Graham Browne, e leng Paki ea Jehova e lilemo li 80, o ile a thusa monna ea sa phelang hantle kelellong hore a se ke a itihela mohahong oa Sky Tower o bolelele ba limithara tse 328 Auckland, New Zealand. Graham o re: “Ha monna eo a kōpa ho bua le e mong oa Lipaki Tsa Jehova, mapolesa a ile a ntetsetsa a mpotsa hore na nka khona ho ba thusa.

“Basebetsi ba Sky Tower ba ile ba ntlama ka marapo a sireletsang ’me ba tlamella thapo e telele Bibeleng ea ka. Mapolesa a ile a nkisa kantle mokatong oo batho ba emang ho oona ho boha sebaka, o bolelele ba limithara tse 192. Ho ne ho foka moea o batang haholo mohahong oo. Monna ea neng a batla ho itihela o ne a luleletse hōjana le ’na tselaneng eo ho tsamauoang ho eona ’me a leketlisitse maoto.

“Ke ile ka mo bolella hore ke e mong oa Lipaki Tsa Jehova ’me ke batla ho mo thusa. Ka mor’a hore ke etse thapelo e khutšoanyane ka pelong, ke ile ka phetla Bibele ’me ka qala ho bua le eena.

“Ke ile ka mo bolella hore bophelo boa halalela, e leng ntlha eo ke ileng ka e tšohla puong eo ke neng ke sa tsoa e beha phuthehong ea haeso.

Ke ile ka re: “‘Molimo o u talima u le motho oa bohlokoa ebile o u file mpho e babatsehang ea bophelo. Ke hobane’ng ha u sa mo bontše hore u ananela mpho eo? Ke kōpa u tle mona sebakeng se sireletsehileng.’

“Ke ile ka boela ka bala mangolo a ’maloa a Bibele, a akarelletsang Johanne 3:16, e reng: ‘Etsoe Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.’

Ke ile ka re: “‘Molimo o oa u rata ’me o batla hore u phele.’

“Qalong ho ne ho bonahala eka monna eo ha aa ’mamela. Eaba ke rapella ka pelong ke kōpa Jehova hore a nthuse ke khone ho mo thusa hore a se ke a itihela. Qetellong o ile a ema eaba o atamela ho ’na. O ne a ferekane haholo.

O ile a re: “‘Lipaki Tsa Jehova li ne li nketetse maoba empa ke ile ka li leleka. Ke masoabi ka seo ke se entseng. Ke kōpa le ntšoarele?’

Ke ile ka re: “‘Sk’a tšoenyeha, ba bang ba rōna re ile ra etsa se tšoanang pele re e-ba Lipaki. Kholiseha hore Jehova o tla u tšoarela.’

O ile a re: “‘Kea leboha, ka ba ka ikutloa ke imolohile.’

Ke ile ka re: “‘Ke tšohile hore u tla oela. ’Na ke itlamme ka marapo a sireletsang empa ha u ka oela u tla lahleheloa ke bophelo ba hao bo babatsehang. Seo se tla utloisa Jehova bohloko haholo. Joale, ke kōpa u tle sebakeng se sireletsehileng.’

“Maikutlo a hae a ile a kokobela. Eaba o re: ‘Ho lokile.’

“O ile a ea moo batho ba emang teng ho boha sebaka, ’me mapolesa a mo isa sebakeng se sireletsehileng. Re ne re qetile hora re ntse re buisana.”

Lipaki Tsa Jehova li tsotella batho e le kannete, haholo-holo ba tepelletseng maikutlo. Lefatšeng lohle li sebelisa Bibele ho fa batho tšepo le matšeliso le ho ba tiisetsa hore Molimo o oa ba tsotella.