Ka Labobeli la li 21 March 2017, Sehlopha se Busang sa Lipaki Tsa Jehova se ile sa kopa hore bara le barali ba bo rona lefatšeng ka bophara ba ngole mangolo ho ipiletsa ho ba boholong pusong ea Russia ba batlang ho thibela mosebetsi oa rona naheng ea Russia. Le hoja re sa tsebe hantle hore na ke mangolo a makae a fihlileng ho ba boholong Russia, ba bang ba ileng ba ngola ba ile ba fumana mangolo a reng mangolo a bona a fihlile. Le hoja ’muso oa Russia o ile oa khetha ho hlasela borapeli ba bara le barali ba bo rona le ho se mamele likopo tse tiileng tsa mangolo a ileng a ngoloa, letšolo leo le ne hlolla ’me le bontša bonngoe bo teng ka mokhatlong oa Jehova. Le ile la boela la netefaletsa bara le barali ba bo rona ba Russia hore mokhatlo ’ohle oa bara ba bo bona o ka lehlakoreng la bona.​—1 Petrose 2:17.

Lipaki Tsa Jehova tse ngata li ile tsa etsa sohle ho tšehetsa letšolo lena. Linaheng tse ling, ho romela mangolo a eang Russia ho ne ho bitsa haholo. Ka lebaka leo, bara le barali ba bo rona ba nang le hona ba ile ba thusa ba se nang bokhoni ba ho patalla litjeho tsa ho romela mangolo ao Russia e le hore le bona ba khone ho nka karolo letšolong lena. Maemong a mang, bahoeletsi ba ile ba tlameha ho kopa metsoalle ea bona e lulang linaheng tseo ho seng turu ho isa mangolo Russia, hore ba romele mangolo a bona. Bara le barali ba bo rona ba bangata ba ile ba ngola mangolo e le malapa kapa e le phutheho ’me ba a romela a le mangata ka nako e le ’ngoe. Ho ngola mangolo ka tsela ena ha oa fokoletsa bara ba bo rona litjeho feela, empa ho boetse ho entse hore ba momahane le hore ketsahalo eo e be e sa lebaleheng.

Litlaleho li bontša hore ho ile ha ba le basebeletsi ba liposo ba ileng ba tšehetsa letšolo lena. Ka mohlala, mookameli e mong oa k’hamphani e tsamaisang thepa Barranquilla, Colombia o ile a re: “Ka ’nete ke ne ke hloletsoe ha ke bona kamoo mokhatlo oa lona o momahaneng kateng. Kaofela le ne le entse tsoho la monna ho thusa balumeli ’moho le lona Russia. Ke nahana hore seo le se etsang mona Barranquilla ke sona seo Lipaki tse ling li se etsang lefatšeng ho pota. Molaetsa ona o tlo ba moholo lefatšeng ka bophara ’me ke tšepa hore batho ba bangata ba tla bona hore molaetsa ona ke oa bohlokoa.” Ha e le Anseong teng, South Korea, mookameli oa ofisi ea poso o ile a etsa mocha o khethehileng ho nolofalletsa Lipaki Tsa Jehova hore li khone ho romela mangolo. A ba a fa bara le barali ba bo rona enfelopo mahala e etselitsoeng ho romela mangolo linaheng tse ka ntle.

’Muelli oa Lipaki Tsa Jehova ea bitsoang Yaroslav Sivulskiy, o re: “Ha bara le barali ba bo rona ba Russia ba utloela hore Sehlopha se Busang se thakhotse letšolo la ho ngola mangolo molemong oa bona, ba ile ba kholiseha hore ho sa tsotellehe hore na lekhotla le tla etsang, ha ba bang tumelong.”

Mor’abo rona Mark Sanderson oa Sehlopha se Busang, o ile a re: “Letšolo lena la ho ngola mangolo, le bontša hore ho feta le ha e le neng pele, ka ’nete bahlanka ba Jehova ke ntho e le ’ngoe. Ha e le hantle re tlo hloka bonngoe bona ha e le mona re ntse re atamela bofelo ba lefatše e le hore re tle re pholohe. Joale ha re ntse re letetse ho bona hore na Jehova o tla sebetsa litaba joang Russia, re tla ’ne re etse sohle seo re ka se khonang ho thusa bara bao ba bo rona. Re tla boela re ’ne re etse kopo e tiileng ho Jehova re momahane, re kholisehile hore Molimo oa rona o tla ba hlokomela ho bata kapa ho chesa.”​—Pesaleme ea 65:2.