E. Jesu o ile a bolela hore balateli ba hae ba ka batla phekolo ea lingaka ha a re “batho ba phelang hantle ha ba hloke ngaka, empa ba kulang baa e hloka.” (Matheu 9:12) Le hoja Bibele e se buka ea tsa bongaka, e fana ka melao-motheo e tataisang batho ba batlang ho khahlisa Molimo.

Lipotso tseo u ka ipotsang tsona

 1. Na ke utloisisa phekolo eo ho thoeng ke tla e fuoa? Bibele e re eletsa hore re batle leseli le tšepahalang ho e-na le ho “beha tumelo lentsoeng le leng le le leng.”—Liproverbia 14:15.

 2. Na nka batla maikutlo a lingaka tse ling? ‘Baeletsi ba bangata’ ba ka ’na ba u thusa, haholo haeba boemo ba hao bo se bo le bobe.—Liproverbia 15:22.

 3. Na phekolo eo e akarelletsa ho tlōla taelo ea Bibele e reng re “ile . . . mali”?—Liketso 15:20.

 4. Na tlhahlobo kapa meriana eo ke tla e fuoa e amana le tšebelisano le meea? Bibele e nyatsa “tšebelisano le meea.” (Bagalata 5:19-21) E le hore u tsebe hore na phekolo eo u e fuoang e akarelletsa tšebelisano le meea, nahana ka lipotso tse kang tsena:

•   Na ngaka eo ke eang ho eona e sebelisana le meea?

•   Na ke alafshoa ke motho ea lumelang hore ke kula hobane ke halefisitse balimo kapa hobane ke louoe ke lira?

•   Na motho ea nkalafang o ile a etsa mahlabelo, a betsa ba bang ka mantsoe a boloi, kapa a etsa mesebetsi e itseng kapa ho sebelisa lintho tse amanang le tšebelisano le meea ha a e etsa meriana kapa a e sebelisa?

 5. Na ke amehile ka ho feteletseng ka bophelo ba ka? Bibele ea eletsa: “Ho ba le kahlolo e molemo ha lōna ho ke ho tsejoe ke batho bohle.” (Bafilipi 4:5) Ho ba le kahlolo e molemo ho tla u thusa hore u lule u nahana ka “lintho tsa bohlokoa haholo,” tse kang nako eo u lokelang ho e qeta u sebeletsa Jehova.—Bafilipi 1:10; Matheu 5:3.