NEW YORK—Ka mor’a hore Lipaki Tsa Jehova li qete likhoeli tse tšeletseng li nchafatsa holo e tummeng ea Stanley Theater e Jersey City, New Jersey, li ile tsa e bula bocha ka la 13 April, 2013. Lipaki li ’nile tsa sebelisa holo ena ka lilemo tse ka bang 30, ho tšoara Likopano le liboka tse khōlō tsa thuto ea Bibele. Ho nchafatsoa ha mohaho ona ho entse hore o sebelisoe e le setsi sa thuto ea Bibele e sa lefelloeng.

Ho kentsoe litulo tse ncha tse tla etsa hore batho ba fetang 250 000 ba eang moo bakeng sa likopano tsa selemo le selemo, ba lule hamonate. Ka holong e khōlō le tse ling tse nyenyane, ho kentsoe thepa e tsoetseng pele haholo ea video bakeng sa batho ba Puo ea Matsoho ea Amerika.

Hoo e ka bang mosebetsi oohle oa ho nchafatsa holo ena o entsoe ke baithaopi ba Lipaki Tsa Jehova, ba tsoang likarolong tse fapaneng tsa United States hore ba thuse ho ntlafatsa mohaho ona oa khale o nang le histori e ikhethang.

Haesale Stanley Theater e le teng New Jersey, ho tloha mafelong a bo-1920. E ne e le e ’ngoe ea liholo tse khōlō ka ho fetisisa tseo ho bontšoang lifilimi ho tsona, tse kileng tsa hahoa United States. Holo ena e ile ea koaloa ka 1978, empa ka 1983, Lipaki Tsa Jehova tsa e ntlafatsa tsa e tlosa boemong bo bobe boo e neng e le ho bona. Lipaki li ’nile tsa sebelisa holo ena e le sebaka sa ho ithuta Bibele, ho tloha ha li e khakola ka 1985.

Ha a bua ka lintlafatso tse sa tsoa etsoa, ’muelli oa Lipaki Tsa Jehova, e leng J. R. Brown, o re: “Stanley Theater, e sebelisetsoa liketsahalo tse amanang le borapeli, ’me ho tla batho ba buang lipuo tse fetang 15 ho tla ithuta Bibele. Empa e boetse e ratoa ke batho ba New Jersey, ’me mokhatlo oa rōna o thabela ho e boloka e ntse e shebahala ka tsela eo e neng e le ka eona pele.”

Raliphatlalatso:

Raliphatlalatso oa Machaba: J. R. Brown, Ofisi ea Boitsebiso, tel. +1 718 560 5000