Bibele e hlalosa liphello tse bosula tsa ho lieha ho etsa lintho. E re: “Ea shebellang moea a ke ke a jala peō; ’me ea talimang maru a ke ke a kotula.”​—Moeklesia 11:4.

 Ak’u hlahlobe tse ling tsa lintho tseo e ka bang bothata le seo u ka se etsang ho khaotsa ho lieha ho etsa lintho.

 Ho bua ’nete, mesebetsi e meng e nyahamisa hoo ho leng bonolo hore re e chechisetse morao. Litlhahiso tse ’maloa ke tsena.

•   Etsa mosebetsi hanyane ka hanyane. Ngoanana e mong ea bitsoang Melissa o re: “Le hoja ke tseba hore ke saletse morao, ke leka ho etsa ntho e le ’ngoe ka nako.”

•   Qala hang-hang. “Hang ha u fuoa mosebetsi, o etse, le haeba hoo ho bolela hore u o ngole lethathamong la lintho tseo u lokelang ho li etsa, kapa hona ho ngola lintlha tse itseng ka oona pele u li lebala.”​—Vera.

•   Kōpa thuso. E ka ’na eaba batsoali kapa matichere a hao, ba kile ba ba le bothata bo tšoanang. Ke hobane’ng ha u sa anye bohlaleng ba bona? Ba ka ’na ba u thusa hore u hlophise lintlha tsa hao hantle le ho etsa moralo.

 Keletso “Etsa kemiso. ’Nete ke hore seo se hloka hore u hlophise lintho tsa hao hantle le hore u ikemisetse ho e khomarela, u ka atleha​—u tla etsa ntho e ’ngoe le e ’ngoe ka nako ea teng.”​—Abbey.

 Hangata, mesebetsi eo u lokelang ho e etsa e ka akarelletsa lintho tseo u sa li rateng. Kahoo, u ka etsa’ng haeba u lokela ho etsa mosebetsi oo u sa o rateng? Ak’u leke lintho tse latelang.

•   Fumana lebaka la ho o etsa kapele. Ka mohlala, nahana feela hore na u tla thaba joang ha u se u o qetile. Ngoanana e mong ea bitsoang Amy o re: “Kea thaba ha ke qetile ho etsa mosebetsi oa ka ka nako, kapa pele ho nako, hobane joale nka khona ho phomola.”

•   Nahana ka liphello. Haeba u lieha, u ipeha tlas’a khatello ’me u itšoara matsoho. Bibele e re: “Seo motho a se jalang, ke sona seo a tla se kotula.”​—Bagalata 6:7, Bibele Phetolelo e Ncha.

•   Nka eka nako ea ho qeta mosebetsi e haufinyane. Ngoanana e mong ea bitsoang Alicia o re: “Hoa nthusa haeba ke etsa eka nako eo ke lokelang ho phetha mosebetsi ka eona ke letsatsi kapa a mabeli pele ho nako ea teng. Seo se mpha nako ea hore ke hlahlobe hore na ke o entse hantle, hape se mpha letsatsi kapa a mabeli bakeng sa haeba ho ka hlaha ntho e ’ngoe.”

 Keletso “Taba ke hore na u nahana joang. Ipolelle hore u tla etsa seo u lokelang ho se etsa le hore ha ho letho le tla u thibela. Haeba ke ipolella seo, ke phetha mosebetsi oa ka.”​—Alexis.

 Nathan o re: “Hangata batho ba re ke lieha ho etsa lintho, empa hase ’nete taba eo! Ha ba bone hore na ke phathahane hakae!” Haeba u ikutloa joaloka Nathan, leka ho sebelisa likeletso tsena.

•   Qala ka mesebetsi e bonolo. Ngoanana ea bitsoang Amber o re: “Motho e mong o ile a nthuta hore haeba mosebetsi o nka metsotso e ’maloa feela, u etse hang-hang. Mesebetsi eo e akarelletsa ho hloekisa, ho paka liphahlo, ho hlatsoa lijana kapa ho letsetsa motho e mong.”

•   Qala ka lintho tsa bohlokoa. Bibele e re: “Nepisisa lintho tsa bohlokoa haholo.” (Bafilipi 1:10) U ka sebelisa keletso ee joang bophelong? Ngoanana ea bitsoang Anna o re: “Ke boloka tlaleho ea lintho tsohle tseo ke lokelang ho li etsa, le hore na li lokela ho phethoa neng. Empa ntho ea bohlokoa eo ke e etsang ke ho ngola hore na ke rera ho etsa mosebetsi o mong le o mong neng, le hore na ke tla o qeta neng.”

 Na seo se bonahala se le thata? Nahana hantle. ’Nete ke hore ha u etsa kemiso, u laola nako ea hao, ho e-na le ho lumella hore nako e u laole. Seo se tla u imolla. Ngoanana ea bitsoang Kelly o re: “Ho ba le kemiso ho etsa hore ke khobe matšoafo le ho etsa hore lintho li lule malulong.”

•   Tlosa litšitiso. Jennifer o re: “Ke etsa hore e mong le e mong ka lapeng, a tsebe ha ke qala mosebetsi oa ka. Haeba ho na le ntho e itseng eo ba batlang hore ke e etse, ke ba kōpa hore ba mpolelle pele ke qala mosebetsi oa ka. Hape ke tima molumo o ntlhokomelisang ha melaetsa e kena founong.”

 Keletso “Mosebetsi leha e le ofe oo u lokelang ho o etsa, o ke ke oa fela ntle le hore u o etse. O etse ho e-na le ho lula u tšoenyehile ka oona. Ha u etsa joalo u tla khona ho phomola ka mor’a moo.”​—Jordan.