Re Ithuta’ng ho Basali ba Hlahang ka Bibeleng?

BAPALA

Karabo ea Bibele

Ka Bibeleng ho na le basali ba bangata bao re ka ithutang lintho tsa bohlokoa tseleng eo ba neng ba phela ka eona. (Baroma 15:4; 2 Timothea 3:16, 17) Sehlooho sena se tl’o bua hakhutšoanyane ka ba bang ba basali bao ho builoeng ka bona ka Bibeleng. Ba bangata ba bona ke mehlala e metle eo re ka e latelang. Ha ba bang bona e le mehlala e re lemosang.—1 Bakorinthe 10:11; Baheberu 6:12.

Abigaile

Abigaile e ne e le mang? Abigaile e ne e le mosali oa monna e mong oa morui ea khopo ea bitsoang Nabale. Leha ho le joalo, Abigaile eena o ne a e-na le temoho, a ikokobelitse, a le motle ebile a rata Jehova.—1 Samuele 25:3.

O ile a etsa’ng? Abigaile o ne a le bohlale ebile a e-na le temoho ’me seo se ile sa mo thusa ho qoba tlokotsi e neng e tla hlahela lelapa la hae. Eena le Nabale ba ne ba lula sebakeng seo Davida, e leng morena ea neng a tl’o busa Iseraele, a neng a ipatile ho sona ha e ntse e le ’malehi. Ha Davida le banna ba hae ba ntse ba le moo, ba ile ba sireletsa mohlape oa Nabale oa linku ho masholu. Ha bahlanka ba Davida ba il’o kopa Nabale lijo, o ile a ba halefela ’me a hana ho ba fa lijo. Davida o ile a halefa haholo. Kahoo, eena le banna ba hae ba ile ba tsoa ho ea bolaea Nabale le bahlanka bohle ba ntlo ea hae.—1 Samuele 25:10-12, 22.

Abigaile o ile a nka khato kapele ha a utloa hore na monna oa hae o entse’ng. O ile a fa bahlanka ba hae lijo hore ba li ise ho Davida le banna ba hae, eaba o ba sala morao ho ea kopa mohau ho Davida. (1 Samuele 25:14-19, 24-31) Ha Davida a bona mpho ea hae, o ile a hlokomela hore o ikokobelitse ’me a mamela keletso ea hae, a ba a elelloa hore ke Molimo ea mo sebelisitseng ho mo thibela ho bolaea Nabale le bahlanka ba hae. (1 Samuele 25:32, 33) Nakoana ka mor’a moo, Nabale o ile a shoa ’me Abigaile e ile ea e-ba mosali oa Davida.—1 Samuele 25:37-41.

Re ka ithuta eng ho Abigaile? Le hoja Abigaile a ne a le motle ebile e le morui, o ne a sa inke e le motho oa bohlokoa haholo. E le ho boloka khotso, o ne a ikemiselitse ho kopa tšoarelo ka phoso e sa etsoang ke eena. O ile a khoba matšoafo ha a ne a sebetsana le boemo bo ka ’nang ba e-ba kotsi, a sebetsana le bona ka masene le ka sebete.

▸ Ho ithuta ka ho eketsehileng ka Abigaile, bala sehlooho se reng “O Ile a Sebetsa Taba ka Masene.”

Debora

Debora e ne e le mang? E ne e le moprofeta oa mosali eo Molimo oa Iseraele, Jehova, a ileng a mo sebelisa ho phetha thato ea hae litabeng tse neng li ama batho ba hae. Molimo o ile a ba a mo sebelisa ho rarolla mathata a neng a le teng har’a Baiseraele.—Baahloli 4:4, 5.

O ile a etsa’ng? Ka sebete moprofeta enoa oa mosali Debora o ile a tšehetsa barapeli ba Molimo. Ka tataiso ea Jehova, o ile a laela Barake hore a etelle pele masole a Baiseraele khahlanong le bahatelli ba Bakanana. (Baahloli 4:6, 7) Ha Barake a kopa Debora hore a tsamaee le eena, ha aa ka a tšaba letho empa o ile a tsamaea le eena.—Baahloli 4:8, 9.

Ka mor’a hore Molimo a thuse Baiseraele ho hlola, Debora o ile a qapa karolo ea pina eo ba ileng ba e bina le Barake e buang ka ketsahalo eo. Pineng eo o ile a bua ka karolo eo Jaele, e leng mosali e mong ea sebete, a ileng a e bapala e le hore ho hloloe Bakanana.—Baahloli, khaolo ea 5.

Re ka ithuta eng ho Debora? Debora o ne a itetse ebile a le sebete. O ile a khothalletsa ba bang ho etsa se lokileng mahlong a Molimo. Ha ba ne ba mamela, o ne a ba babatsa.

▸ Ho ithuta ka ho eketsehileng ka Debora, bala sehlooho se reng “Ke Ema Joaloka ’Mè Iseraele.”

