SELTERS, Jeremane—Seemahale se tlotlang mofu Max Liebster, e leng e mong oa Lipaki Tsa Jehova ea ileng a mamella ho koalloa likampong tsa mahloriso tsa Manazi ka lilemo tse hlano, se ile sa buloa ka la 21 June, 2013, Lautertal-Reichenbach. Ramotse oa sebakeng seo le liofisiri tse ling tsa teng, ba ile ba bula seemahale seo moketeng oo ho oona ho neng ho tlile baahi ba moo, hammoho le mosali oa Monghali Liebster, e leng Simone Liebster, eo le eena e leng e mong oa Lipaki Tsa Jehova.

Kaha Monghali Liebster e ne e le Mojuda ea neng a lula Jeremane nakong ea puso ea Bonazi ea Hitler, o ile a tšoaroa ke Magestapo ka 1939 ’me ka mor’a moo a hoehla likampong tsa mahloriso tse hlano: Sachsenhausen, Neuengamme, Auschwitz, Buna le Buchenwald. Litho tse robeli tsa lelapa labo li ile tsa shoella likampong tseo. Har’a tsona e ne e le Ntate oa hae, eo a ileng a isa setopo sa hae moo ho chesoang litopo teng, Sachsenhausen.

Monghali Liebster o ile a tloaelana le batšoaruoa-’moho le eena ba Lipaki Tsa Jehova ha a ntse a le likampong tsa mahloriso. O ile a kolobetsoa hore e be e mong oa Lipaki Tsa Jehova ka mor’a hore a lokolloe ka 1945. Ho latela se ngotsoeng seemahaleng sa Monghali Liebster, tumelo ea hae “e ile ea [mo] fa matla a hore a tsoele pele a phela.” O hlokahetse ka 2008, a le lilemo li 93.

Memo ea mokete oa pulo ea seemahale sa hae, e re Monghali Liebster “o ne a kholisehile hore melao ea boitšoaro ea Bokreste e ka ntlafatsa bophelo ba batho.” Wolfram Slupina, e leng ’muelli oa Lipaki Tsa Jehova Jeremane, o re: “Re motlotlo hore ebe ho hopoloa e mong oa barapeli-’moho le rōna ba bangata ea ileng a emela seo a se lumelang ka sebete ha ho ne ho e-na le leeme la bolumeli. Ruri seemahale sena ke bopaki bo bontšang matla a molaetsa oa Bibele oa khotso le momahano, oo Lipaki Tsa Jehova li loanelang ho o tšepahalla!”

Raliphatlalatso:

Raliphatlalatso oa Machaba: J. R. Brown, Ofisi ea Boitsebiso, tel. +1 718 560 5000

Jeremane: Wolfram Slupina, tel. +49 6483 41 3110