Ka la 16 April, 2012, toropong ea Perm’ e Russia bohareng, Aleksandr Solovyov, eo e leng e mong oa Lipaki Tsa Jehova, o ile a lefisoa li-ruble tse 1 000 (e leng liranta tse 300) ka lebaka la ho hlophisa ‘seboka sa bolumeli se seng molaong,’ holong e neng e hiriloe.

Ka mor’a hore moahloli oa lekhotla la setereke a mamele ka hloko “bopaki” bohle bo khahlanong le Solovyov, o ile a fetola qeto e neng e entsoe ke lekhotla le tlaasana ’me a hlakola tefiso eo.

Moahloli o ile a bala qeto eo ’me a sheba Paki ena e hlōtseng nyeoe ’me a re ho eona: “Ho sa tsotellehe melao e sa tsitsang le lehloeo le teng ho batho ba bang, ha re sa phela mehleng ea bo 1937 ha habonolo feela re ne re iphapanyetsa lintlha tse totobetseng. E se e ka tikoloho ea rōna e ka ba e hloekileng haholo ’me e be le boitšoaro ka lebaka la thuto ena eo le fanang ka eona.””

Ka July 1937, Stalin eo e neng e le ’musi ea hatellang oa Soviet o ile a ntša taelo ea bo 00447, e neng e tla thakhola nako ea matšoenyeho. Mang kapa mang ea neng a e-na le maikutlo a fapaneng le a ’muso o ne a tšoaroa ’me a tlisoa ka pel’a lekhotla a qosoa esita leha ho se na bopaki bo utloahalang. Litlaleho tsa nakong e fetileng li bontša hore batho ba likete ba ile ba romeloa likampong tsa mosebetsi o boima ’me ba fetang 300 000 ba ile ba ahloleloa lefu.