Delila

Delila e ne e le mang? E ne e le mosali eo moahloli oa Moiseraele, e leng Samsone a ileng a ratana le eena.—Baahloli 16:4, 5.

O ile a etsa’ng? O ile a amohela chelete ho tsoa ho marena a Bafilista e le hore a eke Samsone, eo Molimo a ileng a mo sebelisa ho lopolla Baiseraele ho Bafilista. Bafilista ba ne ba sa khone ho hlola Samsone hobane o ne a e-na le matla a sa tloaelehang. (Baahloli 13:5) Ke kahoo, marena a Bafilista a ileng a kopa Delila hore a ba thuse.

Bafilista ba ile ba fa Delila chelete e le hore a fuputse hore na Samsone o nka matla a hae a maholo hokae. Delila o ile a e amohela ’me a leka ka makhetlo a ’maloa ho fihlela qetellong a mo joetsa lekunutu la hore na o nka matla a hae a maholo hokae. (Baahloli 16:15-17) Qetellong, Delila o ile a bolella Bafilista lekunutu la Samsone, eaba baa mo tšoara le ho mo kenya teronkong.—Baahloli 16:18-21.

Re ka ithuta eng ho Delila? Delila ke mohlala o re lemosang. O ile a lumella hore meharo e etse hore a be bolotsana, a se ke a tšepahala hape a se ke a ameha ka mohlanka oa Jehova Molimo.

Esthere

Esthere e ne e le mang? Ke mosali oa Mojuda ea ileng a khethoa ke Morena Asueruse oa Persia hore e be mofumahali oa hae.

O ile a etsa’ng? Mofumahali Esthere o ile a sebelisa matla ao a neng a e-na le ’ona ho thibela hore batho ba habo ba se ke ba bolaoa ka sehloho. O ile a utloela ka mangolo a nang le litaelo a neng a rometsoe a bile a e-na le lintlha tsa hore Bajuda bohle ba pusong ea Persia ba tla bolaoa neng. Leano lena le lebe e ne e le la Hamane, eo e neng e le tona-kholo. (Esthere 3:13-15; 4:1, 5) Ka thuso ea motsoal’ae ea seng a holile, Mordekai, Esthere o ile a beha bophelo ba hae kotsing eaba o bolella monna oa hae, Morena Asueruse, ka leano lena. (Esthere 4:10-16; 7:1-10) Asueruse o ile a lumella Esthere le Mordekai ho fana ka taelo e ’ngoe hape e neng e lumella Bajuda hore ba itoanele. Bajuda ba ile ba hlola lira tsa bona.—Esthere 8:5-11; 9:16, 17.

Re ka ithuta eng ho Esthere? Mofumahali Esthere o ile a beha mohlala o motle oa sebete, boikokobetso le boinyenyefatso. (Pesaleme ea 31:24; Bafilipi 2:3) Le hoja a ne a le motle ebile e le mofumahali, o ne a ikokobelitse a bile a kopa ba bang thuso. Ha a bua le monna oa hae, o ne a khetha mantsoe, a mo hlompha empa a le sebete. Ha Bajuda ba le kotsing, o ile a ba sebete ’me a itsebahatsa e le e mong oa bona.

▸ Ho ithuta ka ho eketsehileng ka Esthere, bala lihlooho tse reng “O Ile a Emela Batho ba Molimo” le “O ne a le Bohlale, a le Sebete a Bile a Itetse.”

Eva

Eva e ne e le mang? E ne e le mosali oa pele ebile ke eena mosali oa pele eo ho buuoang ka eena ka Bibeleng.

O ile a etsa’ng? Eva ha aa ka a mamela taelo ea Molimo e hlakileng. Joaloka monna oa hae, Adama, le eena o ne a phethahetse ’me a e-na le bolokolohi ba ho ikhethela le bokhoni ba ho bonahatsa makhabane a Molimo, joaloka lerato le bohlale. (Genese 1:27) Eva o ne a tseba hore Molimo o boleletse Adama hore ha ba ka ja sefate se itseng, ba tla shoa. Leha ho le joalo, o ile a thetsoa ’me a lumela hore a ke ke a shoa. Ha e le hantle, o ile a susumelletsoa ho lumela hore lintho li ka mo tsamaela hantle haeba a sa mamele Molimo. Kahoo, o ile a ja tholoana ’me hamorao a susumelletsa le monna oa hae hore a e je.—Genese 3:1-6; 1 Timothea 2:14.

Re ka ithuta eng ho Eva? Eva ke mohlala o re lemosang oa kotsi ea ho lula u nahana ka takatso e fosahetseng. O ile a e-ba le takatso e matla ea ho nka seo e seng sa hae eaba ha a mamele taelo e hlakileng ea Molimo.—Genese 3:6; 1 Johanne 2:16.

Anna

Anna e ne e le mang? E ne e le mosali oa Elkana ebile e le ’mè oa Samuele, eo e ileng ea e-ba moprofeta ea hlahelletseng Iseraeleng ea boholo-holo.—1 Samuele 1:1, 2, 4-7.

