BACHA BAA BOTSA
Ke Hobane’ng ha Eka Batsoali ba ka ha ba Batle ha ke Ithabisa?
Metsoalle ea hao e u memme phathing mafelo-beke ’me u kopa batsoali ba hao hore u ee empa karabo ea bona ke “che.” Ha u makale hobane le nakong e fetileng ba arabile ka tsela e tšoanang.
Sehloohong sena
Ke hobane’ng ha batsoali ba ka ba lula ba hana?
Haeba ho bonahala eka batsoali ba hao ba lula ba hana, u ka ’na oa nahana hore ha ba batle u thabe.
Mocha e mong ea bitsoang Marie o ile a ikutloa joalo ha a ba le fono. O re: “Ntate oaka o ile a beha melao e mengata, hore na ke daonlouda li app life, ke bua le batho bafe le hore na ke bua le bona ka linako life. Ka nako eo, metsoalle eaka eona e ne e etsa ntho leha e le efe eo ba e batlang.”
Nahana ka sena: Na ntate oa Marie o ne a sa batle a thabe? Ke’ng seo a neng a khathatsehile ka sona?
Lebelo leo u sa lokelang ho le feta ha u khanna le u thibela hore u se ke oa hlaheloa ke kotsi, ka tsela e tšoanang ho joalo le ka melao eo batsoali ba u behelang eona
Leka sena: Iketse eka u motsoali oa mocha ea qetang ho ba le fono. U ne u ka khathatseha ka eng? Ke meeli efe eo u ka e behelang ngoana oa hao? U ne u ka re’ng haeba ngoana oa hao a ne a ka re ha u batle hore a thabe?
“Ntate oaka o ne a rata hore, ‘Ikenye lieteng tsaka.’ Ho etsa joalo ho ne ho nthusa hore ke bone melemo ea melao ea hae le mabaka ao a entseng melao eo ka oona. Haeba ke ne ke e-na le bana, ke ne ke tla lebella hore ba etse lintho ka tsela eo ntate oaka a lebellang hore ke etse lintho ka eona.”—Tanya.
Ke’ng seo nka se etsang hore batsoali baka ba lumele?
Seo u sa lokelang ho se etsa: Ho teneha, ho tletleba le ho etsa khang.
“Ho omana ho ke ke ha le thusa ka letho, ebile ho ka le khathatsa. Ha u etsa khang, batsoali ba hao ba ke ke ba u bona u holile ’me u ke ke oa khona ho iketsetsa liqeto.”—Richard.
Leka ho etsa sena: Nahana pele u bua. Nahana hore na batsoali ba hao ba ikutloa joang. Na bothata ke hore ba u tšepe, kapa ha ba tšepe sebaka seo u tla be u le ho sona kapa batho bao u tla beng u e-na le bona? Bua le batsoali ba hao u khobile matšoafo e le hore u ka utloisisa mabaka a bona hantle.
“Ho lula ho e-na le mabaka a utloahalang a ho beha melao. Batsoali baka ha ba nthibele hore ke thabe, empa ba batla ke thabe ka tsela e ke keng ea ntlisetsa mathata.”—Ivy.
Molao-motheo oa Bibele: “Motho ea se nang kelello o ntša khalefo ea hae empa motho ea bohlale oa e laola”—Liproverbia 29:11.
Seo u sa lokelang ho se etsa: Ho etsa lintho tseo batsoali ba hao ba itseng u se ke oa li etsa u ipatile.
“Ha ke le mong ke ne ke etsa lintho tseo ntate oa ka a itseng ke se ke ka li etsa ka fono. Ke ile ka etsetsa metsoalle ea ka melaetsa bosiu haholo ka ba ka daonlouda li app tseo ntate oa ka a neng a sa ntumella ho ba le tsona. Ho e-so ee kae o ne a ee a hlokomele seo ke neng ke se etsa ebe lithibelo tsa hae li ba boima le ho feta hobane o ne a se a sa ntšepe. Ha se bohlale ho etsa lintho tseo u sa lumelloang ho li etsa.”—Marie.
Leka ho etsa sena: Bontša batsoali ba hao hore u ka ba mamela e le hore ba ka u tšepa.
“Mamella. Ho ka nka nako hore batsoali ba hao ba fetole lithibelo empa haeba u ba mamela ba ka u lumella ho etsa lintho tse eketsehileng.”—Melinda.
Molao-motheo oa Bibele: “Le mamele batsoali ba lona linthong tsohle.”—Bakolose 3:20.
Seo u sa lokelang ho se etsa: U se ke qobella batsoali ba hao hore ba u lumelle ho etsa ntho e itseng, mohlomong oa ba bollela hore na lithaka tsa hao tsona li lumelletsoe ho etsa’ng.
“Ho tsitlella seo u se batlang ho tla etsa hore lintho li be thata le ho feta.”—Natalie.
Leka ho etsa sena: Ngola maikutlo a hao sehloohong se reng “Fana ka Mabaka Mabapi le Melao” ebe u buisana ka sona le batsoali ba hao.
“Motsoali o batla ho kholiseha hore u khona ho etsa liqeto tse nepahetseng. Kahoo, ha ke bua le batsoali ba ka ke leka ho beha mabaka a utloahalang eseng ke khannoe ke maikutlo. Ha ke etsa joalo, ka linako tse ling batsoali ba ka ba ntumella ho etsa ntho eo ke e kopang.”—Joseph.
Molao-motheo oa Bibele: “Hlompha ntate oa hao le ’mè oa hao.”—Baefese 6:2.
