MANILA, Philippines—Leholiotsoana le Leholo la Haiyan (le bitsoang Yolanda naheng ea Philippines), ke le leng la lifefo tse matla tse kileng tsa otla Philippines ka la 8 November, 2013.

Ka la 13 November, 2013, ofisi ea lekala ea Lipaki Tsa Jehova ea Philippines e Manila e tlalehile hore Lipaki tse 27 li ile tsa shoa. Matlo a ka holimo ho 100 a Lipaki le libaka tsa borapeli tse hlano li ile tsa senyeha.

Sehlopha se Busang sa Lipaki Tsa Jehova ke sona se hokahanyang komiti ea liphallelo ea machaba se le ntlo-khōlō ea lefatše e Brooklyn, New York. E le karolo ea morero ona, ofisi ea lekala ea Philippines e ntse e etsa boiteko ba ho isa lijo, metsi, meriana le lintho tse ling libakeng tse anngoeng. Ka Sontaha sa la 10 November, likoloi tse ka bang leshome tse nkileng thepa li ile tsa isoa ’me tse ling tse eketsehileng tsa tloha letsatsi le hlahlamang.

E ne e se khale ha sebaka sena se ne se e-ba le tšisinyeho ea lefatše e boholo ba 7.2 sekaleng sa Richter e ileng ea hlokohla Philippines ka la 15 October, 2013 ’me ea bolaea batho ba 218. Litlaleho li bontša hore tšisinyeho eo e khōlō e ile ea bolaea Lipaki Tsa Jehova tse tharo, e ’ngoe e shoele ha seretse se ne se hoholeha ’me tse peli li shoele ha matlo a tsona a ne a li oela holimo. Tšisinyeho ea lefatše e tlile hang ka mor’a Leholiotsoana Nari, le ileng la otla Philippines ka la 12 October, 2013, ’me la bolaea batho ba ka bang 13.

Sehlopha se Busang sa Lipaki Tsa Jehova, se hlokomela litšenyehelo tsa litokisetso tsa liphallelo se sebelisa menehelo ea mosebetsi oa lefatše lohle. Sehlopha se Busang se boetse se behile lintho leihlo ho bona haeba ho hlokahala baithaopi ba tsebang mesebetsi e itseng ’me se hokahane le liofisi tsa makala tsa lefatšeng ka bophara e le hore li ka romela batho ba nang le boiphihlelo hore ba tl’o thusa ka mosebetsi oa liphallelo, ba sebetsa ’moho le ba boholong sebakeng seo le mekhatlo e meng ea liphallelo.

Dean Jacek, e leng raliphatlalatso oa Lipaki Tsa Jehova tsa Philippines, o ile a re: “Re saretsoe haholo ke litlokotsi tsena tse bolaileng batho ba bangata. Ho na le tlhokahalo e khōlō ea ho tšelisa batho ka lebaka la likoluoa tsena haholo-holo ba sithabetseng. Re tla tsoela pele re etsa sohle seo re ka se khonang hore re ’ne re phallele balumeli ’moho le rōna le baahelani ka lintho tseo ba li hlokang nameng le moeeng.”

Raliphatlalatso:

Raliphatlalatso oa Machaba: J. R. Brown, Ofisi ea Boitsebiso, tel. +1 718 560 5000

Philippines: Dean Jacek, tel. +63 2 411 6090