O ile a etsa’ng? Ha Anna a ntse a se na bana, o ile a kopa Molimo hore a mo tšelise. Monna oa Anna o ne a e-na le basali ba babeli. Mosali oa hae e mong, Penina, o ne a e-na le bana. Le hoja Anna a ne a se a e-na le nako e telele a nyetsoe, o ne a se na bana. Penina o ne a lula a mo soma, empa Anna o ile a rapela Molimo hore a mo tšelise. O ile a etsa boitlamo ho Molimo, a re haeba Molimo a ka mo fa mora, o tla fana ka eena hore a sebeletse tabernakeleng, e leng tente eo Baiseraele ba neng ba rapella ho eona.—1 Samuele 1:11.

Molimo o ile a arabela thapelo ea Anna ’me o ile a ba le ngoana ea bitsoang Samuele. Anna o ile a phethahatsa tšepiso ea hae ’me a isa Samuele tabernakeleng ha e sa le moshanyana. (1 Samuele 1:27, 28) Selemo le selemo, o ne a mo etsetsa seaparo se se nang matsoho ebe o mo isetsa sona. Molimo o ile a hlohonolofatsa Anna ka bana ba bang hape ba bahlano e leng bashanyana ba bararo le banana ba babeli.—1 Samuele 2:18-21.

Re ka ithuta eng ho Anna? Lithapelo tsa Anna tse tsoang pelong li ile tsa mo thusa hore a mamelle mathata. Thapelo ea hae ea teboho e tlalehiloeng ho 1 Samuele 2:1-10 e bontša hore o ne a e-na le tumelo e matla ho Molimo.

▸ Ho ithuta ka ho eketsehileng ka Anna, bala sehlooho se reng “O Ile a Tšollela Pelo ea Hae ho Molimo ha a Rapela.”
▸ Ho utloa hore na ke hobane’ng ha Molimo a ne a lumella sethepu mehleng ea boholo-holo, bala sehlooho se reng “Na Molimo o Lumella Lenyalo la Sethepu?”

Jaele

Jaele e ne e le mang? E ne e le mosali oa Hebere, eo e neng e se Moiseraele. Jaele o ile a emela batho ba Molimo ka sebete.

O ile a etsa’ng? Jaele o ile a nka bohato kapele ha molaoli oa lebotho la Bakanana, e leng Sisera, a fihla tenteng ea hae. Sisera o ne a hlotsoe ntoeng ke Baiseraele ’me a batla moo a ka ipatang teng. Jaele o ile a mo memela tenteng ea hae hore a tl’o ipata le ho phomola. Ha a ntse a robetse, o ile a mo bolaea.—Baahloli 4:17-21.

Jaele o ile a phethahatsa boprofeta bo builoeng ke Debora ha a re: “Jehova o tla etsa hore mosali e be eena ea hlolang Sisera.” (Baahloli 4:9) Ka lebaka la seo a se entseng, Jaele o ile a rorisoa ’me ha thoe ke “mosali ea hlohonolofetseng ho feta ba bang.”—Baahloli 5:24.

Re ka ithuta eng ho Jaele? Jaele o ile a nka bohato ka pele ’me a e-ba sebete. Pale ea hae e bontša hore Molimo a ka laola lintho e le hore li phethahatse boprofeta.

Jezebele

Jezebele e ne e le mang? E ne e le mosali oa Morena Akabe oa Iseraele. E ne e se Moiseraele ’me a sa rapele Jehova empa o ne a rapela molimo oa Bakanana ea bitsoang Baale.

O ile a etsa’ng? Mofumahali Jezebele o ne a rata ho laola batho, a le khopo a bile a le mabifi. O ne a khothalletsa batho ho rapela Baale le ho etsa boitšoaro bo bobe bo amanang le thobalano bo neng bo amana le borapeli boo. Ka nako e tšoanang, o ne a leka ho felisa borapeli ba Molimo oa ’nete, Jehova.—1 Marena 18:4, 13; 19:1-3.

Jezebele o ne a bua leshano ebile a bolaea batho hore a fumane seo a se batlang. (1 Marena 21:8-16) Joalokaha Molimo a ne a boletse, o ile a bolaoa ka sehloho ’me ha a ka a patoa.—1 Marena 21:23; 2 Marena 9:10, 32-37.

Re ka ithuta eng ho Jezebele? Jezebele ke mohlala o re lemosang. O ne a itšoere hampe ebile a ka etsa ntho e ’ngoe le e ’ngoe hore a fumane seo a se batlang. Lebitso la hae le emela mosali ea se nang lihlong, ea itšoereng hampe le ea sa hlompheng bolaoli.

Lea

Lea e ne e le mang? E ne e le mosali ea moholo oa mopatriareka Jakobo. Eena le ngoan’abo Ragele, e ne e le basali ba Jakobo.—Genese 29:20-29.

