Komiti ea Litokelo Tsa Botho ea Machaba a Kopaneng e ile ea etsa liqeto tse peli tsa bohlokoa tse emelang Lipaki tsa Jehova tsa Azerbaijan ka la 15 December 2020. Ke tsa nyeoe ea Rahima Huseynova khahlanong le Azerbaijan, le ea Saladdin Mammadov, Rashad Niftaliyev le Sadagat Abbasova khahlanong le Azerbaijan. Linyeoeng tseo tse peli, komiti ena e lihile kahlolo e reng Naha e hataketse litokelo tsa Lipaki Tsa Jehova ’me ea kopa Azerbaijan ho fetola melao ea eona hore e qobe ho hatakela litokelo tsa Lipaki nakong e tlang.

Nyeoe ea Rahima Huseynova khahlanong le Azerbaijan e bakiloe ke ha mapolesa a Baku a koalla Morali oa bo rona Rahima Huseynova ka December 2014 hobane a bua le batho ba bang ka lintho tseo a li lumelang. Eaba lekhotla la setereke le mo lefisa li-Manat tse 1 500 tsa Azerbaijan (tse ka lekanang le M13 230), hobane ka nako eo Lipaki Tsa Jehova e ne e se bolumeli bo ngolisitsoeng Baku.  * Ha Morali oa bo rona Rahima Huseynova a ipiletsa, Lekhotla la Maipiletso la Baku le ile la hana ho fetola kahlolo eo. Eaba Morali oa bo rona Huseynova o etsa qeto ea ho ipiletsa lekhotleng la machaba.

Komiti ea Litokelo Tsa Botho ea Machaba a Kopaneng e ile ea liha kahlolo e reng Naha e hataketse Serapa sa 18(1) sa Tumellano ea Machaba ea Litokelo tsa Botho le tsa Sepolotiki kapa International Covenant on Civil and Political Rights (ICCPR). Komiti eo e ile ea laela Azerbaijan ho patala Morali oa bo rona. Ntho e khahlang ke hore ha komiti ena e phatlalatsa maikutlo a eona, e itse Azerbaijan e boetse e “tlameha ho nka mehato eohle e hlokehang ho thibela liketso tse joalo tsa ho hatakela litokelo tsa batho kamoso, tse akarelletsang ho hlahloba melao ea eona, litaelo le/kapa mekhoa e le hore e etse bonnete ba hore litokelo tse boletsoeng serapeng sa 18 sa [ICCPR] li hlomphuoa ka ho feletseng.”

Nyeoe ea Saladdin Mammadov, Rashad Niftaliyev le Sadagat Abbasova khahlanong le Azerbaijan ke ea sehlopha sa bara le barali ba bo rona ba Ganja ba ileng ba kopana ho tla ithuta Bibele lelapeng la mora oa bo rona Saladdin Mammadov. Mapolesa a ile a futuhela sehlopha seo se senyenyane se bokaneng ’me a secha lehae la mora ao bo rona ka October 2014. Eaba mora oa bo rona Mammadov, mora oa bo rona Rashad Niftaliyev, le morali oa bo rona Sadagat Abbasova ba isoa sepoleseng ’me ba qeta lihora tse tšeletseng ba koaletsoe. Ho ile ha feta matsatsi a mabeli eaba ba bitsetsoa Lekhotleng la Setereke sa Nizami le Motseng oa Ganja. Ke moo lekhotla le ileng la liha kahlolo e reng seboka seo se ne se se molaong hobane ba neng ba tlile sebokeng seo ba ne ba sa ingolisa e le mokhatlo oa bolumeli Motseng oa Ganja. Eaba le lefisa Lipaki tsena li-Manat tse 2 000 tsa Azerbaijan (tse lekanang le M17 406) motho ka mong. Bara le barali bana babo rona ba ile ba ipiletsa Lekhotleng la Ganja la Maipiletso. Ka masoabi, Lekhotla la Maipiletso le ile la hana ho fetola kahlolo eo. Eaba ba ipiletsa ho Komiti ea Litokelo Tsa Botho ea Machaba a Kopaneng.

Komiti e ile ea fumana hore Azerbaijan ha ea latela lirapa tse ngata tsa tumellano ea ICCPR ’me ea laela hore naha e patale Lipaki tseo tse tharo. Komiti ena e ile ea hatisa maikutlo a eona a thahasellisang a reng “ho hang Lekhotla la Setereke ha le a fana ka tlhaloso ea hore na ke hobane’ng ha bara ba bo rona ba ne ba tlameha ho ngolisa ’musong pele ba ka kopana malapeng a bona ka lebaka la bolumeli.” Polelo ena e netefatsa hore bara ba bo rona ba Azerbaijan ba na le tokelo ea ho kopana hore ba tlo rapela Molimo ntle le hore ba ngolisoe ka molao.

Komiti e ile ea etsa seo e se entseng nyeoeng ea Rahima Huseynova, ea kopa Azerbaijan ho hlahloba “melao ea eona, litaelo le/kapa mekhoa” e le hore e etse bonnete ba hore e hlompha litokelo tseo baahi bohle ba tlamehang ho li fuoa tlas’a tumellano ea ICCPR.

Litaba tse monate ke hore boemo bo ntlafetse Azerbaijan ’me bahlanka ba ’muso ha ba sa kena-kenana le litokelo tsa bara ba bo rona tsa ho rapela lilemong tsa morao tjena. Re tšepa hore liqeto tsena tse peli le tsona li tla tlatsetsa ho theheng ka molao litaba tse molemo Azerbaijan.​—Bafilipi 1:7.