NEW YORK​—Lipaki Tsa Jehova li ntse li tsoela pele ho leka ka hohle ho phallela batho ba anngoeng ke Maholiotsoana a bitsoang Irma le Maria a sentseng libaka tse sehlekehlekeng sa Caribbean le libaka tse haufi le sona ka September 2017. Tlaleho e latelang e tsoang liofising tsa makala tsa Barbados, Cuba, Dominican Republic, Fora le United States ea bontša hore na Lipaki li ntse li thusetsa joang.

Likomiti tse tharo tsa liphallelo (DRCs) tse akhang komiti e ileng ea thehoa ofising ea lekala ea Fora, li ile tsa sebetsa ’moho ho hlophisa bara le barali babo rona ba libakeng tse haufi hore ba thusane ka ho fa bahoeletsi ba anngoeng ke maholiotsoana lintho tseo ba li hlokang kapele-pele. Morero ke hore libaka tse sentsoeng ke maholiotsoana ana li hahoe bocha ’me ho etsa joalo ho tl’o hloka chelete e kaalo ka lidolara tse limilione tse 2.4 (M44 544 000). Mosebetsi oo o tl’o akarelletsa ho lokisoa ha Liholo Tsa ’Muso tse robeli le matlo a 122 a bara le barali babo rona. Matlo a mang a 19 a tla hloka ho hahoa bocha.

Ofisi ea lekala e tlalehile hore bahoeletsi ba anngoeng ke leholiotsoana le bitsoang Irma ba ntse ba thusoa ka hore har’a tse ling ba eteloe ke bara babo rona ba tsoang ofising ea lekala.

Likomiti tse tharo tsa liphallelo li ile tsa phallela bahoeletsi ba 57 ba anngoeng ke maholiotsoana ana. Bara le barali babo rona ba haufinyane ba ile ba fana ka lijo, metsi, liphahlo le lintho tse ling tse hlokahalang. Ha khoeli ea October e fela, matlo ’ohle a neng a senyehile a ne a hloekisitsoe a bile a lokisitsoe ’me boholo ba mosebetsi oo o entsoe ke Lipaki tsa moo tse neng li ithaopile.

Lekala le ile la theha Komiti ea Liphallelo sehlekehlekeng sa St. Martin, la boela la etsa sebaka sehlekehlekeng sa Guadeloupe bakeng sa liphallelo, e le ho hlokomela mosebetsi oa ho lokisa libaka tse senyehileng o neng o tla hloka chelete e ka etsang lidolara tse limilione tse 1.4 (M25 984 000). Mosebetsi ona o akarelletsa ho lokisa Liholo Tsa ’Muso tse 12 tse Guadeloupe, Liholo tse peli hammoho le matlo a 24 a bara le barali babo rona a St. Martin. Baithaopi ba 22 ba kaho ba tsoang Fora, Guadeloupe le Martinique ba tla thusa ka mosebetsi ona oa liphallelo.

Bahoeletsi ba ka holimo ho 13 000 ba tšimong ea lekala lena ba ile ba angoa ke maholiotsoana. Hona joale, Likomiti Tsa Liphallelo tse ’nè li thusa bara le barali babo rona ’me li se li qetile karolo ea pele ea mosebetsi oa tsona o akarelletsang ho lokisa hoo e ka bang 95 phesente ea mehaho ea bara le barali babo rona e neng e senyehile le ho fana ka lintho tseo ba neng ba li hloka tse kang lijo le metsi. Mosebetsi oa ho lokisa o sa ntse o tsoela pele Puerto Rico, British le Lihlekehleke Tsa U.S. Virgin.

Baithaopi ba ka bang 450 ba tsoang lihlekehlekeng le ba 240 ba tsoang Florida le Georgia ba tla thusana ka ho lokisa Liholo Tsa ’Muso le matlo a bara le barali babo rona ’me kaofela ha bona ba 690. Ho bonahala mosebetsi ona oa liphallelo o hloka chelete e ka holimo ho lidolara tse limilione tse 30 (M556 800 000) ‘me o akarelletsa mesebetsi e latelang:

• Lihlekehleke tsa British le U.S. Virgin – Liholo Tsa ’Muso tse hlano le matlo a 190

• Florida – Liholo Tsa ’Muso tse 40 le matlo a 1 174

• Puerto Rico – Liholo Tsa ’Muso tse 106, Liholo tse peli tsa Likopano le matlo a 1 216

• Turks le Caicos – Liholo Tsa ’Muso tse peli le matlo a 56

Re rapela Jehova hore a matlafatse bara le barali babo rona kaofela ba thusanang ka mosebetsi ona. Re kholisehile hore mosebetsi ona o ntseng o etsoa oa ho phallela bara le barali babo rona le ho ba khothatsa ka Bibele, o tla ba thoba lipelo o be o ba thuse ho tsoela pele ba sebeletsa Jehova ba momahane.​—Nehemia 2:18.

Media Contacts:

International: David A. Semonian, Office of Public Information, +1-845-524-3000

Barbados: John Medford, +1-246-438-0655

Dominican Republic: Josué Féliz, +1-809-595-4007