O ile a etsa’ng? Lea le Jakobo ba ile ba e-ba le bara ba tšeletseng. (Ruthe 4:11) Jakobo o ne a batla ho nyala Ragele eseng Lea. Leha ho le joalo, ntate oa bona Labane o ile a etsa hore ho nyaloe Lea ho e-na le hore ho nyaloe Ragele. Ha Jakobo a hlokomela hore o qhekelletsoe hore a nyale Lea, o ile a bua le Labane. Labane o ile a ikarabella ka hore ha hoa tloaeleha hore ho fanoe ka ngoanana e monyenyane pele ho e moholo. Beke hamorao, Jakobo o ile a nyala Ragele.—Genese 29:26-28.

Jakobo o ne a rata Ragele ho feta Lea. (Genese 29:30) Kahoo, Lea o ile a monela ngoan’abo ’me a hlolisana le eena e le hore Jakobo a mo rate. Molimo o ile a bona kamoo Lea a ikutloang kateng eaba o mo hlohonolofatsa ka bana ba supileng e leng bara ba tšeletseng le morali a le mong.—Genese 29:31.

Re ka ithuta eng ho Lea? Lea o ne a tšepile Molimo ’me a mo rapela, le hoja a ne a e-na le mathata ka lapeng, o ne a sa a lumelle hore a mo sitise ho bona kamoo Molimo a mo thusang kateng. (Genese 29:32-35; 30:20) Tlaleho ea hae e re bontša kamoo ho nyala basali ba bangata ho neng ho sa atlehe le hoja Molimo a ile a ho lumella ka nakoana. Hona joale o lumella hore monna kapa mosali a be le molekane a le mong.—Matheu 19:4-6.

▸ Ho ithuta ka ho eketsehileng ka Lea, bala sehlooho se reng “Barali ba Motho ba Mahlomoleng ba ‘Hahileng Ntlo ea Iseraele.’”
▸ Ho ithuta hore na ke hobane’ng ha Molimo a ile a lumella sethepu ka nakoana mehleng ea boholo-holo, bala sehlooho se reng “Na Molimo o Lumella Lenyalo la Sethepu?”

Maretha

Maretha e ne e le mang? E ne e le khaitseli ea Lazaro le Maria ’me boraro ba bona ba ne ba lula haufi le Jerusalema motseng oa Bethani.

O ile a etsa’ng? Maretha e ne e le motsoalle ea haufi oa Jesu ’me Jesu “o ne a rata Maretha, Maria le Lazaro.” (Johanne 11:5) Maretha e ne e le mosali ea ratang ho amohela baeti. Ka le leng, ha Jesu a ba etetse, Maria o ile a khetha ho mamela Jesu ha Maretha a ntse a etsa mosebetsi oa lapeng. Maretha o ile a tletleba ho Jesu hore Maria ha a mo thuse. Ka mosa, Jesu o ile a lokisa tsela eo Maretha a nahanang ka eona.—Luka 10:38-42.

Ha Lazaro a kula, Maria le Maretha ba ile ba bitsa Jesu, ba kholisehile hore o tla mo folisa. (Johanne 11:3, 21) Empa Lazaro o ile a shoa. Puisano ea Maretha le Jesu e ile ea bontša hore tsoho ea bafu e hlahang ka Bibeleng e tla ba teng le hore Jesu o na le matla a ho tsosa khaitseli ea hae bafung.—Johanne 11:20-27.

Re ka ithuta eng ho Maretha? Maretha o ne a thabela ho amohela baeti, a amohela keletso ebile a lokolohile ho ntša maikutlo a hae le ho bua ka tumelo ea hae.

▸ Ho ithuta ka ho eketsehileng ka Maretha, bala sehlooho se reng “Ke Lumetse.”

Maria (’mè oa Jesu)

Maria e ne e le mang? E ne e le ngoanana oa Mojuda ’me e ne e ntse e le moroetsana ha a ima ka mohlolo le ho tsoala mora oa Molimo, Jesu.

O ile a etsa’ng? Maria o ile a etsa thato ea Molimo ka boikokobetso. Josefa o ne a mo lebellelitse nakong eo lengeloi le fihlang ho eena ’me le mo bolella hore o ne a tla ima ’me a tsoale Mesia eo e leng khale a tšepisitsoe. (Luka 1:26-33) O ile a amohela boikarabelo boo a bo filoeng ka ho rata. Ka mor’a hore Jesu a tsoaloe, Maria le Josefa ba ile ba e-ba le bara ba bane le bonyane barali ba babeli. Kahoo, Maria ha aa ka a lula e le moroetsana. (Matheu 13:55, 56) Le hoja a ile a thabela tokelo ena e ikhethang, ha ho mohla a ileng a batla ho rorisoa, ebang e ne e le nakong ea tšebeletso ea Jesu kapa e le setho sa phutheho ea pele ea Bokreste.

