Miguel ha a sa etsa liketso tsa bonokoane.