Nahana ka litlhahiso tsena tse bohlale tse tsoang ka Bibeleng:

1.   Etsa lintho ka tsela e nang le seriti. E-ba botsoalle ’me u hlomphe basebetsi-’moho le uena, empa u qobe ho ba fa maikutlo a hore u tla lumela ha ba batla tsa thobalano.​—Matheu 10:16; Bakolose 4:6.

2.   Apara ka tsela e itlhomphang. Ho apara liaparo tse sieang ’mele ka ntle ho fana ka maikutlo a fosahetseng. Bibele e re khothalletsa hore re apare ka tsela e bontšang “boitlhompho le ho hlaphoheloa kelellong.”​—1 Timothea 2:9.

3.   Khetha metsoalle ka bohlale. Haeba u qeta nako u e-na le batho ba se nang bothata kapa ba bileng ba ratang ho bapala ka maikutlo a lerato le ho etsa liketso tse lebisang thobalanong, ba bang ba ka ’na ba etsa se tšoanang ho uena.​—Liproverbia 13:20.

4.   Qoba puo e litšila. Itsamaele haeba batho ba qala ho bua “lintho tse litšila, tsa booatla kapa mesoaso e mebe.”​—Baefese 5:4, God’s Word Bible.

5.   Qoba maemo a ka u behang kotsing. Ka mohlala, u lokela ho ba hlokolosi ha motho a u kōpa hore u sale ka mor’a lihora tsa mosebetsi haeba ho se na lebaka le utloahalang la ho etsa seo.​—Liproverbia 22:3.

6.   Bua ka tieo le ka ho toba. Haeba u hlekahlekoa ka thobalano, bolella motho eo hore ha u rate seo a se etsang. (1 Bakorinthe 14:9) Ka mohlala, u ka ’na ua re: “U ntse u ikhohla ka ’na, ’me ha ke rate seo. Ke kōpa u tlohele ho ikhohla ka ’na.” U ka ’na ua ngolla motho eo u mo bolelle hore na ho etsahetseng, seo se ile sa etsa hore u ikutloe joang ’me u ka rata hore a etse’ng nakong e tlang. Mo bolelle ka ho hlaka hore ke seo u se lumelang le seo u batlang ho se etsa.​—1 Bathesalonika 4:3-5.

7.   Kōpa thuso. Haeba motho eo a tsoela pele ho u hlekahleka, bolella motsoalle, e mong oa lelapa, mosebetsi-’moho kapa motho ea thusang batho ba kileng ba hlekahlekoa ’me e le eo u ka mo tšepang. (Liproverbia 27:9) Batho ba bangata ba kileng ba hlekahlekoa ka thobalano ba thusitsoe ke thapelo. Esita le haeba ha ho mohla u kileng ua rapela, u se ke ua halala thuso eo u ka e fumanang ho Jehova, e leng “Molimo oa matšeliso ’ohle.”​—2 Bakorinthe 1:3.

 Ho hlekahlekoa ka thobalano ho sulafaletsa batho ba limilione mosebetsi, empa Bibele e ka ba thusa.