DAR ES SALAAM, Tanzania—Lekhotla la Boipiletso la Tanzania, e leng lekhotla le ka holimo-limo naheng eo, le ile la etsa qeto le le ntsoe-leng ka la 12 July, 2013, ea hore likolo tsa sebakeng sa Mbeya li hataketse tokoloho ea bolumeli ea barutoana ba 127, bao ba bang ba bona ba ileng ba lelekoa sekolong kapa ba fuoa kotlo ka mor’a hore ba hane ho bina pina ea sechaba ka mabaka a bolumeli.

Ka 2007, Boto ea Sekolo sa Shikula e ile ea leleka bacha ba Lipaki ba bahlano ka mor’a hore ba hane ho bina pina ea sechaba. Ho phaella moo, sekolo sa praemari le sa sekondari motseng oo, li ile tsa fa bacha ba bang ba Lipaki ba 122 kotlo ka lebaka le tšoanang. Ka mor’a hore boipelaetso ba bona bo se ke ba atleha ho ba boholong lekaleng la thuto le ho tona-khōlō, barutoana ba 127 ba ile ba ipiletsa Lekhotleng le Phahameng la Tanzania, e leng lona lekhotla la bobeli ho a phahameng ka ho fetisisa naheng eo. Lekhotla lena le ile la lumellana le ho lelekoa ha barutoana bao le hoja, litho tsa lekhotla li ne li sa lumellane kaofela. Hamorao, ka la 2 December , 2010, barutoana ba ile ba ipiletsa Lekhotleng la Boipiletso. Ho latela litokomane tsa lekhotla, qeto e entsoeng ke Lekhotla la Boipiletso e hlakola le ho qhelela ka thōko qeto e entsoeng ke Lekhotla le Phahameng, e bile e hlakola le liphello leha e le life tsa qeto eo.

Zadok Mwaipwisi, e leng ’muelli oa Lipaki Tsa Jehova Tanzania, o re: “Re thabetse qeto ea lekhotla le hore ebe le tšehelitse bacha bana boikemisetsong ba bona ho hlompha matsoalo a bona. Tlhōlo ena e tiisa hore Lipaki Tsa Jehova li na le tokoloho ea bolumeli, tumellanong le molao-motheo, joaloka baahi bohle ba Tanzania.”

Raliphatlalatso:

Raliphatlalatso oa Machaba: J. R. Brown, Ofisi ea Boitsebiso, tel. +1 718 560 5000

Tanzania: Zadok Mwaipwisi, tel. +255 22 2650592