NEW YORK—Ka Mantaha oa la 29 July, 2013, Lipaki Tsa Jehova li ile tsa qala ho haha ntlo-khōlō ea tsona e ncha Warwick, New York, ka mor’a hore li fumane tumello ho ba boholong sebakeng seo.

Ka Laboraro la la 17 July, Boto ea Meralo ea Toropo ea Warwick e ile ea amohela polane ea ho haha ntlo-khōlō e ncha ea Lipaki, e leng kōpo ea ho qetela e neng e tlameha ho amoheloa e le hore ho qaloe mosebetsi oa kaho. Lipaki li ile tsa fumana tumello ena ka mor’a lilemo tse ’nè li rekile setša sa Warwick ka la 17 July, 2009. Ka mor’a ho fumana tumello ka Labohlano la la 26 July, Lipaki li ile tsa qala ho cheka setšeng ka Mantaha oa la 29 July.

Ntho e ka sehloohong e ileng ea etsa hore boto ea toropo e lumelle Lipaki ho haha, ke ho ikemisetsa ha tsona ho sebelisa thepa e seng kotsi tikolohong. Ka mohlala, e le hore li sireletse tikoloho, li tla etsa mekoallo e thibelang khoholeho ea mobu le ho thibela liphoofolo tse hlaha, tse kang linoha hore li se ke tsa kena sebakeng seo ho ntseng ho hahoa ho sona.

Richard Devine, e leng ’muelli oa Lipaki o re: “Re thabela ho sebelisana-’moho le ba boholong motseng ona oa Warwick le ho tsoela pele ka mosebetsi oa rōna. Tumello ena eo re e fuoeng ke boto ea meralo ke karolo ea bohlokoa haholo e tla re thusa ho ntšetsa pele mosebetsi oa ho fallisa ntlo-khōlō ea rōna e Brooklyn ho e isa Warwick.” Enrique Ford ea komiting ea kaho ea Lipaki le Monghali Devine, o phaella ka ho re: “Ho fumana polane ena ea ho haha le tumello e khethehileng ka July, e bile ntho ea bohlokoa e tla re thusa ho rala mosebetsi oa rōna oo re rerang ho o qeta ka lilemo tse ’nè.”

Pele sebaka sena e ne e le sa K’hamphani ea Machaba ea Tšepe ea Nickel, ’me se sebelisetsoa merero e fapaneng e akarelletsang, ho ba ntlo-khōlō le moo ho etsetsoang lipatlisiso teng ho tloha ka 1960 ho fihlela ka 1987. Ka mor’a hore se lule se sa sebelisoe ka lilemo tse ka bang ’nè, se ile sa rekoa ke K’holeje ea King ka morero oa ho se etsa k’holeje e khōlō. Morero oo ha o oa ka oa atleha hobane se ile sa qeta lilemo tse fetang 20 se sa sebelisoe ho fihlela Lipaki li se reka ka 2009.

Raliphatlalatso:

Raliphatlalatso oa Machaba: J. R. Brown, Ofisi ea Boitsebiso, tel. +1 718 560 5000