Re ka ithuta eng ho Maria? Maria e ne e le mosali ea tšepahalang ea ileng a amohela boikarabelo bo boholo ka ho rata. O ne a e-na le tsebo e ikhethang ea Mangolo. Ho hakanngoa hore o ile a qotsa Mangolo ka makhetlo a ka bang 20 ha a ne a bua mantsoe a tlalehiloeng ho Luka 1:46-55.

▸ Ho ithuta ka ho eketsehileng ka Maria, bala sehlooho se reng “Re ka Ithuta’ng Mohlaleng oa Maria?”

Maria (khaitseli ea Maretha le Lazaro)

Maria e ne e le mang? Maria, Lazaro le Maretha, e ne e le metsoalle e haufi ea Jesu.

O ile a etsa’ng? Maria o ile a bontša hore o ananela hore Jesu ke Mora oa Molimo. O ne a lumela hore Jesu a ka be a thibetse khaitseli ea hae, Lazaro ho shoa hape o ne a le teng ha Jesu a mo tsosa. Ngoan’abo Maretha, o ile a utloa bohloko ha a sa mo thuse ka mesebetsi ea ka lapeng empa a khetha ho mamela Jesu. Leha ho le joalo, Jesu o ile a babatsa Maria ka hore o khethile ho tseba haholoanyane ka Jehova ho tle pele bophelong ba hae.—Luka 10:38-42.

Maria o ile a bontša Jesu kamohelo ea baeti ka ho mo tšela ka “oli e turu e nkhang hamonate” hloohong le maotong. (Matheu 26:6, 7) Batho ba bang ba neng ba le teng moo, ba ile ba qosa Maria ka hore oa senya. Empa Jesu o ile a mo buella ka ho re: “Kae kapa kae moo litaba tsena tse monate tsa ’Muso li boleloang teng lefatšeng lohle, ketso ea mosali enoa le eona e tla boleloa e le hore a hopoloe ka eona.”—Matheu 24:14; 26:8-13.

Re ka ithuta eng ho Maria? Maria o ne a e-na le tumelo e matla. O ne a etelletsa borapeli ba Molimo ka pele ho lintho tse ling. Ka boikokobetso o ile a bontša hore o ananela Jesu, esita le haeba ho ne ho ka mo hloka chelete e ngata.

Maria Magdalena

Maria Magdalena e ne e le mang? E ne e le morutuoa oa Jesu ea tšepahalang.

O ile a etsa’ng? Maria Magdalena e ne e le e mong oa basali ba ’maloa ba neng ba tsamaea le Jesu le barutuoa ba hae. O ile a e-ba seatla se bulehileng, a sebelisa chelete ea hae ho thusa Jesu le baapostola ba hae ka litlhoko tsa bona. (Luka 8:1-3) O ile a latela Jesu ho fihlela qetellong ea tšebeletso ea hae ’me o ne a le teng ha Jesu a bolaoa. O ile a ba le tokelo ea hore e be e mong oa batho ba pele ba ileng ba bona Jesu ka mor’a hore a tsosoe.—Johanne 20:11-18.

Re ka ithuta eng ho Maria? Maria Magdalena o ile a tšehetsa Jesu ka seatla se bulehileng tšebeletsong ea hae ’me o ile a lula e le morutuoa ea inehetseng.

Miriame

Miriame e ne e le mang? E ne e le khaitseli ea Moshe le Arone. Ke eena mosali oa pele eo Bibele e mo bitsang moprofeta.

O ile a etsa’ng? Joaloka moprofeta oa mosali, mosebetsi oa hae e ne e le ho bolella batho melaetsa e tsoang ho Molimo. O ne a thabela ho ba boemong bo hlahelletseng Iseraele ’me o ile a bina pina ea tlholo le banna ka mor’a hore Molimo a timetse lebotho la Baegepeta Leoatleng le Lefubelu.—Exoda 15:1, 20, 21.

Nakoana ka mor’a moo, Miriame le Arone ba ile ba bua hampe ka Moshe. Ho hlakile hore ba ne ba susumetsoa ke boikhohomoso le mona. Molimo “o ne a mametse,” ’me o ile a khalemela Miriame le Arone ka matla. (Numere 12:1-9) Ka mor’a moo, Molimo o ile a otla Miriame ka lepera hobane e ne e le eena ea qalileng ho bua hampe. Ha Moshe a kopa Molimo hore a folise Miriame, Molimo o ile a mo folisa. Ka mor’a ho koalloa a le mong ka matsatsi a supileng, o ile a lumelloa ho khutlela liahelong tsa Iseraele.—Numere 12:10-15.

Bibele e bontša hore Miriame o ile a amohela khalemelo eo. Lilemo tse makholo hamorao, Molimo o ile a bua ka tokelo e ikhethang eo a neng a e-na le eona, o ile a hopotsa Baiseraele, a re: “Ka romela Moshe, Arone le Miriame hore ba le tataise.”—Mikea 6:4.

