Moea o halalelang ke matla a Molimo a sebetsang. (Mikea 3:8; Luka 1:​35) Molimo o romela moea oa hae ka ho ntša matla sebakeng leha e le sefe e le hore a phethe morero oa hae.​—Pesaleme ea 104:30; 139:7.

 Ka Bibeleng, lentsoe “moea” le fetoletsoe ho tsoa lentsoeng la Seheberu e leng ruʹach le lentsoeng la Segerike e leng pneuʹma. Hangata mantsoe ao a bolela matla a Molimo a sebetsang kapa moea o halalelang. (Genese 1:2) Leha ho le joalo, Bibele e boetse e sebelisa mantsoe ana ka kutloisiso e ’ngoe:

•   Phefumoloho.​—Habakuke 2:19; Tšenolo 13:15.

•   Moea.​—Genese 8:1; Johanne 3:8.

•   Matla a ho libōpuoa tse phelang.​—Job 34:14, 15.

•   Motho kapa boikutlo ba motho.​—Numere 14:24.

•   Batho ba moea, ho akaretsa Molimo le mangeloi.​—1 Marena 22:21; Johanne 4:24.

 Tsena kaofela li bolela ntho e sa bonahaleng ho batho empa mosebetsi oa eona oa bonahala. Ka ho tšoanang moea oa Molimo, “joaloka moea, ha o bonahale o bile o le matla.”—An Expository Dictionary of New Testament Words, by W. E. Vine.

 Bibele e boetse e bolela hore moea o halalelang oa Molimo ke “matsoho” kapa “menoana.” (Pesaleme ea 8:3; 19:1; Luka 11:20; bapisa Matheu 12:28.) Joalokaha setsebi sa mosebetsi se sebelisa matsoho le menoana, Molimo o sebelisitse moea oa hae ho etsa lintho tse latelang:

•   Bokahohleng.​—Pesaleme ea 33:6; Esaia 66:1, 2.

•   Bibele.—2 Petrose 1:20, 21.

•   Mehlolo e neng e etsoa ke bahlanka ba hae ba mehleng ea khale le ho paka ha bona ka cheseho.—Luka 4:18; Liketso 1:8; 1 Bakorinthe 12:4-11.

•   Litšobotsi tse ntle tseo batho ba mo mamelang ba li bontšang.—Bagalata 5:22, 23.

Moea o halalelang hase motho

 Ha Bibele e bua ka moea oa Molimo e le “matsoho,” “menoana,” kapa “phefumoloho,” seo se bontša hore moea o halalelang hase motho. (Exoda 15:8, 10) Setsebi sa mosebetsi se ke ke sa khona ho sebetsa se sa sebelise kelello le ’mele oa sona; ka ho tšoanang, moea o halalelang o sebetsa feela kamoo Molimo a o laelang kateng. (Luka 11:13) Bibele e boetse e bapisa moea oa Molimo le metsi hape e o amahanya le lintho tse kang tumelo le tsebo. Lipapiso tsena kaofela ha tsona li bontša hore moea o halalelang hase motho.—Esaia 44:3; Liketso 6:5; 2 Bakorinthe 6:6.

 Bibele e re bolella lebitso la Jehova Molimo le Mora oa hae, Jesu Kreste empa ha ho moo e re bolellang lebitso la moea o halalelang. (Esaia 42:8; Luka 1:31) Ha Setefane, ea ileng a shoela tumelo a fumana pono ea leholimo, o ile a bona batho ba babeli feela eseng ba bararo. Bibele e re: “Eena, a tletse moea o halalelang, a talima leholimong ’me a re heli! eaba o bona khanya ea Molimo le ea Jesu a eme ka letsohong le letona la Molimo.” (Liketso 7:55) Moea o halalelang ke oona o neng o etsa hore Setefane a bone pono eo.

 Leshano: “Moea o halalelang,” ke motho ’me ke karolo ea Boraro-bo-bong, joalokaha ho boletsoe ho 1 Johanne 5:7, 8, Bibeleng ea King James.

 ’Nete: Bibele ea King James ho 1 Johanne 5:7, 8, e re “leholimong, Ntate, Lentsoe, le Moea o halalelang: bana ba bararo ke motho a le mong. Hape ho na le ba bararo ba pakang lefatšeng.” Leha ho le joalo, lipatlisiso li bontšitse hore moapostola Johanne ha aa ka a bua mantsoe ao, kahoo hase karolo ea Bibele. Moprofesa Bruce M.Metzger o re: “Ka sebele mantsoe ana ke leshano, ebile ha a eo Testamenteng e Ncha.”—A Textual Commentary on the Greek New Testament.

 Leshano: Bibele e bua ka moea o halalelang e le motho ’me seo se paka hore ke motho.

 ’Nete: Ka linako tse ling Mangolo a bua ka moea o halalelang e le motho, empa seo hase pake hore moea o halalelang ke motho. Bibele e bua ka bohlale, lefu le sebe joalokaha eka ke motho. (Liproverbia 1:20; Baroma 5:17, 21) Ka mohlala, Bibele e re bohlale bo na le “mesebetsi” le “bana” ’me e bolela hore sebe sea khelosa, sea bolaea ’me se meharo.—Matheu 11:19; Luka 7:35; Baroma 7:8, 11.

 Ka ho tšoanang, ha moapostola Johanne a qotsa Jesu, o ile a bua ka moea o halalelang joalokaha eka ke motho, a o bitsa “mothusi” ea fanang ka bopaki, ea tataisang, ea buang, ea utloang, ea phatlalatsang, ea tlotlisang le ea amohelang. (Johanne 16:7-15) Leha ho le joalo, o buile joalo a sebelisa lentsoe la Segerike le bolelang “mothusi,” (pa·raʹkle·tos) e leng lereho le ka botoneng ’me ho latela melao ea puo ea Segerike le hloka seemeli se ka botoneng. Ha John a ne a bua ka moea o halelang a sebelisa lereho la pneuʹma, o ile a sebelisa seemeli se sa oeleng ka botoneng kapa ka botšehaling, e leng “e.”—Johanne 14:16, 17.

 Leshano: Ho kolobetsoa ka lebitso la moea o halalelang ho bontša hore ke motho.

 ’Nete: Ka linako tse ling Bibele e sebelisa “lebitso” e le ho bontša bolaoli kapa matla. (Deuteronoma 18:5, 19-22; Esthere 8:10) Lentsoe lena le sebelisoa ka tsela e tšoanang ka Sesotho ha ho thoe “lebitsong la molao,” ’me seo hase bolele hore molao ke motho. Motho ea kolobetsoang “ka lebitso la” moea o halalelang o hlokomela hore moea o matla ’me o ka mo susumetsa ho etsa thato ea Molimo.—Matheu 28:19.

 Leshano: Baapostola ba Jesu le barutuoa ba bang ba ne ba lumela hore moea o halalelang ke motho.

 ’Nete: Bibele le histori ha li rute seo. The Encyclopædia Britannica e re: “Taba ea hore Moea o Halalelang ke motho . . . e hlahile lekhotleng la Constantinople ka ad 381.” Sena se etsahetse lilemo tse 250 ka mor’a lefu la moapostola oa ho qetela.