SEOUL, Korea—November 2012 ke khoeli ea bohlokoa ho Lipaki Tsa Jehova tsa Korea Boroa tse fetang 100 000, kaha li qeta lilemo tse lekholo li le naheng eo. Lipaki li ikhopotsa lilemo tse lekholo ka ho kena letšolong la naha ka kakaretso la ho fa batho lipampitšana, kapa maqhetsoana a sehopotso. Pampitšana eo e mebala-bala e hlalosa ka bokhutšoanyane histori ea Lipaki Tsa Jehova tsa Korea Boroa le mosebetsi oo li o etsang sechabeng.

Ka 1912, baemeli ba Lipaki Tsa Jehova ba ile ba qala mosebetsi oa ho ruta batho Bibele phatlalatsa Korea. Ho fihlela nakong ena, Lipaki li ’nile tsa hatisa Libibele tse ka bang 700 000 ka Sekorea, ’me beke le beke li khanna lithuto tsa Bibele tsa mahala tse fetang 70 000. Liphuthehong tse fetang 1 300 naheng ena, Lipaki li tšoara liboka tsa thuto ea Bibele ’me li mema batho bohle. Hape li ’nile tsa tšoara likopano tsa selemo le selemo mona Korea, ’me kopano ea pele e ile ea tšoaroa ka 1954. Ho tloha ka 1997, mananeo ana a tšoaroa ka Sekorea le ka Puo ea Matsoho ea Korea. Ka 2009, Lipaki Tsa Jehova li ile tsa tšoara kopano ea machaba Seoul, ’me ho ile ha tla batho ba fetang 58 000, ba akarelletsang baemeli ba ka holimo ho 6 500 ba tsoang linaheng tse 11. Ofisi ea Lekala ea Lipaki e Seoul e thehiloe ka 1953.

Dae-il Hong, e leng ’muelli oa Lipaki Tsa Jehova Korea, o re: “Re qetile lilemo tse lekholo re ruta baahelani ba rōna Bibele.” O phaella ka ho re: “Re lumela hore ho sebelisa melao-motheo ea Bibele ho matlafatsa manyalo, ho eketsa thabo ka lapeng ebile ho etsa hore lichaba li momahane. Re ikemiselitse ho tsoela pele re etsa mosebetsi ona sechabeng ka lilemo tse ngata.”

Raliphatlalatso:

J. R. Brown, Ofisi ea Boitsebiso, tel. +1 718 560 5000

Rephabliki ea Korea: Dae-il Hong, tel. +82 10 3951 0835