Re ka ithuta eng ho Miriame? Pale ea Miriame e bontša hore Molimo o mamela seo barapeli ba hae ba se buang ho ba bang le seo ba se buang ka batho ba bang. Hape re ithuta hore e le hore re thabise Molimo, re lokela ho qoba boikhohomoso le mona e leng lintho tse ka etsang hore re qetelle re sentse botumo bo botle ba batho ba bang.

Ragele

Ragele e ne e le mang? E ne e le morali oa Labane ebile e le mosali eo mopatriareka Jakobo a neng a mo rata haholo.

O ile a etsa’ng? Ragele o ile a nyaloa ke Jakobo ’me a mo tsoalla bara ba babeli, bao e ileng ea e-ba karolo ea lihlooho tsa maloko a 12 a Iseraele ea boholo-holo. Ragele o ile a kopana le monna ea neng a tl’o mo nyala ha a ntse a lisitse linku tsa ntate oa hae. (Genese 29:9, 10) “O ne a le motle haholo” ha a bapisoa le ausi oa hae, Lea.—Genese 29:17.

Jakobo o ile a rata Ragele ’me a lumela ho sebetsa lilemo tse supileng e le hore a ka mo nyala. (Genese 29:18) Leha ho le joalo, Labane o ile a qhekella Jakobo hore a nyale Lea pele, ka mor’a moo Labane o ile a lumella Jakobo hore a nyale Ragele.—Genese 29:25-27.

Jakobo o ne a rata Ragele le bara ba hae ba babeli ho feta Lea le bana ba hae. (Genese 37:3; 44:20, 27-29) Ka lebaka leo, basali bana ba babeli ba ne ba hlolisana.—Genese 29:30; 30:1, 15.

Re ka ithuta eng ho Ragele? Ragele o ile a mamella boemo bo boima ka lapeng, a sa felloe ke tšepo ea hore Molimo o tla utloa lithapelo tsa hae. (Genese 30:22-24) Pale ea hae e bontša khatello eo lenyalo la sethepu le ka e bakang ka lapeng. Mohlala oa Ragele o re bontša hore na Molimo o bohlale hakaakang ka hore ebe o ile a fana ka molao-motheo bakeng sa lenyalo oa hore monna a be le mosali a le mong.—Matheu 19:4-6.

▸ Ho ithuta ka ho eketsehileng ka Ragele, bala sehlooho se reng “Barali ba Motho ba Mahlomoleng ba ‘Hahileng Ntlo ea Iseraele.’”
▸ Ho ithuta hore na ke hobane’ng ha Molimo a ile a lumella sethepu har’a batho ba hae ka nakoana, bala sehlooho se reng “Na Molimo o Lumella Lenyalo la Sethepu?”

Rahaba

Rahaba e ne e le mang? E ne e le mosali oa letekatse ea neng a lula Kanana motseng oa Jeriko ’me e ile ea e-ba morapeli oa Jehova Molimo.

O ile a etsa’ng? Rahaba o ile a pata Baiseraele ba babeli ba neng ba il’o hloela naha. O ile a etsa sena hobane a ile a utloela kamoo Jehova Molimo oa Iseraele a ileng a lokolla batho kateng naheng ea Egepeta ’me hamorao a ba pholosa ha ba ne ba hlaseloa ke Baamore.

Rahaba o ile a thusa banna ba lihloela ’me a ba kopa hore ba mo sireletse, eena le ba lelapa labo ha Baiseraele ba hlasela motse oa Jeriko. Ba ile ba lumela, empa ba ile ba mo fa litaelo: O ne a lokela ho boloka seo ba neng ba tl’o se etsa e le lekunutu, ’me eena le ba lelapa labo ba ne ba lokela ho lula ka tlung ha Baiseraele ba hlasela, hape o ne a lokela ho haka thapo e khubelu fensetereng e le ho tšoaea ntlo ea bona. Rahaba o ile a mamela litaelo tsohle ’me eena le ba lelapa labo ba ile ba pholoha ha Baiseraele ba hapa Jeriko.

Hamorao Rahaba o ile a nyaloa ke Moiseraele ’me ea e-ba moholo-holo oa Morena Davida le Jesu Kreste.—Joshua 2:1-24; 6:25; Matheu 1:5, 6, 16.

Re ka ithuta eng ho Rahaba? Bibele e re Rahaba ke mohlala o motle oa tumelo. (Baheberu 11:30, 31; Jakobo 2:25) Pale ea hae e re bontša kamoo Molimo a seng leeme a bileng a tšoarelang kateng, hobane o hlohonolofatsa batho ba mo tšepang ho sa tsotellehe maemo a bona.

▸ Ho ithuta ka ho eketsehileng ka Rahaba, bala sehlooho se reng “Ho Ile ‘ha Boleloa Hore o Lokile ka Mesebetsi.’”

Rebeka

Rebeka e ne e le mang? E ne e le mosali oa Isaka ebile e le ’mè oa bara ba babeli ba mafahla, e leng Jakobo le Esau.

