NEW YORK—Ka la 5 July, 2013, Lipaki Tsa Jehova li ile tsa saena tumellano ea ho rekisetsa Lik’hamphani tsa RFR le Kushner mehaho e mehlano eo pele li neng li e sebelisetsa ho hatisa Brooklyn, New York, hammoho le mohaho oa bolulo o mekato e 30. Lipaki li tla qala ho tsoa mehahong eo ka August selemong sena. Basebetsi ba lulang moo ba tla tsoa mehahong ea bolulo ka 2017.

David Semonian, e leng ’muelli oa Lipaki Tsa Jehova o re: “Batho ba bangata ba sebelisang lipalangoang le baeti New York City, ba bona letšoao le reng ‘Bala Lentsoe la Molimo, Bibele e Halalelang Letsatsi le Letsatsi’ le le reng ‘Bala Molula-Qhooa le Tsoha!’ mehahong ena ha ba feta Borokhong ba Brooklyn. Ka lilemo tse ngata, mosebetsi o ’nileng oa etsoa mehahong ena o ne o emela karolo e khōlō ea nalane ea mokhatlo oa rōna le boteng ba rōna Brooklyn.” Ka lilemo tse 77, Lipaki li ’nile tsa sebeletsa mehahong ena e mehlano ho hatisa Libibele le lingoliloeng tse rutang Bibele ka lipuo tse ngata. Li ile tsa qala ho sebeletsa mehahong ea pele ka 1927, ’me mathoasong a 1937, ha eketsoa mehaho. Ho ne ho lula batho ba sekete mohahong oa bolulo o mekato e 30, ’me ba sebetsa haufi le moo ba lulang.

Lipaki li rekisa mehaho ena e le ha li lokisetsa ho fallela ka leboea ho Brooklyn. Ka 2004, li ile tsa khaotsa ho etsetsa mosebetsi oa tsona oa ho hatisa, ho kopanya libuka le ho romela lingoliloeng United States, empa tsa o etsetsa Wallkill, New York. Hona joale, Lipaki li rera ho fallisetsa ntlo-khōlō ea tsona Warwick, New York, ’me li tla qala mosebetsi oa ho haha mafelong a selemo sena.

Monghali Semonian o phaella ka ho re: “Re ananela lilemo tseo re li qetileng Brooklyn. Re ’nile ra sebelisa mehaho ena ho hlahisa lingoliloeng tse thehiloeng Bibeleng tse thusang batho lefatšeng ka bophara. Hona joale, re labalabela ho sebelisa mehaho ea rōna e mecha e Warwick, ho tsoela pela re etsa mosebetsi oa rōna oa ho ruta Bibele lefatšeng lohle.”

Raliphatlalatso:

Raliphatlalatso oa Machaba: J. R. Brown, Ofisi ea Boitsebiso, tel. +1 718 560 5000