Moroallo o bile teng. Molimo o ile a o tlisa e le hore a felise batho ba khopo empa o ile a laela Noe ho haha areka e le hore batho ba lokileng ba pholohe hammoho le liphoofolo. (Genese 6:11-20) Re ka kholiseha hore Moroallo o bile teng hobane tlaleho ea ’ona e fumaneha ka har’a ‘mangolo ’ohle a halalelang a tsoang ho Molimo’ eleng Bibele.—2 Timothea 3:16.

•  Na ke ’nete kapa ke tšomo?

•  Ke hobane’ng ha ho ile ha e-ba le Moroallo?

•  Na batho ba ne ba tseba hore ho tl’o ba le Moroallo?

•  Areka ea Noe e ne e le joang?

•  Noe o nkile nako e kae ho haha areka?

•  Lipale le litšomo tse buang ka moroallo

 Bibele e bontša hore Noe ke motho ea kileng a phela le hore Moroallo o ile oa fela oa e-ba teng ebile ha se tšomo kapa ntho e inahaneloang.

•   Bangoli ba Bibele ba ne ba lumela hore Noe ke motho ea kileng a phela. Ka mohlala, kaha Esdrase le Luka e ne e le bangoli ba Bibele ba neng ba etsa lipatlisiso ka hloko e le hore ba fane ka tlaleho ea histori e nepahetseng, re ka kholoa hore Noe o kile a phela hobane ba mo kenyellelitse lethathamong la leloko la Iseraele. (1 Likronike 1:4; Luka 3:36) Bangoli ba likosepele e leng Matheu le Luka ba kenyellelitse lintho tseo Jesu a ileng a li bua ka Noe le ka Moroallo.—Matheu 24:37-39; Luka 17:26, 27.

   Moprofeta Ezekiele le moapostola Pauluse le bona ba ile ba bua ka Noe e le mohlala oo re ka o etsisang kaha o ne a lokile ebile a e-na le tumelo. (Ezekiele 14:14, 20; Baheberu 11:7) Na e ne e tla ba ntho e utloahalang hore bangoli baa ba re re etsise mohlala oa motho ea neng a sa ka a phela? Ho hlakile hore re ka etsisa mohlala oa Noe le oa banna le basali ba neng ba e-na le tumelo e matla ba hlahang ka Bibeleng hobane ke batho ba kileng ba phela.—Baheberu 12:1; Jakobo 5:17.

•   Bibele e fana ka lintlha tse tobileng ka Moroallo. Tlaleho ea Bibele e buang ka Moroallo e ne e se tšomo hobane ha e qale ka mantsoe a kang “Ba re e ne e re.” Ho e-na le hoo Bibele e fana ka selemo, khoeli le letsatsi leo Moroallo o qalileng ka lona. (Genese 7:11; 8:4, 13, 14) E boetse e a re bolella hore na areka eo Noe a ileng a e haha e ne e le kholo hakae. (Genese 6:15) Lintlha tsena tse hlahang ka Bibeleng li bontša hore Moroallo o bile teng le hore ha se tšomo.—Baheberu 12:1; Jakobo 5:17.

 Bibele e re pele ho Moroallo Jehova o ile a bona hore “motho o etsa lintho tse ngata tse mpe.” (Genese 6:5) E tsoela pele hore “lefatše le ne le senyehile mahlong a Molimo oa ’nete ” hobane le ne le tletse ntoa le boitšoaro bo bobe bo amanang le thobalano.—Genese 6:11; Juda 6, 7.

 Bibele e re boholo ba mathata ana a ne a bakoa ke mangeloi a khopo a ileng a theoha leholimong ho tla etsa boitšoaro bo bobe bo amanang le thobalano le basali ba lefatšeng. Mangeloi ana a ile a ba le bana ba bitsoang Banefilime, ba ile ba bakela batho mathata a mangata le mesarelo. (Genese 6:1, 2, 4) Molimo o ile a etsa qeto ea ho felisa batho bohle ba khopo e le hore ho sale batho ba lokileng feela ho se na tšusumetso e mpe.—Genese 6:6, 7, 17.

 E. Molimo o ile a bolella Noe se neng se tl’o etsahala ’me a mo laela hore a hahe areka hore a tle a bolokehe le lelapa la hae hammoho le liphoofolo. (Genese 6:13, 14; 7:1-4) Noe o ile a lemosa batho ka timetso e tlang empa ha baa ka ba mo mamela. (2 Petrose 2:5) Bibele e re: “Ha baa ka ba elelloa ho fihlela Moroallo o fihla, o ba hohola kaofela.”—Matheu 24:37-39.

 Areka e ne e tšoana le lebokose le leholo haholo, e ne e le bolelele ba limithara tse ka bang 134, bophara ba limithara tse ka bang 22 ’me e le bophahamo ba limithara tse ka bang 13. Areka e ne e entsoe ka lifate ’me e tlotsitsoe ka sekontiri ka ntle le ka hare. E ne e e-na le mekato e meraro le likamore. Ho ne ho e-na le monyako lehlakoreng la areka le fensetere ka holim’a monyako oo. Ho ne ho bonahala eka marulelo a areka a ne a phahame bohareng ho feta mahlakoreng e le hore metsi a se ke a lula marulelong.—Genese 6:14-16.

 Bibele ha e bolele hore na Noe o nkile nako e kae ho haha areka empa ho bonahala ho mo nkile lilemo tse ngata ho e haha. Noe o ne a le lilemo tse fetang 500 ha mora oa hae oa letsibolo a hlaha. Ha ho e-ba le Moroallo o ne a le lilemo li 600. a—Genese 5:32; 7:6.

 Ha Molimo a ne a joetsa Noe hore a hahe areka bara ba hae ba bararo ba ne ba se ba holile ba bile ba nyetse ’me mohlomong e bile ka mor’a lilemo tse 50 kapa tse 60. (Genese 6:14, 18) Ho latela khakanyo ena, ke ho utloahalang ho etsa qeto ea hore areka e qetiloe ka mor’a lilemo tse 40 kapa tse 50.