O ile a etsa’ng? Rebeka o ile a etsa thato ea Molimo, le hoja ho etsa joalo ho ne ho le thata. Ha a ntse a kha metsi, monna e mong o ile a mo kopa metsi a nooang. Ka potlako, Rebeka o ile a mo fa ’ona a ba a kopa ho khella likamele tsa monna eo metsi. (Genese 24:15-20) Monna eo e ne e le mohlanka oa Abrahama, ’me o ne a tsamaile leeto le lelelele e le hore a fumanele mora oa Abrahama, e leng Isaka, mosali. (Genese 24:2-4) O ile a boela a rapella hore Molimo a mo hlohonolofatse. Ha a bona kamoo Rebeka a neng a sebetsa ka thata a bile a amohela baeti kateng, o ile a lemoha hore Molimo o arabetse thapelo ea hae, ’me a hlokomela hore ke mosali ea nepahetseng bakeng sa Isaka.—Genese 24:10-14, 21, 27.

Ha Rebeka a utloa lebaka leo mohlanka eo a tlileng ka lona, o ile a lumela ho khutla le eena hore e il’o ba mosali oa Isaka. (Genese 24:57-59) Hamorao, Rebeka o ile a ba le mafahla a bashanyana. Molimo o ile a mo senolela hore moshanyana ea moholo, e leng Esau, o tla sebeletsa ea monyane, e leng Jakobo. (Genese 25:23) Ha Isaka a batla ho hlohonolofatsa letsibolo la hae e leng Esau, Rebeka o ile a sebetsa ka thata ho netefatsa hore tlhohonolofatso eo e ea ho Jakobo, e leng se neng se lumellana le seo a tsebang hore ke thato ea Molimo.—Genese 27:1-17.

Re ka ithuta eng ho Rebeka? Rebeka o ne a ikokobelitse, a sebetsa ka thata ebile a amohela baeti. Makhabane ana a ile a etsa hore e be ’mè, mosali ea molemo le morapeli oa Molimo oa ’nete.

▸ Ho ithuta ka ho eketsehileng ka Rebeka, bala sehlooho se reng “Ke Ikemiselitse ho Tsamaea.”

Ruthe

Ruthe e ne e le mang? E ne e le mosali oa Momoabe ea ileng a tlohella melimo le naha ea habo hore e tle e be morapeli oa Jehova naheng ea Iseraele.

O ile a etsa’ng? Ruthe o ile a bontša lerato le ikhethang ho matsale oa hae, Naomi. Naomi, monna oa hae le bara ba hae ba babeli, ba ne ba ile naheng ea Moabe ho baleha tlala e neng e le Iseraele. Qetellong, bara ba hae ba ile ba nyala basali ba Bamoabe e leng Ruthe le Orpa. Leha ho le joalo, ha nako e ntse e ea monna oa Naomi le bara ba hae ba babeli ba ile ba hlokahala, eaba ba siea bahlolohali bao ba bararo.

Naomi o ile a etsa qeto ea ho khutlela Iseraele kaha komello e ne e se e felile. Ruthe le Orpa ba ile ba khetha ho tsamaea le eena. Empa Naomi o ile a ba kopa hore ba khutlele ho beng ka bona. Orpa o ile a khutla. (Ruthe 1:1-6, 15) Leha ho le joalo, Ruthe o ile a sala le ’mè matsale oa hae. O ne a rata Naomi ’me a batla ho rapela Molimo oa Naomi, e leng Jehova.—Ruthe 1:16, 17; 2:11.

Ruthe o ile a ba le botumo bo botle motseng oa ha bo Naomi oa Bethlehema kaha e ne e le ngoetsi e neng e sebetsa ka thata. Monna e mong oa morui ea bitsoang Boase, o ile a khahloa ke Ruthe. O ile a ba seatla se bulehileng eaba o fa Ruthe le Naomi lijo. (Ruthe 2:5-7, 20) Hamorao, Ruthe o ile a nyaloa ke Boase ’me ea e-ba moholo-holo oa Morena Davida le Jesu Kreste.—Matheu 1:5, 6, 16.

Re ka ithuta eng ho Ruthe? Kaha Ruthe o ne a rata Naomi le Jehova, o ile a tloha ha habo a ba a siea le lelapa labo. O ne a sebetsa ka thata, a itetse ebile a tšepahala le hoja a ne a e-na le mathata a mangata.

▸ Ho ithuta ka ho eketsehileng ka Ruthe, bala lihlooho tse reng “Ke Tla ea Moo U Eang Teng” le “Mosali ea Khabane ka ho Fetisisa.”

Sara

Sara e ne e le mang? E ne e le mosali oa Abrahama ebile e le ’mè oa Isaka.

