NEW YORK—Guy H. Pierce, eo e Neng e le Setho sa Sehlopha se Busang sa Lipaki Tsa Jehova ntlo-khōlō ea tsona e Brooklyn, New York, o hlokahetse ka Labobeli la la 18 March monongoaha. O hlokahala tjena a le lilemo le 79.

Mofu Pierce o sebelitse likomiting tse sa tšoaneng tse etellang pele mesebetsi ea Lipaki ho akarelletsa le oa ho ruta batho Bibele o etsoang lefatšeng lohle. Boikarabello ba hae bo ne bo etsa hore a lule a le tseleng, ’me o ne a sebelisa menyetla e joalo ho khothatsa Lipaki Tsa Jehova lefatše lohle. Le hoja a ne a e-na le mosebetsi o mongata, o ne a sa iphathahanye hoo a ke keng a mamela batho ba hlokang thuso kapa keletso, ’me pososelo ea hae e mofuthu le metlae ea hae e ne e etsa hore ba phutholohe. Batho ba mo tsebang hantle ba re batho ba mefuta le litso tsohle ba ne ba mo atamela ka bonolo feela. Ha basebeletsi ba Lipaki ba rutang batho Bibele ba ne ba abeloa mangolo, mofu o ile a bua seo batho ba neng ba mo tseba ka sona ’me a re: “Le emele se nepahetseng, leha ho le joalo le tenyetsehe ha ho hlokahala. Le se ke la khesa bao le abetsoeng ho ea ho bona hobane le sa tšoane le bona ka setso.”

Mofu Guy Hollis Pierce o hlahetse Auburn, California, ka la 6 November, 1934. O ile a kolobetsoa hore e be e mong oa Lipaki Tsa Jehova ka la 14 August, 1955 a le lilemo li 20. O ile a nyala molumeli-moho le eena, e leng Penelope (Penny) Wong, ka la 30 May, 1977 ’me ba hlohonolofatsoa ka bana. Eena le mosali oa hae ba ile ba etsa mosebetsi oa ho ruta batho kamehla (ea e-ba bo-pula-maliboho ba kamehla ho ea kamoo Lipaki li ba bitsang kateng). Hamorao o ile a etsa mosebetsi oa ho etela liphutheho tsa Lipaki Tsa Jehova ho pholletsa le United States e le hore a ka khothatsa Lipaki tse ling tse etsang mosebetsi oa ho ruta batho Bibele kamehla hammoho le litho tse ling tsa phutheho. Ka 1997 ba ha Pierce ba ile ba memeloa ho sebeletsa ofising ea lekala ea Lipaki Tsa Jehova ea United States. Ka la 2 October, 1999, monghali Pierce e ile ea e-ba setho sa Sehlopha se Busang.

Ntate Pierce e ne e le molula setulo oa seboka sa selemo le selemo sa Watch Tower Bible and Tract Society of Pennsylvania sa bo129 se neng se tšoeroe mafelo-bekeng a la 5 le la 6 October, 2013. Batho ba 1 413 676 ba linaheng tse 31 ba ile ba mamela lenaneo leo, ba bang ba ne ba le moo ka seqo ha ba bang bona ba ne ba le mametse Inthaneteng. Ho ea ka websaete ea Lipaki seo e ne e le seboka se seholo ka ho fatisisa seo Lipaki Tsa Jehova li kileng tsa se tšoara ho tla fihlela lena le holimo.

Mofu Pierce o siea mohatsa’e Penny, bana ba tšeletseng, litloholo tse ’maloa hammoho le litloholoana. O tla boela a hloloheloe ke Lipaki tse ngata ho pota lefatše kaha o ne a li nka e le beng ka eena.

Bo-mphato oa hae ba Sehlopha se Busang ba bile ntsoe-leng ha ba re “tumelo ea hae e ne e tiile ’me a emela melao le melao-motheo ea Jehova ka tieo.” Ba ile ba phaella ka hore: “Re tla lula re hopola kamoo a ileng a phetha tšebeletso ea hae ea lefatšeng ka sebete kateng ’me seo se tla re matlafatsa nakong e tlang.”

Media Contact(s):

International: J. R. Brown, Office of Public Information, tel. +1 718 560 5000