O ile a etsa’ng? Sara o ile a tloha motseng o neng o ruile oa Ure hobane o ne a e-na le tumelo litšepisong tseo Molimo a neng a li etselitse monna oa hae Abrahama. Molimo o ile a bolella Abrahama hore a tlohe Ure a ee naheng ea Kanana. Molimo o ile a mo tšepisa ho mo hlohonolofatsa le ho etsa hore e be sechaba se seholo. (Genese 12:1-5) E ka ’na eaba Sara o ne a le lilemo li 60 ka nako eo. Ho tloha ka nako eo, Sara le monna oa hae ba ile ba phela bophelo ba ho hloma litente le ho li hlomolla ba ea sebakeng se seng ka mor’a se seng.

Le hoja bophelo ba hloma u hlomolle bo ile ba beha Sara kotsing, o ile a tšehetsa Abrahama ha a ntse a latela tataiso ea Molimo. (Genese 12:10, 15) Sara o qetile lilemo tse ngata a se na ngoana, ’me taba eo e ne e mo utloisa bohloko haholo. Leha ho le joalo, Molimo o ne a tšepisitse hore o tla hlohonolofatsa bana ba Abrahama. (Genese 12:7; 13:15; 15:18; 16:1, 2, 15) Ha nako e ntse e ea, Molimo o ile a tiisa hore Sara o tla ba le ngoana le Abrahama. O ile a ba le ngoana a se a fetile lilemo tsa ho beleha. O ne a le lilemo li 90, ’me monna oa hae a le lilemo li 100. (Genese 17:17; 21:2-5) Ba ile ba reha ngoana oa bona Isaka.

Re ka ithuta eng ho Sara? Mohlala oa Sara o re ruta hore kamehla re ka tšepa hore Molimo o tla phethahatsa litšepiso tsa hae, esita le tseo ho bonahalang eka li ke ke tsa etsahala. (Baheberu 11:11) Mohlala oa hae joaloka mosali o totobatsa hore basali ba lokela hore ba hlomphe banna ba bona.—1 Petrose 3:5, 6.

▸ Ho ithuta ka ho eketsehileng ka Sara, bala lihlooho tse reng “U Mosali ea Nang le Ponahalo e Ntle” le “Molimo o Ile a mo Reha ‘Khosatsana.’”

Moroetsana oa Moshulame

Moroetsana oa Moshulame e ne e le mang? E ne e le moroetsana ea motle oa mahaeng ’me ke motho ea ka sehloohong bukeng ea Bibele ea Sefela sa Lifela. Bibele ha e bolele lebitso la hae.

O ile a etsa’ng? Moroetsana enoa oa Moshulame o ile a lula a tšepahala ho molisa ea neng a mo rata. (Sefela sa Lifela 2:16) Leha ho le joalo, botle ba hae bo ikhethang bo ile ba hapa tlhokomelo ea Morena Solomone oa morui, ea ileng a leka ho hapa maikutlo a hae. (Sefela sa Lifela 7:6) Le hoja batho ba bang ba ile ba khothalletsa ngoanana enoa hore a khethe Solomone, moroetsana enoa oa Moshulame o ile a hana. O ne a rata molisana enoa oa boemo bo tlase, ’me o ile a mo tšepahalla.—Sefela sa Lifela 3:5; 7:10; 8:6.

Re ka ithuta eng ho moroetsana oa Moshulame? O ne a ikokobelitse ho sa tsotellehe hore na o motle hakae le hore na batho ba mo thahasella hakae. Ha aa ka a lumella hore lithaka tsa hae, maruo kapa botumo li susumetse maikutlo a hae a lerato. O ile a laola maikutlo a hae ’me a lula a hloekile boitšoarong.

Mosali oa Lota

Mosali oa Lota e ne e le mang? Bibele ha e re bolelle lebitso la hae. Empa e re bolella hore o ne a e-na le barali ba babeli le hore eena le ba lelapa la hae ba ne ba lula Sodoma.—Genese 19:1, 15.

O ile a etsa’ng? Ha aa ka a mamela taelo ea Molimo. Molimo o ne a rerile ho timetsa Sodoma le metse e haufi le eona ka lebaka la boitšoaro bo bobe bo amanang le thobalano. Kaha Lota o ne a lokile, Molimo o ne a mo rata a bile a rata le lelapa la hae, ke kahoo a ileng a romela mangeloi a mabeli hore a ba pholose ha a timetsa motse oa Sodoma.—Genese 18:20; 19:1, 12, 13.

Mangeloi ana a ile a bolella Lota le ba lelapa la hae hore ba balehe ba sa hetle, ho seng joalo ba ne ba tla shoa. (Genese 19:17) Mosali oa Lota o ile a “hetla ’me a fetoha seemahale sa letsoai.”—Genese 19:26.

Re ka ithuta eng ho mosali oa Lota? Pale ea hae e re hlokomelisa kotsi ea ho rata lintho tse bonahalang, hoo re ka qetellang re sa mamele Molimo. Jesu o ile a mo qotsa e le mohlala o lemosang, ha a re: “Hopolang mosali oa Lota.”—Luka 17:32.